“Fortalece Boso Santisimo Fe”

1, 2. Den ki proyecto di construccion bo ta envolvi, y dicon e calidad di bo trabou ta masha importante?

BO TIN basta tempo ta trahando riba construccion di un edificio. Por lo pronto e proyecto ey lo no caba. E trabou no ta facil, pero e ta duna bo hopi satisfaccion. Bo ta determina cu pase loke pase lo bo no entrega ni floha. Bo kier pa bo trabou ta di bon calidad ya cu bo bida, y hasta bo futuro, ta depende di dje. Ta di kico nos ta papia? Wel, e edificio den construccion ta abo mes!

² Discipel Judas a bisa cu ta masha importante pa nos fortalece, of edifica, nos mes. El a skirbi: “Fortalece boso santisimo fe.”a (Judas 20, 21) Haciendo esaki, cristiannan lo “keda den e amor di Dios.” Con nos por ‘fortalece nos fe’? Laga nos analisa tres aspecto di e proyecto di construccion spiritual aki.

SIGUI FORTALECE BO FE DEN E NORMANAN HUSTO DI JEHOVA

3-5. (a) Kico Satanas kier laga bo kere tocante e rekisitonan di Jehova? (b) Con nos mester mira e rekisitonan di Dios, y con nos lo sinti nos si nos ta mira nan asina? Ilustra esey.

³ Na prome luga, nos tin cu fortalece nos fe den e leynan di Dios. Durante bo estudio di e buki aki, bo a considera basta di Jehova su rekisitonan husto relaciona cu conducta. Kico bo ta pensa di nan? Satanas kier laga bo kere cu e ley-, principio- y normanan di Jehova ta mucho restrictivo, hasta opresivo. E tactica ey a dun’e masha bon resultado den hofi di Eden, y pesey semper el a sigui uz’e. (Genesis 3:1-6) E tactica aki lo funciona den bo caso tambe? Esey ta depende hopi di e manera cu bo ta mira e rekisitonan divino.

⁴ Laga nos duna un ehempel: Bo ta cana keiro den un parke bunita y ta topa un cura di waya halto y firme cu ta blokia un parti masha agradabel di e parke. Na prome instante, lo bo por mira e waya como un restriccion innecesario di bo libertad. Pero, ora bo wak mas aleu, tras di e waya, bo ta mira un leon feroz ta sluip tras di un bestia pa atac’e! Awor bo ta compronde pakico e cura t’ey: pa bo proteccion! Acaso tin un bestia feroz ta sluip bo tras pa ataca bo aworaki? E Palabra di Dios ta spierta: “Mantene boso sano huicio y sea alerta. Boso adversario, Diabel, ta cana rond manera un leon cu ta [brul], buscando ken e por habraca.”—1 Pedro 5:8.

⁵ Satanas ta manera un bestia masha feroz cu ta jaag hende. Jehova no kier pa nos bira su victima y ta pesey El a duna nos leynan pa proteha nos di e tantisimo “trampanan” di e Malbado ey. (Efesionan 6:11) Pesey, ora nos ta medita riba e leynan di Dios, nos mester mira nan como un muestra di e gran amor di nos Tata celestial. Ora nos ta mira e leynan di Dios di e manera ey, nos ta sinti un goso y ta haya un sintimento di siguridad. Discipel Santiago a skirbi: “Esun cu ta wak cuidadosamente den e ley perfecto cu ta trece libertad, y ta persisti den haci esey, [lo] ta feliz haciendo esey.”—Santiago 1:25.

6. Cua ta e mihor manera pa fortalece nos fe den e leynan y principionan husto di Dios? Duna un ehempel.

⁶ E mihor manera pa fortalece nos fe den nos Gran Legislador, Jehova, y den e sabiduria di su leynan ta door di aplica su mandamentonan den nos bida diario. Esey ta encera obedece e “ley di Cristo”, cu ta inclui e mandamento di Hesus pa siña otro hende tambe ‘cumpli cu tur loke el a manda.’ (Galationan 6:2; Mateo 28:19, 20) Como cristian, nos ta tuma na serio tambe e instruccion di reuni hunto pa adora Dios y pa disfruta di bon asociacion. (Hebreonan 10:24, 25) Un otro mandamento di Dios ta pa resa na dje frecuentemente y di curason. (Mateo 6:5-8; 1 Tesalonicensenan 5:17) Segun cu nos ta biba na harmonia cu e mandamentonan ey, nos ta keda mas y mas convenci cu nan ta refleha e amor di Dios. Nos ta realisa cu ora nos obedece nan, nan ta duna nos un goso y satisfaccion cu hamas nos lo por haya den e mundo yen di problema aki. Sin duda, nos fe den e leynan ey ta bira mas fuerte ora nos medita riba e manera cu nos a beneficia personalmente pa e echo cu nos a obedece nan.

