LES 03
Bo Por Confia Loke Bijbel Ta Bisa?
Den Bijbel, nos ta haya varios promesa y hopi conseho. Kisas bo ta masha curioso pa sa loke Bijbel ta siña, pero na mes momento bo ta duda si loke Bijbel ta bisa ta berdad. Kisas bo ta puntra bo mes: Como cu Bijbel ta un buki asina bieu, mi por confia su promesanan y su consehonan? Di berdad mi por kere cu loke Bijbel ta bisa ta practico den nos tempo? Di berdad mi por confia loke Bijbel ta bisa tocante futuro? Miyones di hende ta kere cu si. Nos kier anima bo pa investiga esey pa bo mes.
1. E sucesonan cu Bijbel ta papia di dje a tuma luga di berdad?
Bijbel ta bisa cu su palabranan “ta berdad y exacto.” (Eclesiastes 12:10) E sucesonan cu Bijbel ta conta di dje a sosode di berdad. Ademas, e relatonan ey ta haci mencion di hende cu realmente a existi. (Lesa Lucas 1:3; 3:1, 2.) Hopi historiador y arkeologo a confirma cu detayenan, manera fecha, hende, luga y suceso, cu Bijbel ta menciona ta exacto.
2. Dicon bo por confia loke tin den Bijbel aunke cu e ta un buki bieu?
Hopi biaha, Bijbel ta haci mencion di detaye cu hende no tabata sa di dje tempo cu Bijbel a ser skirbi. Por ehempel, Bijbel ta menciona varios cos cu cientifico a descubri den nos tempo. Tempo cu Bijbel a ser skirbi, mayoria di hende no tabata kere loke Bijbel ta bisa tocante e cosnan ey. Pero loke e cientificonan a descubri ta confirma cu loke Bijbel ta bisa ta exacto. Si, loke Bijbel ta bisa “ta confiabel, awor y pa semper.”—Salmo 111:8.
3. Dicon nos por confia loke Bijbel ta bisa tocante futuro?
Den Bijbel, tin profeciaa cu ta papia tocante “cos cu no a sosode ainda.” (Isaias 46:10) Cu exactitud, Bijbel a menciona varios suceso hopi tempo prome cu nan a tuma luga. Ademas, Bijbel a describi en detaye con situacion di mundo lo bira den nos tempo. Den e les aki, nos lo analisa algun profecia cu tin den Bijbel. Esta fascinante e manera exacto cu e profecianan aki a ser skirbi ta!
KICO MAS NOS POR SIÑA?
Laga nos analisa con Bijbel ta cuadra cu loke e cientificonan a descubri den nos tempo y laga nos analisa algun profecia impresionante cu tin den Bijbel.
4. Bijbel ta cuadra cu ciencia
Den antiguedad, mayoria di hende tabata kere cu tabatin algo ta tene mundo na su luga. Pasa e VIDEO.
Tuma nota di loke e buki di Job a bisa mas o menos 3.500 aña pasa. Lesa Job 26:7. Despues, analisa e siguiente pregunta:
Dicon loke Bijbel ta bisa aki, esta, cu “no tin nada ta carga Tera”, ta remarcabel?
Bijbel ta papia di e ciclo di awa. E ciclo di awa ta ora solo evapora awa di lama, y e awa aki ta cay bek riba Tera den forma di awasero. E awa cu cay ta bolbe bay lama. Ta mas o menos 200 aña pasa numa hende a cuminsa compronde con e ciclo di awa ta funciona. Pero tuma nota di loke Bijbel a bisa miles di aña pasa. Lesa Job 36:27, 28 y Eclesiastes 1:7. Despues, analisa e siguiente preguntanan:
Dicon e descripcionnan ey di e manera cu e ciclo di awa ta funciona ta impresionante?
E textonan cu bo a caba di lesa ta yuda bo haya mas confianza den Bijbel?
5. Bijbel a profetisa tocante suceso importante
Lesa Isaias 44:27–45:2. Despues, analisa e siguiente pregunta:
Ki detaye Bijbel a duna 200 aña prome cu caida di e stad Babilonia?
Historia ta confirma cu Rey Ciro di Persia hunto cu su ehercito a conkista e stad Babilonia na aña 539 prome cu Cristo. Nan a desvia e awanan di e riu cu tabata proteha e stad. Despues cu Ciro y su ehercito a drenta e stad via e portanan cu a keda habri, nan a conkista e stad sin cu nan mester a bringa. Awe, mas cu 2.500 aña despues, e stad Babilonia ainda ta un ruina. Awor, laga nos wak kico Bijbel a profetisa tocante esey.
Lesa Isaias 13:19, 20. Despues, analisa e siguiente pregunta:
Con e profecia aki a cumpli?
E ruinanan di e stad Babilonia na Irak
6. Bijbel a profetisa con situacion di mundo lo bira den nos tempo
Bijbel ta yama e tempo cu nos ta biba aden “e ultimo dianan.” (2 Timoteo 3:1) Tuma nota di loke Bijbel a profetisa tocante e ultimo dianan.
Lesa Mateo 24:6, 7. Despues, analisa e siguiente pregunta:
Kico Bijbel ta bisa lo pasa den e ultimo dianan?
Lesa 2 Timoteo 3:1-5. Despues, analisa e siguiente preguntanan:
Segun Bijbel, con actitud di mayoria di hende lo bira den e ultimo dianan?
Cua di e caracteristicanan aki bo ta mira den hende rond di bo?
LOKE HENDE SA BISA: “Bijbel ta un buki di cuenta y leyenda.”
Kico ta convence abo cu Bijbel ta un buki confiabel?
RESUMEN
Historia, ciencia y profecia ta mustra cu bo por confia Bijbel.
Repaso
E sucesonan cu Bijbel ta papia di dje a tuma luga di berdad?
Con Bijbel ta cuadra cu ciencia?
Bo ta kere cu Bijbel ta bisa nos loke ta bay pasa den futuro? Dicon bo ta kere esey?
MAS INFORMACION INTERESANTE
Bijbel ta exacto ora ta trata di asunto cientifico?
“Loke Ciencia A Descubri Ta Cuadra cu Bijbel?” (Articulo riba jw.org)
Kico lo sosode den “e ultimo dianan”?
“6 Profesia Bíbliko Ku Ta Kumpliendo” (E Toren di Vigilansia di 1 di juni 2011)
Wak con profecia di Bijbel tocante e Imperio Griego a cumpli.
Wak con un homber su punto di bista tocante Bijbel a cambia despues cu el a analisa profecia di Bijbel.
“Pa Ami, Dios No Tabata Existi” (E Toren di Vigilancia Num. 5 2017)
a Profecia ta mensahe di Dios tocante suceso cu lo tuma luga den futuro.