Ora Algo Hopi Tristo Sosode

A pesar cu bo ta traha duro pa bo por tin un matrimonio y famia feliz, cos “inespera” por sosode y kita boso goso. (Eclesiastes 9:11, NW) Ora nos haya nos cu dificultad, Dios ta cla pa yuda nos. Si abo y bo famia sigui e siguiente consehonan di Bijbel, boso lo por persevera hasta den e situacionnan di mas dificil.

1 CONFIA DEN JEHOVA

LOKE BIJBEL TA BISA: “Tira tur boso inkietud riba dje, pasobra e ta interesa den boso.” (1 Pedro 5:7) Semper keda corda cu no ta Dios ta causa nos problemanan. (Santiago 1:13) Hala cerca dje, pasobra e lo yuda boso di e mihor manera posibel. (Isaias 41:10) “Drama boso curason su dilanti.”—Salmo 62:8.

Boso por haya consuelo tambe si boso lesa y studia Bijbel tur dia. Si, boso lo experencia con Jehova ta ‘consola boso den tur boso tribulacionnan.’ (2 Corintionan 1:3, 4; Romanonan 15:4) Ademas, el a priminti cu e lo duna boso “e paz di Dios cu ta surpasa tur comprondemento.”—Filipensenan 4:6, 7, 13.

LOKE BO POR HACI:

• Pidi Jehova yuda bo pa bo keda trankil y no perde cabes

• Analisa e opcionnan cu boso tin anto dicidi cua di nan ta mas mihor pa boso

2 CUIDA BO MES Y BO FAMIA

LOKE BIJBEL TA BISA: “Curason di e hende prudente ta adkiri conocemento, y horea di e hende sabi ta busca conocemento.” (Proverbionan 18:15) Purba di haya tur informacion cu por yuda boso enfrenta e situacion. Saca afo kico ta necesidad di cada miembro di famia. Papia cu nan y scucha nan.—Proverbionan 20:5.

Kico si un ser keri di boso muri? No tene miedo di expresa boso emocionnan. Corda cu hasta Hesus a yega di yora. (Juan 11:35; Eclesiastes 3:4) Ta importante tambe pa boso drumi y sosega suficiente. (Eclesiastes 4:6) Esey lo yuda boso enfrenta e situacion mas mihor.

LOKE BO POR HACI:

• Zorg pa bo tin e custumber di comunica regularmente cu bo famia. E ora ey, nan lo sinti nan comodo pa papia cu bo si un problema presenta

• Papia cu hende cu a yega di pasa den un situacion similar

3 BUSCA E YUDANSA CU BO TIN MESTER

LOKE BIJBEL TA BISA: “Un berdadero compañero ta stima na tur tempo, y ta un ruman cu a nace pa ora tin angustia.” (Proverbionan 17:17, NW) Sin duda, bo amigonan kier yuda, pero kisas nan no sa kico pa haci. Laga nan sa kico bo tin mester. (Proverbionan 12:25) Ademas, busca yudansa con pa aplica principionan di Bijbel cerca hende cu ta compronde Bijbel. E consehonan for di Bijbel cu nan por duna bo lo yuda bo.—Santiago 5:14.

Si bo tin contacto regularmente cu hende cu tin berdadero fe den Dios y cu ta confia den su promesanan, lo bo haya e sosten cu bo tin mester. Anto si bo yuda hende cu tin mester di animacion, bo mes lo haya consuelo. Papia cu nan tocante bo fe den Jehova y den su promesanan. Uza bo tempo pa yuda hende den necesidad y no aleha bo mes for di hende cu ta stima bo y cu kier bo bon.—Proverbionan 18:1; 1 Corintionan 15:58.

LOKE BO POR HACI:

• Papia cu un bon amigo y lag’e yuda bo

• Sea specifico y honesto tocante bo necesidadnan