7, 8. Con e Palabra di Dios ta trankilisa esnan cu ta preocupa cu kisas nan lo no por keda semper fiel?

⁷ Algun cristian tin biaha ta pensa cu lo ta dificil pa nan obedece e leynan di Jehova aña aden aña afo. Nan tin miedo cu nan lo fracasa. Si un dia bo sinti bo asina, corda riba e palabranan aki: “Ami ta SEÑOR bo Dios, kende ta siña bo, pa bo prospera, kende ta guia bo den e caminda cu bo mester cana. Mara bo a pone atencion na mi mandamentonan! E ora ey bo paz lo tabata manera un riu, y bo husticia manera ola di lama.” (Isaias 48:17, 18) Bo a yega di para keto y pensa ki un gran animacion e palabranan ey ta?

⁸ Akinan Jehova ta recorda nos cu si nos obedec’e, nos lo ricibi dos beneficio. Di prome, nos paz lo ta manera un riu: trankil, abundante y continuo. Di dos, nos husticia lo ta manera ola di lama. Si bo para canto di lama y wak e olanan drenta, un tras di otro, bo ta haya un sensacion di eternidad, pasobra bo sa cu e olanan lo sigui bin canto pa semper. Jehova ta bisa cu bo husticia—bo manera di biba di acuerdo cu loke ta corecto y husto—por ta manera esey. Tanten cu bo ta haci esfuerso pa keda fiel na dje, lo e no laga bo fracasa nunca! (Salmo 55:22) Bo no ta haya cu e promesanan alentador ey ta fortalece bo fe den Jehova y den su rekisitonan husto?

“HACI ESFUERSO PA ALCANSA MADUREZ”

9, 10. (a) Dicon madurez ta un meta excelente pa cristiannan? (b) Con un punto di bista spiritual ta yuda nos haya goso?

⁹ E di dos aspecto di bo proyecto di construccion ta ser revela den e siguiente palabranan inspira: “Laga nos haci esfuerso pa alcansa madurez.” (Hebreonan 6:1) Na contraste cu perfeccion, cu awor ta fuera di nos alcance, madurez cristian ta un meta excelente cu nos tur por logra. Ademas, segun cu nos ta madura, nos ta haya mas y mas goso den sirbi Jehova. Con bin?

¹⁰ Un cristian maduro ta un persona spiritual, esta, un persona cu tin un bon relacion cu Jehova, y e ta mira cosnan for di e punto di bista di Jehova. (Juan 4:23) Pablo a skirbi: “Esnan cu ta biba segun carni ta fiha nan mente riba e cosnan di carni, pero esnan cu ta biba segun spirito, riba e cosnan di spirito.” (Romanonan 8:5) Hende cu tin un punto di bista carnal, of puramente humano, no por ta feliz, pasobra hopi biaha nan ta egoista, materialista y tin un mente cera. Ma hende cu tin un punto di bista spiritual ta feliz, pasobra nan bida ta enfoca riba Jehova, “e Dios feliz.” (1 Timoteo 1:11) Nan ta ansioso pa agrad’e y ta sinti goso hasta ora nan ta pasando den prueba. Dicon? Pasobra kedando fiel, nan ta haya chens di demostra cu Satanas ta un mentiroso y alabes nan ta fortalece nan integridad, loke ta haci curason di nan Tata celestial contento.—Proverbionan 27:11; Santiago 1:2, 3.

11, 12. (a) Kico Pablo a recomenda nos pa haci cu nos “capacidad di compronde”, y kico e palabra “entrena” ta nifica? (b) Ki entrenamento e curpa mester haya pa e madura y bira agil?

¹¹ Nos ta desaroya spiritualidad y madurez pa medio di practica of entrenamento. Esey ta loke e siguiente versiculo aki ta indica: “Cuminda solido ta pa hende madura, esta, pa esnan cu a uza nan capacidad di compronde y asina a entrena esaki pa distingui loke ta bon for di loke ta malo.” (Hebreonan 5:14) Pablo a bisa cu nos tin cu “entrena” nos capacidad di compronde. Akinan el a uza un palabra Griego cu den prome siglo tabata comun den e gimnasionan di Grecia, ya cu literalmente e ta nifica ‘entrena manera un gimnasta.’ Pensa un rato riba kico e entrenamento ey ta encera.

