LES 49
Con Bo Por Tin un Bida di Famia Feliz?—Parti 1
Un pareha recien casa ta desea pa e felicidad cu nan a sinti dia nan a casa dura henter nan bida. Anto esey sigur ta posibel. Pareha cristian cu tin hopi tempo casa y cu ta haci esfuerso pa sigui conseho di Bijbel den nan bida sa esey.
1. Ki conseho Bijbel tin pa esposo?
Jehova a haci e esposo cabes di famia. Esey kiermen cu Jehova a dun’e e responsabilidad pa guia su famia. (Lesa Efesionan 5:23.) Jehova kier pa un esposo tuma decision cu lo beneficia su famia. Bijbel ta bisa e esposonan: “Sigui stima boso esposa.” (Efesionan 5:25) Kico esey ta encera? Un esposo cu ta stima su casa ta trat’e bon, tanto na cas como ora nan ta hunto cu otro hende. Un bon esposo ta haci esfuerso pa laga su casa sintie safe y feliz. Ademas, e ta percura pa e necesidadnan fisico y emocional di su esposa. (1 Timoteo 5:8) Mas importante ainda, un bon esposo ta yuda su esposa tin un bon amistad cu Jehova. (Mateo 4:4) Por ehempel, e por haci oracion cu su esposa y lesa Bijbel hunto cu ne. Ora un esposo ta cuida su casa cu amor, e esposo ta keda cu un bon amistad cu Jehova.—Lesa 1 Pedro 3:7.
2. Ki conseho Bijbel tin pa esposa?
Bijbel ta bisa cu un esposa “mester tin respet profundo pa su esposo.” (Efesionan 5:33) Kico esey ta encera? Un esposa mester pensa riba e bon cualidadnan cu su casa tin y riba e esfuerso cu su casa ta haci pa cuida e y nan yiunan. Ademas, un esposa por mustra cu e ta respeta su esposo ora e ta apoya e decisionnan cu su esposo ta tuma. Un esposa por mustra tambe cu e ta respeta su esposo ora e ta papia na un manera bondadoso cu ne y ta papia bon tocante dje cu otro hende. Un esposa mester respeta su esposo, sea cu su esposo ta sirbi Jehova of no.
3. Con un pareha por fortalece nan matrimonio?
Bijbel ta bisa tocante pareha casa: “Nan dos lo ta un carni.” (Mateo 19:5) Esey ta nifica cu nan mester evita cualkier cos cu por pone nan amor pa otro fria. Nan por haci esey ora nan ta pasa tempo regularmente cu otro y ora nan ta papia na un manera amoroso y habri cu otro tocante nan pensamentonan y nan sintimentonan. Fuera di Jehova, ningun otro persona of cos ta mas importante cu nan casa. Ademas, nan ta tene masha cuidou pa nan no cera un amistad demasiado pega cu ningun otro persona cu no ta nan casa.
KICO MAS NOS POR SIÑA?
Laga nos wak ki principio di Bijbel por yuda bo fortalece bo matrimonio.
4. Esposo, stima y cuida bo esposa
Bijbel ta bisa cu “esposonan mester stima nan esposa manera nan mes curpa.” (Efesionan 5:28, 29) Kico esey ta encera? Pasa e VIDEO. Despues, analisa e siguiente pregunta:
Con ta algun manera cu un esposo por mustra cu e ta stima y cuida su esposa?
Lesa Colosensenan 3:12. Despues, analisa e siguiente pregunta:
Con un esposo por demostra e cualidadnan cu e texto ta menciona den su matrimonio?
5. Esposa, stima y respeta bo esposo
Bijbel ta anima un esposa pa respeta su esposo, sea cu su esposo ta sirbi Jehova of no. Lesa 1 Pedro 3:1, 2. Despues, analisa e siguiente preguntanan:
Si bo casa no ta un sirbidor di Jehova, siguramente bo kier pa e cuminsa sirbi Jehova. Con bo ta pensa ta e mihor manera pa yuda bo casa: predica tur ora bay na dje of trat’e na un manera bondadoso, cariñoso y respetuoso? Dicon bo ta pensa esey?
Esposo y esposa por tuma bon decision hunto. Pero, tin biaha sa sosode cu un esposa no ta di acuerdo cu su esposo. Na momentonan asina, un esposa por bisa su casa na un manera trankil y respetuoso kico e ta pensa, pero e mester corda cu Jehova a duna e homber e responsabilidad pa dicidi kico ta mihor pa nan famia. Un esposa mester haci su best pa apoya e decision cu su esposo tuma. Ora e haci esey, henter e famia lo ta feliz. Lesa 1 Pedro 3:3-5. Despues, analisa e siguiente pregunta:
Kico Jehova ta pensa ora e mira un esposa ta trata su esposo cu respet?
6. Boso por resolve problema cu presenta den boso matrimonio
Ningun matrimonio no ta perfecto. Pesey, pareha casa mester traha hunto pa resolve problema cu presenta den nan matrimonio. Pasa e VIDEO. Despues, analisa e siguiente preguntanan:
Kico ta mustra cu e pareha den e video tabata alehando for di otro?
Kico nan a haci pa fortalece nan matrimonio?
Lesa 1 Corintionan 10:24 y Colosensenan 3:13. Despues di lesa cada texto, analisa e siguiente pregunta:
Ora un pareha sigui e conseho aki, con esey por fortalece nan matrimonio?
Bijbel ta bisa cu nos mester mustra honor na otro. Ora nos ta mustra honor na un hende, nos ta trat’e na un manera bondadoso y cu respet. Lesa Romanonan 12:10. Despues, analisa e siguiente preguntanan:
Un esposo of esposa mester warda pa su casa mustr’e honor prome? Dicon si, of dicon no?
LOKE HENDE SA BISA: “Ami cu mi casa no ta dje pega ey mas cu otro.”
Con bo por splica e persona cu Bijbel por yuda nan?
RESUMEN
Un esposo y un esposa por ta feliz ora nan ta stima otro, respeta otro y sigui principio di Bijbel.
Repaso
Kico un esposo mester haci pa su matrimonio por ta feliz?
Kico un esposa mester haci pa su matrimonio por ta feliz?
Si bo ta casa, ki principio di Bijbel por yuda fortalece boso matrimonio?
MAS INFORMACION INTERESANTE
Wak sugerencia practico cu por yuda bo tin un bida di famia feliz.
Wak un video musical cu ta mustra e bendicionnan cu pareha casa ta ricibi ora nan ta aplica conseho di Dios den nan matrimonio.
Un esposa mester ta sumiso na su esposo como cabes di famia. Wak kico esey ta encera.
“Esposanan, Pakico Ser Sumiso na Boso Esposo?” (E Toren di Vigilansia di 1 di mei 2010)
Kico a yuda un pareha trata cu problema serio, incluso divorcio?