LES 38
Mustra Aprecio pa Bida: Un Regalo di Dios
Bida por ta masha dushi. Hasta ora nos tin problema, nos por sigui disfruta di varios cos den bida. Si, bida ta un regalo di Dios. Con nos por mustra cu nos ta aprecia bida? Anto kico ta e motibo di mas importante pa haci esey?
1. Dicon nos mester aprecia bida?
Nos mester aprecia bida pasobra e ta un regalo di nos Tata amoroso, Jehova. Jehova ta “e fuente di bida” pasobra el a crea tur ser bibo. (Salmo 36:9) “E ta duna tur hende bida, rosea y tur cos.” (Echonan 17:25, 28) Jehova ta duna nos tur loke nos tin mester pa keda na bida. Pero esey no ta tur cos. E ta duna nos un variedad di e cosnan ey pa asina nos por disfruta di bida.—Lesa Echonan 14:17.
2. Con nos por mustra Jehova cu nos ta aprecia bida?
For di ora bo mama a sali na estado di bo, Jehova tabata interesa den bo. David, un di Dios su sirbidornan, a bisa Dios bou di inspiracion: “Bo wowonan a mira mi ora cu mi tabata den bariga di mi mama.” (Salmo 139:16) Bo bida ta precioso pa Jehova. (Lesa Mateo 10:29-31.) Jehova lo bira hopi tristo si un hende deliberadamente kita bida di un persona of hasta su mes bida.a (Exodo 20:13) Nos lo haci Jehova tristo tambe si nos pone nos bida na peliger innecesariamente of si nos no haci esfuerso pa proteha bida di otro hende. Ora nos ta cuida nos mes y ta respeta bida di otro hende, nos ta mustra cu nos ta aprecia bida.
KICO MAS NOS POR SIÑA?
Laga nos wak algun manera cu bo por mustra cu bo ta aprecia bida, cu ta un regalo di Dios.
3. Cuida bo salud
Como cristian, nos a priminti Jehova cu semper nos lo haci su boluntad y cu nos lo uza henter nos bida pa sirbie. Ta comosifuera nos ta ofrece nos curpa como un sacrificio na Dios. Lesa Romanonan 12:1, 2. Despues, analisa e siguiente preguntanan:
Kico mester motiva bo pa cuida bo salud?
Con ta algun manera cu bo por haci esey?
4. Proteha bo bida y bida di otro hende
Bijbel ta anima nos pa evita cualkier cos cu por pone nos bida of bida di otro hende na peliger. Pasa e VIDEO pa haya sa algun cos cu bo por haci pa proteha bida di hende.
Proverbionan 22:3 ta bisa: “Un hende sabi ta mira peliger, y e ta evit’e, pero un hende imprudente no ta evita peliger, y e ta sufri consecuencia.” Awor, analisa con abo y otro hende por ta safe ...
na cas.
na trabou.
ora di haci deporte.
ora abo ta chauffeur di un vehiculo of ora bo ta pasahero den cualkier vehiculo.
5. Respeta bida di un yiu cu no a nace ainda
Na un manera poetico, David a splica cu Jehova ta interesa den tur loke ta pasa cu un yiu for di ora e ta den bariga di su mama. Lesa Salmo 139:13-17. Despues, analisa e siguiente pregunta:
Den bista di Jehova, bida ta cuminsa ora un baby nace of ora un mama sali na estado?
E leynan cu Jehova a duna e nacion di Israel a proteha tanto un muher cu ta na estado como su yiu cu no a nace ainda. Lesa Exodo 21:22, 23.b Despues, analisa e siguiente preguntanan:
Kico Jehova a pensa di un persona cu accidentalmente a pone fin na bida di un yiu cu no a nace ainda?
Con lo e sinti si un persona haci esey intencionalmente?c
Kico abo ta pensa di Dios su punto di bista?
Hasta un hende muher cu ta consciente di e balor di bida por sinti cu abortus ta su unico opcion. Lesa Isaias 41:10. Despues, analisa e siguiente preguntanan:
Si un hende muher ta sintie presiona pa comete abortus, cerca ken e mester busca yudansa? Dicon?
LOKE HENDE SA BISA: “Un hende muher tin derecho di comete abortus pasobra ta su curpa.”
Kico ta convence bo cu Jehova ta balora bida di tanto un hende muher na estado como bida di un yiu cu no a nace ainda?
RESUMEN
Bijbel ta bisa cu nos mester stima, respeta y proteha nos mes bida y bida di otro hende, pasobra bida ta un regalo di Jehova.
Repaso
Dicon bida di hende ta precioso pa Jehova?
Con Jehova ta sinti ora un hende deliberadamente pone fin na su mes bida of na bida di un otro persona?
Bo ta aprecia bida? Dicon?
MAS INFORMACION INTERESANTE
Con nos por gradici Jehova pa e echo cu nos ta na bida?
Wak contesta riba e pregunta “Dios ta pordona un hende muher cu a comete abortus?”
“Kico Bijbel Ta Bisa Tocante Abortus?” (articulo riba jw.org)
Wak con Dios su punto di bista di bida lo yuda nos scoge recreo cu no ta pone nos bida na peliger.
“Bo Mester Risca Bo Bida cu ‘Deportenan Extremo’?” (Spièrta! di 8 di october 2000)
Con Bijbel por yuda un hende cu kier comete suicidio?
“Mi No Kier Biba Mas—Bijbel Por Yuda Mi Stop di Pensa di Comete Suicidio?” (articulo riba jw.org)
a Jehova ta masha interesa den hende cu ta sinti nan kibra. (Salmo 34:18) E ta compronde e dolor emocional cu por pone un hende haya gana di muri, y e kier yuda nan. Pa wak con Jehova por yuda un persona cu tin e sintimentonan ey, lesa e articulo “Mi No Kier Biba Mas—Bijbel Por Yuda Mi Stop di Pensa di Comete Suicidio?” cu ta ser menciona den e seccion Mas Informacion Interesante di e les aki.
b Exodo 21:22, 23 (NW): “Si dos homber ta bringa cu otro y nan herida un muher na estado y e muher duna luz prematuro pero e muher cu e baby keda na bida, e homber culpabel mester paga e compensacion cu e casa di e muher ta exigi. E mester paga di acuerdo cu loke e huesnan dicidi. Pero si un di nan muri, e ora ey mester duna bida pa bida.”
c Hende cu a yega di comete abortus no mester laga sintimento di culpa caba cu nan, pasobra Jehova ta cla pa pordona nan. Pa mas informacion, wak e articulo “Kico Bijbel Ta Bisa Tocante Abortus?” cu ta ser menciona den e seccion Mas Informacion Interesante di e les aki.