¹² Ora nos a nace, nos curpa no tabata entrena. Un baby por ehempel apenas sa unda su man- cu su pianan ta y no por coordina nan. Pesey e ta zwaai nan pa loco, y hasta sa dal su mes den cara, loke ta sorprend’e y spant’e. Pero pocopoco, segun cu e ta uza su curpa, e ta logra domin’e: E ta cuminsa gatia, despues ta dal su prome stapnan y, cu tempo, e por hasta core.b Pero kico di un gimnasta? Ora bo mira un atleta asina ta bula y draai rond den laira cu un precision y elegancia magnifico, no tin duda den bo mente cu su curpa ta casi manera un mashin perfecto. Pero su habilidad no a bin pa casualidad; ta hopi ora el a entrena pa logra esey. Segun Bijbel, e tipo di “entrenamento fisico [ey] ta yuda cu algo”, pero e entrenamento di nos capacidad di compronde ta hopi mas valioso!—1 Timoteo 4:8.

13. Con nos por entrena nos capacidad di compronde?

¹³ Den e buki aki, nos a considera hopi punto cu por yuda bo entrena bo capacidad di compronde pa asina bo por keda fiel na Jehova como un persona spiritual. Por ehempel, ora bo tin cu tuma decision den bo bida di tur dia, pensa riba e principio- y leynan di Dios y haci oracion tocante nan. Puntra bo mes cada biaha: ‘Cua ley of principio biblico ta relaciona cu e asunto aki? Con mi por aplica nan? Mi Tata celestial lo keda contento cu loke mi kier haci?’ (Proverbionan 3:5, 6; Santiago 1:5) Si bo custumbra di haci esaki prome cu bo tuma decision, bo ta entrena bo capacidad di compronde. Esey lo yuda bo madura y keda un hende realmente spiritual.

14. Pa crece den sentido spiritual, nos tin cu habri nos apetit pa kico specialmente, pero ki actitud nos mester evita?

¹⁴ Maske nos alcansa madurez spiritual, semper nos por sigui crece. Pa logra esaki ta masha importante pa nos wak nos nutricion spiritual. Manera Pablo a bisa: “Cuminda solido ta pa hende madura.” Pa fortalece bo fe bo mester sigui tuma alimento spiritual solido. Ademas, bo tin cu adkiri sabiduria, es decir, sa con pa pone na practica loke bo ta siña. Esey ta masha importante, pasobra Bijbel ta bisa cu “sabiduria ta mihor cu rubi, y tur loke hende por desea no ta di compara cu ne.” Pues, nos tin cu habri nos apetit pa e berdadnan maraviyoso cu nos Tata ta siña nos. (Proverbionan 8:11; 1 Pedro 2:2) Sinembargo, e echo cu nos tin mas conocemento y sabiduria divino no kiermen cu nos mester bira arogante of kere cu ta masha cos nos ta. Nos tin cu analisa nos mes regularmente pa haci sigur cu orguyo of cualkier otro debilidad no ta poderando di nos curason. Pablo a skirbi: “Sigui samina boso mes pa sa si boso ta den e fe, sigui pone boso mes na prueba pa demostra ki tipo di hende boso ta.”—2 Corintionan 13:5.

15. Dicon amor ta indispensabel pa nos por sigui crece den sentido spiritual?

¹⁵ Ora bo caba di traha un cas, ainda bo no ta cla. Mester manten’e y drech’e y, si circunstancia cambia, tin biaha ta hasta necesario pa rek e. Cu nos spiritualidad ta mescos. Kico nos mester tin pa ten’e den bon condicion y pa e crece? Mas cu tur cos, amor. Nos tin cu sigui crece den amor pa Jehova y pa nos rumannan den fe. Si nos no tin amor, tur nos conocemento y tur loke nos ta haci lo no bal nada; lo e ta manera hopi scuma poco chuculati. (1 Corintionan 13:1-3) Cu amor, nos por alcansa madurez y sigui crece den sentido spiritual.

SIGUI ENFOCA RIBA E SPERANSA CU JEHOVA TA DUNA

16. Satanas ta fomenta ki tipo di pensamento, y ki proteccion Jehova a percura pa nos?

¹⁶ Laga nos considera e di tres aspecto di bo proyecto di construccion. Pa bo por desaroya bo mes como un berdadero siguidor di Cristo, bo tin cu vigila bo manera di pensa. Satanas, e gobernante di mundo, ta maestro den stimula pensamentonan negativo, pesimismo, desconfianza y desesperacion den hende. (Efesionan 2:2) E maneranan di pensa ey ta mes peligroso pa un cristian cu comehein ta pa un cas di palo. Pero danki na Jehova, nos tin algo importante pa proteha nos mes: nos speransa.

17. Con e Palabra di Dios ta ilustra e importancia di speransa?

¹⁷ Bijbel ta menciona varios parti di e armadura spiritual cu nos tin mester pa lucha contra Satanas y su mundo. Un parti importante ta e helm, esta, “e speransa di salbacion.” (1 Tesalonicensenan 5:8) Den tempo biblico, un soldaat tabata uza helm di metal y tabata bistie riba un muts di felpa of di cuero, pa e golpinan cu e haya na su cabes causa menos daño posibel. E tabata sa cu lo e no a dura largo den bataya sin un helm. Awel, mescos cu un helm ta proteha bo cabes, asina speransa por proteha bo mente, bo pensamentonan.

