Bendicionnan di e Bon Nobo

“SEÑOR a ungi mi pa hiba bon nobo na esnan aflihi; El a manda mi pa cura hende di curason kibra, . . . pa consola tur esnan cu ta yora.”—ISAIAS 61:1, 2.

1, 2. (a) Kico Hesus a revela tocante su mes, y con? (b) Ki bendicionnan e bon noticia cu Hesus a anuncia a trece?

RIBA un sabat na comienso di su ministerio, Hesus tawata den e sinagoga na Nazaret. Segun e registro, “nan a dun’E e buki di profeta Isaias. Y El a habri e buki y a haya e luga caminda tawata para skirbi: ‘E spirito di SEÑOR ta riba Mi, pasobra El a ungi mi pa predica evangelio.’” Hesus a sigui lesa e contexto profetico. Despues El a cai sinta y a bisa: “Awe e Scritura aki a keda cumpli boso dilanti.”—Lucas 4:16-21.

² Di e manera aki, Hesus a identifica su mes como e evangelisado profetisa, esun cu ta duna bon noticia y consuelo. (Mateo 4:23) Y loke Hesus tawatin di bisa su oyentenan realmente tawata bon noticia! El a informa nan: “Ami ta e lus di mundo; esun cu sigui Mi lo no cana den scuridad, ma lo tin e lus di bida.” (Juan 8:12) Tambe el a bisa: “Si boso keda den Mi palabra, boso ta berdaderamente disipelnan di Mi, y boso lo conoce e berdad, y e berdad lo haci boso liber.” (Juan 8:31, 32) Hesus tawatin “palabranan di bida eterno.” (Juan 6:68, 69) Si, lus, bida y libertad siguramente ta bendicionnan cu nos tin cu aprecia!

3. Ki bon noticia e disipelnan di Hesus a predica?

³ Despues di Pentecoste di aña 33 Era Comun, e disipelnan a sigui cu Hesus su trabou di evangelisa. Nan a predica ‘e evangelio di e reino’ tanto na e israelitanan como na hende di e nacionnan. (Mateo 24:14; Echonan 15:7; Romanonan 1:16) Esnan cu a reacciona di un manera faborabel a siña conoce Yehova Dios. Nan a haya liberacion for di sclabitud religioso y a bira parti di un nacion spiritual nobo, “e Israel di Dios,” kende su miembronan tin e prospecto di goberna pa semper den shelo cu nan Señor, Hesucristo. (Galationan 5:1; 6:16; Efesionan 3:5-7; Colosencenan 1:4, 5; Revelacion 22:5) Eseinan sigur tawata bendicionnan rico!

Evangelisacion den Nos Tempo

4. Den ki manera e encargo di predica e bon nobo ta ser realisa den nos tempo?

⁴ Awe, Cristiannan ungi, apoya pa un “multitud grandi” creciente di ‘otro carne’, ta sigui cumpli cu e encargo profetico original cu Hesus a duna. (Revelacion 7:9; Juan 10:16) E resultado ta cu e bon nobo ta ser predica na un escala nunca bisto. Den 235 pais y teritorio, Testigonan di Yehova a sali pa “hiba bon nobo na esnan aflihi [manso, NW] . . . , pa cura hende di curason kibra, pa proclama libertad na catibonan, y libertad na presonan, pa proclama e aña agradabel di SEÑOR [e aña di bon boluntad, NW], y e dia di vengansa di nos Dios; pa consola tur esnan cu ta yora.” (Isaias 61:1, 2) Pues, e obra Cristian di evangelisa ta sigui trece bendicion pa hopi hende y berdadero consuelo pa “esnan cu ta den cualkier afliccion.”—2 Corintionan 1:3, 4.

5. Relaciona cu e predicacion di e bon nobo, con Testigonan di Yehova ta diferente for di e iglesianan di Cristiandad?

⁵ Ta berdad cu e iglesianan di Cristiandad ta evangelisa na varios manera. Hopi ta manda misionero pa comberti hende den otro pais. Por ehempel, e revista The Orthodox Christian Mission Center Magazine ta duna informe riba e actividad di misioneronan Ortodox na Madagascar, Sur Africa, Tanzania y Zimbabwe. Pero mayoria di miembro di e Iglesia Ortodox y tambe di otro iglesianan di Cristiandad no ta haci e trabou ei. Contrario na esei, cada Testigo di Yehova dedica ta haci esfuerso pa evangelisa. Nan ta comprende cu si nan anuncia e bon nobo, esei ta duna prueba di nan fe. Pablo a bisa: “Cu curason hende ta eherce fe pa husticia, pero cu boca hende ta haci declaracion publico pa salbacion.” Fe cu no ta motiva hende pa actua realmente ta morto.—Romanonan 10:10, NW; Santiago 2:17.

