Rahab A Kere den Jehova

Ban haci manera nos ta na Jerico, un stad cu ta keda na e tera di Canaan. Un señora cu yama Rahab ta biba na e stad aki. E hendenan cu ta biba na Canaan no ta kere den Jehova.

Tempo Rahab tabata chikito, el a tende con Moises a habri Lama Cora y saca e pueblo di Israel for di e tera di Egipto. Tambe el a tende con Jehova a yuda nan gana guera contra nan enemigonan. Awor e ta tende cu e pueblo di Israel a yega te cerca di Jerico, anto nan tin un paar di dia caba ta biba den tent eynan!

Un anochi, dos spion di Israel a bay Jerico pa spiona e stad. Un spion ta un hende cu ta purba haya sa cos sin cu otro hende sa. Nan a bay cas di Rahab y el a bisa nan cu nan tin mag di keda. Poco despues e anochi ey, rey di Jerico a haya sa cu tin spion den su stad y cu nan a bay cas di Rahab. E ora ey, e rey a manda algun homber bay busca nan. Pero Rahab a sconde e dos spionnan riba e dak plat di su cas. El a bisa e hombernan: ‘E spionnan tabata aki si, pero nan a bay for di Jerico caba. Si boso bay lihe, boso por gara nan ainda!’ Bo sa dicon Rahab a yuda e spionnan?— Pasobra e tabata kere den Jehova y e tabata sa cu Jehova lo duna Israel e tera di Canaan.

Prome cu e spionnan a bay for di cas di Rahab, nan a primintie cu ora Israel bin bringa contra Jerico, nada lo no pasa Rahab ni su famia. Bo sa kico nan a bis’e cu e tin cu haci?— Nan a bis’e: ‘Coy e cabuya cora aki anto colg’e for di bo bentana. Si bo haci asina, nada malo lo no pasa cu niun hende cu ta den bo cas.’ Rahab a haci precies manera e spionnan a bis’e. Anto bo sa kico a pasa e ora ey?—

Un par di dia despues, e hendenan di Israel a cana den rij rond di e stad sin papia. Seis dia largo nan a marcha rond di e stad, un biaha pa dia. Pero e di shete dia, nan a marcha rond di e stad shete biaha. Anto e ora ey, nan tur a cuminsa grita hopi duro mes. Jehova a laga e muraya rond di e stad basha plat abou. Pero e cas cu tabatin e cabuya cora na e bentana si a keda para! Bo ta mir’e riba e plachi?— Rahab y su famia a scapa!

Bo sa con abo por ta manera Rahab?— Rahab a siña masha hopi cos maraviyoso di Jehova y pesey el a kere den dje. Abo tambe ta siñando hopi cos maraviyoso di Jehova. Abo ta kere den Jehova mescos cu Rahab?— Claro cu si!