18, 19. Con Hesus a demostra kico mantene speransa ta nifica, y con nos por imit’e?

¹⁸ Hesus a demostra perfectamente kico mantene speransa ta nifica. Pensa riba tur loke el a sufri e ultimo anochi di su bida riba tera. Un amigo intimo a traicion’e pa placa. Un otro a declara publicamente cu e no conoc’e. E otronan a huy bay lag’e. Su propio paisanonan a bira contra dje y exigi pa mat’e na un manera cruel na man di soldaat Romano. Nos por bisa sin ningun duda cu Hesus a pasa den prueba hopi mas dificil cu cualkier un di nos lo pasa aden. Kico a yud’e persevera? Hebreonan 12:2 ta contesta: “Pa motibo di e goso cu tabata sper’e, el a soporta morto na un staca di tormento, sin preocupa cu e berguensa cu esey a trece cu ne, y a sinta na man drechi di e trono di Dios.” Hesus nunca a perde “e goso cu tabata sper’e” for di bista.

¹⁹ Ki goso esey tabata? E goso di sa kico e ta logra kedando fiel: Lo el a contribui na santificacion di Jehova su nomber santo y duna e prueba mas grandi cu Satanas ta un mentiroso. Ningun speransa lo por a duna Hesus mas goso! Ademas, e tabata sa cu Jehova lo a recompens’e ricamente pa su fieldad y cu pronto lo el a disfruta atrobe di e maraviyoso compania di su Tata. Hesus a keda enfoca riba e speransa gososo ey durante e momentonan mas dificil cu el a pasa aden. Y nos tin cu haci mescos. Nos tambe tin goso ta spera nos. Jehova ta duna cada un di nos e privilegio di yuda santifica su gran nomber y demostra cu Satanas ta un mentiroso. Con nos ta haci esaki? Esey ta ora nos scoge nos Tata como Soberano y keda den e siguridad di su amor, sin importa ki prueba y tentacion nos haya nos cu ne.

20. Kico por yuda bo keda cu un actitud positivo y cu speransa?

²⁰ Jehova no solamente ta dispuesto pa recompensa su fiel sirbidornan, e ta hasta ansioso pa haci esey. (Isaias 30:18; Malakias 3:10) Ta un placer p’e cumpli cu e deseonan husto di nan curason. (Salmo 37:4) Pues, enfoca riba e speransa cu bo tin bo dilanti. No adopta nunca e manera di pensa negativo, degrada y troci di e mundo bieu aki di Satanas. Si bo ta sinti cu e spirito di e mundo aki pocopoco ta afecta bo mente of curason, pidi Jehova fervientemente pa duna bo “e paz di Dios cu ta surpasa tur comprondemento.” E paz ey lo proteha bo curason y bo mente.—Filipensenan 4:6, 7.

21, 22. (a) Ki speransa glorioso e “multitud grandi” tin? (b) Cua aspecto di e speransa cristian tin mas balor pa bo, y kico ta bo determinacion?

²¹ Esta un speransa maraviyoso bo tin! Si bo ta parti di e “multitud grandi” cu lo “sobrevivi e tribulacion grandi”, pensa riba e bida cu ta spera bo. (Revelacion 7:9, 14) Ta dificil pa imagina e alivio cu lo bo sinti ora cu Satanas y su demoñonan lo no t’ey mas. Ta cua di nos a yega di biba sin e presion- y tentacionnan di Satanas? Unabes cu e presion ey no t’ey mas, lo ta un gran goso di por transforma e tera den un paradijs bou di e guia di Cristo y e 144.000 cu lo goberna for di cielo hunto cu ne. Esta maraviyoso ta e speransa di mira tur maleza y enfermedad ser elimina, di ricibi bek nos sernan keri cu resucita y di disfruta di e bida cu Dios originalmente tabata kier pa nos tin! Segun cu gradualmente nos ta bira perfecto, nos ta yega mas cerca di un recompensa hasta mas grandi ainda, revela na Romanonan 8:21: “E glorioso libertad di e yiunan di Dios.”

²² Jehova kier pa bo alcansa e mayor grado di libertad cu bo por imagina, y e caminda cu ta hiba na e libertad ey ta obediencia. Acaso no ta bale la pena pa bo haci tur bo esfuerso pa obedece Jehova dia aden dia afo? Pues, sigui fortalece bo santisimo fe pa asina bo por keda den e amor di Dios pa tur eternidad!