Bon Noticia Cu Ta Trece Bendicionnan Eterno

6. Ki bon noticia ta ser predica den nos tempo?

⁶ Testigonan di Yehova ta predica e miho noticia cu ta existi. Nan ta habri nan Bijbel y ta mustra esnan interesa cu Hesus a sacrifica su bida pa duna humanidad e medio pa acerca Dios, pa pordon di pica y e speransa di biba pa semper. (Juan 3:16; 2 Corintionan 5:18, 19) Nan ta anuncia cu e Reino di Dios a ser estableci den shelo bou di e Rei ungi, Hesucristo. Y tambe nan ta anuncia cu pronto e Reino di Dios lo caba cu tur maldad riba mundo y supervisa e restauracion di Paradijs. (Revelacion 11:15; 21:3, 4) Na cumplimentu di e profecia di Isaias, nan ta informa nan prohimo cu awor nos ta biba den “e aña agradabel di SEÑOR” ora cu ainda hende por reacciona riba e bon nobo. Tambe nan ta spierta hende cu pronto “e dia di vengansa di nos Dios” lo bini, ora cu Yehova pone fin na malbadonan cu no repenti.—Salmo 37:9-11.

7. Ki experencia ta mustra cu Testigonan di Yehova ta uni, y dicon nan ta gosa di tal unidad?

⁷ Den un mundo yen di tragedia y desaster, esaki ta e unico bon noticia cu beneficio eterno. Esnan cu asept’e ta bira parti di un hermandad mundial di Cristian uni cu no ta laga diferencia nacional ni di tribu ni economico, separa nan. Nan a “bisti amor, cual ta e laso perfecto di unidad.” (Colosencenan 3:14; Juan 15:12) Esaki ta loke a sosode aña pasa na un pais Africano. Riba un mainta un tiroteo a lanta e hendenan di e capital for di soño. Tawatin un intento di un golpi di estado. Pero ora e asunto a para bira un problema etnico, algun hende a critica un famia Testigo pa motibo cu nan a tuma compañeronan creyente di otro grupo etnico den nan cas. E famia a contesta: “Ta Testigo di Yehova so ta kedando den nos cas.” Loke tawata importante pa nan ta amor Cristian (duna consuelo na esnan cu tawatin mester di dje) i no diferencia etnico. Un famia di nan cu no ta Testigo a bisa: “Den tur religion hende a traiciona nan compañeronan di creencia. Ta Testigonan di Yehova so no a haci esei.” Hopi informe di incidentenan similar cu a tuma luga den paisnan destrosa pa guera civil ta mustra cu Testigonan di Yehova realmente “stima henter e asociacion di rumannan.”—1 Pedro 2:17, NW.

E Bon Nobo Ta Cambia Hende

8, 9. (a) Ki cambionan esnan cu ta acepta e bon nobo ta haci? (b) Cua experencianan ta mustra e poder di e bon nobo?

⁸ E bon nobo tin di aber cu loke Pablo a yama ‘e bida presente y esun cu ta bin.’ (1 Timoteo 4:8) E noticia aki no solamente ta ofrece un speransa maravioso y sigur pa futuro pero tambe e ta mehora “e bida presente.” Bijbel, e Palabra di Dios, ta guia cada Testigo di Yehova pa pone nan bida na harmonia cu Dios su boluntad. (Salmo 119:101) Nan ta haya un personalidad nobo segun cu nan ta cultiva cualidadnan manera husticia y lealtad.—Efesionan 4:24.

