LES 20
Con e Congregacion Cristian Ta Organisa?
Jehova ta un Dios di ordo. (1 Corintionan 14:33) Pues, no ta nada straño anto cu Jehova su pueblo tambe ta organisa. Con e congregacion cristian ta organisa? Kico cada un di nos por haci pa cos bay bon den congregacion?
1. Ken ta cabes di e congregacion?
“Cristo ta cabes di e congregacion.” (Efesionan 5:23) For di cielo, Hesus ta guia e actividadnan di e pueblo di Jehova rond mundo. Hesus a nombra “e esclavo fiel y prudente”, esta, Cuerpo Gobernante, cu ta un grupo chikito di anciano experencia. (Lesa Mateo 24:45-47.) Mescos cu e ancianonan y e apostelnan di prome siglo na Jerusalem, awe Cuerpo Gobernante ta guia e congregacionnan rond mundo. (Echonan 15:2) Pero, e ruman hombernan aki no ta lider di nos organisacion. Nan ta busca Jehova su guia den Bijbel pa nan haya sa kico Jehova kier pa nan haci y di buena gana nan ta sigui e guia di Hesus.
2. Ken e ancianonan ta y kico ta nan trabou?
E ancianonan ta rumannan homber den e congregacion cristian cu ta sirbiendo Jehova fielmente pa hopi aña. Nan ta uza Bijbel pa siña e pueblo di Jehova y ta yuda y anima nan. Nan no ta ser paga pa nan trabou. Mas bien, nan ta sirbi “di buena gana; no pa amor pa ganashi deshonesto, sino cu entusiasmo.” (1 Pedro 5:1, 2) Sirbidor ministerial ta ruman homber den e congregacion cu ta yuda e ancianonan. Cu tempo, nan tambe por cualifica pa bira anciano.
Cuerpo Gobernante ta nombra algun anciano como superintendente di circuito. E superintendentenan ey ta bishita diferente congregacion pa guia y fortalece e rumannan. Ademas, nan ta uza e rekisitonan cu tin den Bijbel pa determina si un ruman homber por bira un sirbidor ministerial of anciano.—1 Timoteo 3:1-10, 12; Tito 1:5-9.
3. Ki responsabilidad cada testigo di Jehova tin?
Tur hende den e congregacion ta “alaba Jehova su nomber.” Nan ta haci esey ora nan ta participa na reunion di congregacion y ora nan ta predica segun nan circunstancia.—Lesa Salmo 148:12, 13.
KICO MAS NOS POR SIÑA?
Laga nos wak ki tipo di lider Hesus ta y con e ancianonan ta imit’e. Ademas, wak con nos por obedece Hesus y traha hunto cu e ancianonan.
4. Hesus ta un lider suave y bondadoso
Hesus ta duna nos un bunita invitacion. Lesa Mateo 11:28-30. Despues, analisa e siguiente pregunta:
Ki tipo di lider Hesus ta, y con hende ta sinti nan mes bou di su guia?
Con e ancianonan ta sigui Hesus su ehempel? Pasa e VIDEO.
Bijbel ta mustra bon cla con e ancianonan mester haci nan trabou.
Lesa Isaias 32:2 y 1 Pedro 5:1-3. Despues, analisa e siguiente preguntanan:
Mescos cu Hesus, e ancianonan ta haci esfuerso pa trata nan rumannan cu bondad. Con bo ta haya esey?
Den ki manera mas e ancianonan ta imita Hesus?
5. E ancianonan ta siña nan rumannan mediante nan ehempel
Con Hesus kier pa e ancianonan mira nan trabou? Pasa e VIDEO.
Hesus a duna instruccion na e rumannan cu tin cu dirigi e congregacion. Lesa Mateo 23:8-12. Despues, analisa e siguiente preguntanan:
Con Bijbel ta bisa cu e ancianonan mester ta? Bo ta kere cu e pastoornan y otro lidernan religioso ta cumpli cu loke Bijbel ta bisa?
E ancianonan ta mantene un bon amistad cu Jehova, y nan ta yuda nan famianan pa haci mescos
E ancianonan ta mustra interes den tur hende den congregacion
E ancianonan ta participa regularmente den e trabou di predica
E ancianonan ta maestro. Nan ta yuda cu limpieza y cu otro tarea tambe
6. Ta importante pa apoya e ancianonan
Bijbel ta bisa dicon ta importante pa nos sigui guia di e ancianonan. Lesa Hebreonan 13:17. Despues, analisa e siguiente preguntanan:
Dicon Bijbel ta bisa cu nos mester ta dispuesto pa obedece y ta sumiso na e rumannan cu ta dirigi nos? Kico bo ta pensa tocante esey?
Lesa Lucas 16:10. Despues, analisa e siguiente pregunta:
Dicon ta importante pa nos sigui guia di e ancianonan, hasta ora nos ta pensa cu ta trata di algo cu no ta dje importante ey?
LOKE HENDE SA BISA: “No ta necesario pa pertenece na un organisacion religioso.”
Dicon bo ta pensa cu ta bon pa adora Dios hunto den su organisacion?
RESUMEN
Hesus ta cabes di e congregacion. Di buena gana nos ta traha hunto cu e ancianonan cu ta sigui guia di Hesus pasobra nan ta cuida nos y ta siña nos mediante nan ehempel.
Repaso
Ken ta cabes di e congregacion?
Con e ancianonan ta yuda e congregacion?
Ki responsabilidad cada sirbidor di Jehova tin?
MAS INFORMACION INTERESANTE
Wak dicon nos por bisa cu Cuerpo Gobernante y e otro ancianonan ta hopi interesa den nan rumannan cristian.
Fortalesiendo Nos Rumannan Ku Tabata Pasa Persekushon (4:22)
Wak ki trabou e superintendentenan di circuito ta haci.
E Bida di un Superintendente di Sirkuito den Teritorio Aislá (4:51)
Wak ki rol hende muher tin den congregacion.
Wak con e ancianonan ta haci esfuerso pa anima nan rumannan.