LES 10
Con e Reunionnan di Testigonan di Jehova Por Yuda Bo?
Bo a yega di asisti na un reunion di testigonan di Jehova? Si nunca bo no a yega di bay, kisas e idea di asisti pa prome bes por haci bo un poco nervioso. Podise bo ta puntra bo mes: Kico ta sosode na e reunionnan ey? Dicon nan ta importante? Dicon mi tin cu asisti na nan? Den e les aki, lo bo siña con e reunionnan por yuda bo tin un amistad mas pega cu Dios. Ademas, lo bo mira den ki otro manera e reunionnan por yuda bo.
1. Dicon testigonan di Jehova ta reuni hunto?
Un escritor di Bijbel a menciona kico ta e motibo di mas importante pa e sirbidornan di Dios reuni hunto. El a bisa: “Lo mi alaba bo meymey di e congregacion.” (Salmo 22:22) Mescos cu e sirbidornan di Dios di pasado, awe nos como testigonan di Jehova ta haya goso ora nos ta reuni hunto. Rond mundo, nos ta reuni tur siman pa adora Dios, canta alabanza p’e y haci oracion na dje. Ademas, algun biaha pa aña nos ta reuni den grupo grandi pa siña tocante Jehova y ador’e.
2. Kico lo bo siña na nos reunionnan?
Loke nos ta siña na nos reunionnan ta basa riba Dios su Palabra y nos ta haya splicacion pa compronde loke tin skirbi den dje. (Lesa Nehemias 8:8.) Ora bo bay nos reunionnan, lo bo siña tocante Jehova y su bunita cualidadnan. Segun cu bo ta sigui siña tocante e amor cu Dios tin pa bo, bo amistad cu ne lo bira mas mihor. Ademas, lo bo siña con Jehova por yuda bo tin un bida yen di satisfaccion.—Isaias 48:17, 18.
3. Ki beneficio bo por haya ora bo papia cu otro hende na reunion?
Jehova kier pa nos “presta atencion na otro pa nos por stimula otro pa mustra amor y haci bon obra, y [pa nos] no keda sin bay e reunionnan.” (Hebreonan 10:24, 25) E hendenan cu lo bo topa na reunion ta stima otro y, mescos cu bo, kier siña mas tocante Dios. Na reunion, lo bo tende discurso y comentario animante basa riba Bijbel. (Lesa Romanonan 1:11, 12.) Ademas, lo bo por cera conoci y combersa cu varios hende cu ta feliz a pesar di nan problemanan. Esaki ta djis algun di e motibonan pakico Jehova kier pa nos reuni regularmente cu otro.
KICO MAS NOS POR SIÑA?
Laga nos wak kico ta tuma luga na e reunionnan di testigonan di Jehova y wak dicon ta importante pa bo haci esfuerso pa bay e reunionnan aki.
4. Reunion di testigonan di Jehova
Den prome siglo, regularmente e cristiannan tabata reuni hunto pa adora Jehova. (Romanonan 16:3-5) Lesa Colosensenan 3:16. Despues, analisa e siguiente pregunta:
Con e cristiannan di prome siglo tabata adora Jehova?
Awe, testigonan di Jehova tambe ta reuni regularmente hunto. Pa wak kico ta sosode na un reunion, pasa e VIDEO. Despues, wak e plachi cu ta mustra kico ta pasa na reunion y analisa e siguiente preguntanan:
Ki similaridad bo ta mira entre loke ta sosode na un Salon di Reino y loke bo a lesa na Colosensenan 3:16?
Bo a mira algo den e video of riba e plachi cu bo a gusta di nos reunionnan?
Lesa 2 Corintionan 9:7. Despues, analisa e siguiente pregunta:
Dicon e reunionnan di testigonan di Jehova ta gratis?
Wak hunto cu e persona cu ta studia bo kico lo ser trata na e siguiente reunion.
Cua parti di e reunion bo ta pensa lo yuda bo of interesa bo mas?
Bo tabata sa?
Riba jw.org, bo por haya sa na unda y ki ora e reunionnan ta tuma luga rond mundo.
Na nos reunionnan tin discurso, demostracion y video. Nos reunionnan ta cuminsa y caba cu cantica y oracion
Durante algun parti di e reunion, esnan presente por duna comentario
Tur hende ta bonbini. Pues, famia, hende soltero, hende di edad y mucha por asisti na e reunionnan
Nos reunionnan ta gratis. Testigonan di Jehova no ta cobra pa entrada ni ta pasa collect
5. Nos mester haci esfuerso pa bay reunion
Tuma por ehempel Hesus su famia. Tur aña, nan mester a haci un biahe di Nazaret pa Jerusalem pa bay tempel. Pa nan por a yega ey, nan mester a cana mas o menos tres dia y pasa door di tereno cu tin hopi sero. Lesa Lucas 2:39-42. Despues, analisa e siguiente preguntanan:
Bo ta kere cu e famia di Hesus mester a haci hopi esfuerso pa yega Jerusalem?
Den bo caso, kico ta algun cos cu lo por stroba bo di asisti na reunion y kico bo por haci pa e cosnan aki no stroba bo?
Bo ta kere cu ta bale la pena pa bo haci esfuerso pa bay reunion? Dicon bo ta bisa esey?
Bijbel ta bisa cu ta masha importante pa nos reuni hunto pa adora Jehova. Lesa Hebreonan 10:24, 25. Despues, analisa e siguiente pregunta:
Dicon nos mester tin e custumber di bay reunion?
LOKE HENDE SA BISA: “Bo no mester reuni cu otro hende pa adora Dios. Si bo lesa Bijbel na cas mes ta bon.”
Ki texto of ehempel di Bijbel ta mustra kico ta Jehova su punto di bista tocante e asunto aki?
RESUMEN
Ora bo bay reunion, lo bo siña mas tocante Jehova, bo amistad cu ne lo bira mas mihor y lo bo ador’e hunto cu otro hende.
Repaso
Dicon Jehova ta anima nos pa reuni hunto pa ador’e?
Kico ta algun cos cu lo bo siña na e reunionnan di testigonan di Jehova?
Den ki otro manera bo ta kere e reunionnan por yuda bo?
MAS INFORMACION INTERESANTE
Kico si bo ta sinti bo nervioso pa bay reunion? Wak con un homber cu na prome instante tabata nervioso pa asisti na reunion a cuminsa gusta e reunionnan.
Wak dicon un hoben ta gusta e reunionnan y wak kico el a haci pa e por a sigui bay reunion.
Wak kico algun hende ta pensa di e reunionnan.
“Dicon Ta Bon pa Bay Reunion di Testigonan di Jehova?” (articulo riba jw.org)
Wak con un homber cu tabata forma parti di un gang violento a cambia su bida despues cu el a asisti na un reunion di testigonan di Jehova.
“Semper Mi Tabata Cana Arma” (E Toren di Vigilancia di 1 di juli 2014)