⁹ Considera e ehempel di Franco. E tawatin problema cu rabiamento. Ki ora cu e no a haya su gana, e tawata haya atake di rabia violento y kibra cos. Su esposa a studia Bijbel cu Testigonan di Yehova, anto nan ehempel Cristian pocopoco a yuda Franco mira cu e tawatin cu cambia. El a studia Bijbel cu e Testigonan y finalmente e por a manifesta pas y dominio propio, cu ta frutanan di spirito santo. (Galationan 5:22, 23) E tawata un di e 492 personanan cu a batisa na Belgica durante aña di sirbishi 2001. Considera tambe e ehempel di Alejandro. E mucha homber ei a bira asina adicto na droga cu el a cuminsa biba den un dump. Tur loke e por a haya na e dump e tawata bende pa e cumpra droga. Ora e tawatin 22 aña di edad, Testigonan di Yehova a invita Alejandro pa studia Bijbel, y el a bai di acuerdo. El a lesa Bijbel tur dia y a asisti na e reunionnan Cristian. El a drecha su bida asina lihe cu den menos cu seis luna, e por a participa den e trabou di evangelisa. E tawata un di e 10.115 personanan cu a haci esei aña pasa na Panama.

E Bon Nobo Ta un Bendicion pa e Mansonan

10. Ken ta reacciona faborablemente na e bon nobo, y con nan actitud ta cambia?

¹⁰ Isaias a profetisa cu e bon nobo lo ser predica na e mansonan. Ken e mansonan aki ta? Nan ta esnan cu e buki di Echonan ta describi como “esnan cu tawata corectamente dispuesto pa bida eterno.” (Echonan 13:48, NW) Nan ta hende humilde di tur rango social cu ta habri nan curason pa e mensahe di e berdad. E personanan ei ta siña cu haci Dios su boluntad ta trece bendicionnan cu ta mucho mas grandi cu cualkier cos material cu mundo por ofrece. (1 Juan 2:15-17) Pero, con Testigonan di Yehova ta alcansa curason di hende den nan trabou di evangelisa?

11. Segun Pablo, con e bon nobo mester ser predica?

¹¹ Wel, considera e ehempel di apostel Pablo, kende a skirbi na e Corintionan: “Ora mi a bini cerca boso, rumannan, mi no a bini cu extrabagancia di abla of di sabiduria declarando e secreto sagrado di Dios na boso. Pasobra mi a dicidi di no sa nada otro entre boso cu no ta Hesucristo, y E, claba na staca.” (1 Corintionan 2:1, 2, NW) Pablo no a purba impresiona su oyentenan cu su educacion. E no a siña nan nada otro cu no ta echonan dibino, echonan cu awe ta registra den Bijbel. Ripara tambe cu Pablo a anima su compañero evangelisado Timoteo: “Predica e palabra; sea prepara na tempo.” (2 Timoteo 4:2) Timoteo mester a predica “e palabra”, esta, Dios su mensahe. Tambe Pablo a skirbi Timoteo: “Haci tur bo esfuerso pa presenta bo mes aproba dilanti di Dios manera un trahado cu no tin motibo pa tin berguensa, cu ta parti e palabra di berdad na un manera corecto.”—2 Timoteo 2:15.

12. Con Testigonan di Yehova awe ta sigui e ehempel di Pablo y tambe loke el a bisa?

¹² Testigonan di Yehova ta sigui e ehempel cu Pablo a pone y ta haci loke el a bisa Timoteo. Nan ta reconoce e poder di e Palabra di Dios y ta haci bon uzo di dje ora nan ta trata di mustra nan prohimo e palabranan di speransa y consuelo cu ta pas cu nan situacion. (Salmo 119:52; 2 Timoteo 3:16, 17; Hebreonan 4:12) Si, nan ta haci bon uzo di publicacionnan cu ta basa riba Bijbel pa asina hende cu ta interesa por haya mas conocemento di Bijbel den nan tempo liber. Pero, semper nan ta trata di mustra hende palabranan for di e Scritura. Nan sa cu e Palabra inspira di Dios lo motiva curason di hende humilde. Y door di uz’e den e forma aki e ta fortalece nan fe tambe.

“Consola Tur Esnan Cu Ta Yora”

13. Kico a sosode na aña 2001 cu a pone cu un gran cantidad di hende tawatin mester di consuelo?

¹³ Tawatin varios desaster cu a tuma luga na aña 2001, y pa motibo di esaki hopi hende tawatin mester di consuelo. Un bon ehempel di esaki ta loke a tuma luga na Merca na september cu a caba di pasa, relaciona cu e atakenan terorista riba World Trade Center na New York y riba Pentagon cu ta keda cerca di Washington, D.C. Ki un shock e atakenan aki a causa den henter e pais ei! Meimei di tur e susesonan ei, Testigonan di Yehova ta haci esfuerso pa cumpli cu nan tarea “pa consola tur esnan cu ta yora.” Un par di experencia lo mustra con nan ta haci esaki.

