LES 44
Tur Celebracion y Dia di Fiesta Ta Bon den Bista di Dios?
Jehova kier pa nos disfruta di bida y hasta pa nos celebra cierto ocasion. Pero Jehova ta haya tur celebracion y dia di fiesta bon? Con nos por demostra cu nos ta stima Jehova ora ta trata di celebracion y dia di fiesta?
1. Dicon hopi celebracion y dia di fiesta no ta agrada Jehova?
Kisas lo bo keda sorprendi pa sa cu hopi celebracion y dia di fiesta tin origen pagano of ta basa riba siñansa cu no ta cuadra cu Bijbel. E celebracionnan ey por tin di haber cu religion falso, cu spiritismo of cu e idea cu alma ta sigui biba despues cu un persona muri. Tin algun otro celebracion cu tin di haber cu supersticion y “suerte.” (Isaias 65:11) Jehova ta spierta su sirbidornan: “Separa boso ... y stop di mishi cu loke ta impuro.”—2 Corintionan 6:17.a
2. Kico Jehova ta pensa di dia di fiesta cu ta duna demasiado honor na hende?
Jehova ta spierta nos pa nos no “confia den hende.” (Lesa Jeremias 17:5.) Tin dia di fiesta ta duna honor na gobernante of na soldaat. Tin otro dia di fiesta den cua hende ta celebra independencia of simbolo nacional, manera bandera. (1 Juan 5:21) Anto tin dia di fiesta cu ta honra movementonan politico of social. Con Jehova lo sinti si nos duna demasiado honor na un hende of organisacion, specialmente si nan ta promove idea cu ta bay contra Su proposito?
3. Ki comportacion ta haci un celebracion inaceptabel?
Bijbel ta condena “buracheria, paranda, [y] fiestanan di bebemento.” (1 Pedro 4:3) Na algun celebracion, hende ta perde dominio propio y ta haci cos inmoral. Pa nos por keda amigo di Jehova, nos mester keda leu di tur e practicanan impuro ey.
KICO MAS NOS POR SIÑA?
Haya sa con bo por haci Jehova contento ora bo ta tuma bon decision encuanto dia di fiesta of celebracion.
4. No participa na celebracion cu no ta agrada Jehova
Lesa Efesionan 5:10. Despues, analisa e siguiente preguntanan:
Kico nos tin cu haci sigur di dje prome cu nos scoge pa participa na un celebracion?
Kico hopi hende ta celebra caminda bo ta biba?
Bo ta kere cu e dianan di fiesta ey ta agrada Jehova?
Por ehempel, bo a yega di puntra bo mes kico Jehova ta pensa tocante celebracion di hacimento di aña? Bijbel no ta menciona ningun sirbidor di Jehova cu a celebra nan hacimento di aña. Loke si Bijbel ta menciona ta dos hacimento di aña di hende cu no tabata sirbi Jehova. Lesa Genesis 40:20-22 y Mateo 14:6-10. Despues, analisa e siguiente preguntanan:
Kico a sosode na tur dos fiesta di hacimento di aña?
Despues cu bo a caba di lesa e dos relatonan aki, kico bo ta kere cu Jehova ta pensa tocante celebracion di hacimento di aña?
Kisas bo ta puntra bo mes: Di berdad Jehova ta worry si mi participa na celebracion di hacimento di aña of un otro celebracion cu Bijbel no ta apoya? Lesa Exodo 32:1-8. Despues, pasa e VIDEO y analisa e siguiente preguntanan:
Dicon nos mester haci sigur di loke ta agrada Jehova?
Con nos por haci esey?
Con nos por sa si Dios no ta haya un celebracion bon?
E celebracion ta basa riba siñansa cu no ta di acuerdo cu Bijbel? Pa bo por haya sa esey, bo tin cu investiga origen di e dia di fiesta.
E celebracion ta duna demasiado honor na hende, organisacion of simbolo nacional di un pais? Nos kier duna tur honor na Jehova y confia cu e por resolve tur e problemanan cu tin na mundo.
E custumber- y practicanan mara na e celebracion aki ta bay contra loke Bijbel ta bisa? Nos mester keda moralmente limpi.
5. Yuda otro hende compronde y respeta bo creencianan
Tin biaha, por ta dificil pa bisa no ora hende purba di presiona bo pa celebra algo cu Jehova no ta haya bon. Cu pasenshi y tacto, bo por splica nan dicon bo no ta participa na cierto celebracion. Pa wak un ehempel con bo por haci esaki, pasa e VIDEO.
Lesa Mateo 7:12. Despues, analisa e siguiente preguntanan:
Segun e texto aki, ta bon pa bo bisa bo famianan cu no tin e mesun creencianan cu bo pa no celebra un dia di fiesta?
Con bo por mustra bo famia cu bo ta stima nan y balora nan aunke bo no ta celebra hunto cu nan?
6. Jehova kier pa nos ta feliz
Jehova kier pa nos disfruta di e tempo cu nos ta pasa hunto cu nos famia- y amigonan. Lesa Eclesiastes 8:15. Despues, analisa e siguiente pregunta:
Con e texto aki ta mustra cu Jehova kier pa nos ta feliz?
Jehova kier pa su sirbidornan disfruta di e tempo cu nan ta pasa hunto. Pasa e VIDEO pa wak con esaki ta bisto na nos congresonan internacional.
Lesa Galationan 6:10. Despues, analisa e siguiente preguntanan:
Nos mester celebra dia di fiesta pa nos por haci algo bon pa hende?
Kico lo haci bo mas feliz: duna un hende regalo riba un dia di fiesta pasobra bo ta sinti bo obliga pa haci esey of duna un hende algo pasobra bo mes kier haci esey?
Hopi Testigo sa organisa actividad leuk pa nan yiunan y sa hasta duna nan yiunan regalo ora nan no ta spera esey. Si bo tin yiu, kico ta algun cos leuk cu bo por haci pa nan?
LOKE HENDE SA BISA: “No ta importa ki origen un fiesta tin. Loke ta importa ta cu bo ta pasa tempo cu bo famia- y amigonan.”
Kico lo bo contesta?
RESUMEN
Jehova kier pa nos disfruta ora nos ta pasa tempo cu nos famia- y amigonan. Pero, e no kier pa nos participa na celebracion y dia di fiesta cu e no ta haya bon.
Repaso
Ki pregunta nos por haci nos mes pa wak si Jehova ta haya un celebracion bon of no?
Con nos por splica nos famia- y amigonan cu nos no ta celebra dia di fiesta?
Con bo por sa cu Jehova kier pa nos ta feliz y disfruta di bida?
MAS INFORMACION INTERESANTE
Wak algun dia di fiesta cu cristian no ta celebra.
“Dicon Testigonan di Jehova No Ta Celebra Cierto Dia di Fiesta?” (articulo riba jw.org)
Wak cuater motibo cu ta indica cu celebracion di hacimento di aña no ta agrada Dios.
“Dicon Testigonan di Jehova No Ta Celebra Cumpleaños?” (articulo riba jw.org)
Wak con mucha cu ta stima Jehova por haci Jehova contento durante dia di fiesta.
Miyones di cristian a scoge pa no celebra Pasco. Nan ta sinti cu nan ta perde algo?
“Nan A Haya Algo Mihor cu Pasco” (Atalaya di 1 di december 2012)