14, 15. Con e Testigonan a uza textonan biblico na un manera eficas pa consola hende na dos ocasion diferente?

¹⁴ Un Testigo evangelisado di tempo completo a acerca un señora cu tawata para cant’i caminda y a puntr’e kico e ta pensa di e atakenan terorista cu a caba di sosode. E señora a cuminsa yora. E di cu e tawata sintie malo y a desea cu e por a haci algo pa yuda. E Testigo a bis’e cu Dios ta hopi interesa den cada un di nos, y el a lesa Isaias 61:1 y 2. E palabranan inspira di Dios aki a zona logico pa e señora, kende a bisa cu tur hende ta tristo. El a acepta un tratado y a pidi e Testigo pa bishit’e na su cas.

¹⁵ Dos Testigo cu tawata den e trabou di evangelisa a topa un homber cu tawata traha bou di su afdak. Nan a ofrec’e palabranan di consuelo for di e Scritura relaciona cu e tragedia cu a caba di sosode na World Trade Center. El a bai di acuerdo pa nan lesa 2 Corintionan 1:3-7, cu ta inclui e palabranan: “Consuelo . . . ta abunda door di Cristo.” E homber a keda gradicido cu su prohimo, esta cu Testigonan di Yehova tawata comparti algo cu ta consola otro hende y a bisa: “Dios bendiciona e obra maravioso cu boso ta haci.”

16, 17. Cua dos experencia ta mustra e poder cu Bijbel tin pa yuda hende cu ta tristo of perturba pa motibo di tragedia?

¹⁶ Un Testigo cu tawata rebishita hende cu a mustra interes, a topa e yiu homber di un señora cu anteriormente a mustra interes. El a splica cu e tawatin gana di sa con a bai cu su cociudadanonan despues di e tragedia cu a caba di sosode. E homber tawata asombra cu e Testigo a uza su tempo liber pa bishita hende pa wak con a bai cu nan. El a bisa cu e tawata traha basta cerca di World Trade Center ora e atake a tuma luga y a mira tur loke a sosode. Ora el a puntra dicon Dios ta permiti sufrimento, e Testigo a lesa textonan di Bijbel, inclusivo Salmo 37:39, cu ta bisa: “Salbacion di e hustonan ta bin for di SEÑOR; E ta nan fortalesa den tempo di angustia.” Bondadosamente e homber a puntra e Testigo con a bai cu ne y cu su famia, a invit’e pa e bolbe bek, y a expresa aprecio di curason pa e bishita.

¹⁷ Un otro persona entre e miles di hende tristo cu Testigonan di Yehova a consola den e dianan despues di e atakenan terorista, tawata un señora cu e Testigonan a topa ora nan tawata bishita nan prohimo. Loke a sosode a lagu’e keda den shock y el a scucha ora nan tawata lesa Salmo 72:12-14: “E lo libra esun den necesidad ora cu e sclama pa yudansa, esun aflihi tambe y esun cu no tin ningun hende pa yud’e. E lo tin compasion di e pober y di esun den necesidad, y E lo salba bida di esnan den necesidad. E lo rescata nan bida for di opresion y violencia; y nan sanger lo ta precioso den su bista.” Ki un efecto grandi e palabranan ei tawatin! E señora a pidi e Testigonan pa lesa e versiculonan atrobe y a invita nan pa bin su cas pa sigui cu e combersacion. Na final di e combersacion, nan a cuminsa un studio di Bijbel.

18. Con un Testigo a yuda su prohimo ora el a ser invita pa resa pa nan?

¹⁸ Un Testigo ta traha den un restaurant den un comunidad basta rico caminda anteriormente hende no a mustra hopi interes den e bon nobo di Reino. E atakenan terorista a dal e comunidad duro. Diabierna anochi despues di e atakenan, e manager di e restaurant a invita tur hende pa sali pafo cu bela, pa tene un rato di silencio na memoria di e victimanan. Pa mustra respet pa nan sintimentonan, e Testigo a sali pafo y a para riba acera. E manager tawata sa cu e ta un predicado Testigo di Yehova, pues despues di e rato di reflexion, el a pidie pa representa nan den oracion. E Testigo a bai di acuerdo. Den su oracion, el a menciona e tristesa cu ta reina tur caminda pero a bisa cu esnan tristo no tin nodi yora sin speransa. El a papia di e tempo ora cosnan teribel asina lo no sosode mas y a bisa cu tur hende por hala mas cerca Dios pa haya consuelo mediante conocemento exacto di Bijbel. Despues cu nan a bisa “Amen”, e manager, hunto cu mas cu 60 hende cu tawata pafo di e restaurant, a bini cerca e Testigo pa gradicie y a bras’e. E manager a menciona cu e oracion ei tawata e miho oracion cu el a yega di tende.

Un Bendicion pa e Comunidad

19. Cua experencia ta mustra cu tin hende ta reconoce e normanan halto di Testigonan di Yehova?

¹⁹ Specialmente den e tempo aki, hopi hende a comenta cu caminda tin Testigo di Yehova, comunidad ta beneficia directamente di nan yudansa. Con un pueblo cu ta promove pas, honestidad y limpiesa moral por laga di eherce un bon influencia? Den un pais di Asia Central, Testigonan a topa un pensionado di e excomision di siguridad di estado. El a bisa cu un biaha nan a dun’e e encargo pa investiga varios organisacion religioso. Ora el a investiga Testigonan di Yehova, el a keda impresiona pa nan honestidad y bon conducta. El a admira nan fe firme y e echo cu nan siñansa ta basa riba e Scritura. E homber aki a bai di acuerdo pa studia Bijbel.

20. (a) Kico e raport di aña pasa di e actividad di Testigonan di Yehova ta mustra? (b) Kico ta indica cu tin hopi mas trabou pa haci, y con nos ta mira nos privilegio di evangelisa?

²⁰ E poco experencianan di e miles cu por ser relata den e articulo aki, ta mustra claramente cu Testigonan di Yehova tawata hopi ocupa durante e aña di sirbishi 2001.a Nan a papia cu miyones di hende, nan a consola hopi hende cu tawata tristo, y nan trabou di evangelisa a ser bendiciona. Tawatin 263.431 persona cu a simbolisa nan dedicacion na Dios door di batisa. Rond mundo, e cantidad di evangelisado a aumenta cu 1,7 porciento. Y e echo cu 15.374.986 persona a asisti na e Conmemoracion anual di Hesus su morto ta indica cu tin hopi mas trabou pa haci. (1 Corintionan 11:23-26) Laga nos sigui busca esnan manso cu ta reacciona di un manera faborabel na e bon nobo. Y mientras cu Yehova su aña di bon boluntad ta sigui, laga nos sigui consola “hende di curason kibra.” Ki un trabou cu ta duna satisfaccion nos tin! Sin duda nos tur lo sigui corda e palabranan di Isaias: “Lo mi gosa grandemente den SEÑOR; mi alma lo regosiha den mi Dios.” (Isaias 61:10) Cu Yehova sigui uza nos segun cu e ta cumpli cu e palabra profetico aki: “Señor DIOS lo haci husticia y alabansa spruit dilanti di tur e nacionnan.”—Isaias 61:11.

[Nota]

Bo Ta Corda?

• Con e mansonan a ser bendiciona mediante e bon nobo cu Hesus a predica?

• Den prome siglo, ki bendicionnan esnan cu a reacciona faborablemente na e trabou di evangelisa di Hesus su disipelnan a haya?

• Den nos tempo, con esnan cu tawata dispuesto pa scucha a ser bendiciona cu e bon nobo?

• Con nos ta mira nos privilegio di evangelisa?

[Tabel na pagina 19-22]

RAPORT DI AÑA DI SIRBISHI 2002 DI TESTIGONAN DI JEHOVA MUNDIALMENTE

(Wak volumen)

[Plachi na pagina 15]

Testigonan di Yehova semper ta corda riba nan responsabilidad pa evangelisa

[Plachi na pagina 17]

Esnan cu ta reacciona faborablemente na e bon nobo ta bira parti di un hermandad mundial cu ta uni