Kico Ta Bo Principionan?

ABO ta un hende di principio? Of bo ta haya cu norma y balornan a bai un poco for di moda? Echo ta cu tur hende ta sigui un of otro principio cu e ta kere ta importante. Un diccionario Ingles ta defini principio como “regla di bon conducta.” Principionan ta influencia nos decisionnan y determina e curso di nos bida. Principionan por actua manera un compas.

Por ehempel, Hesus a urgi su disipelnan pa sigui e Regla di Oro na Mateo 7:12: “Pesei, tur loke boso kier pa hende haci pa boso, haci mescos pa nan.” Siguidonan di Confucio ta sigui e principionan di li y jen, cu tin di aber cu cualidadnan manera bondad, humildad, respet y lealtad. Asta hende cu no ta religioso tin algun prioridad of guia cu ta determina nan conducta.

Ki Tipo di Principio?

Sinembargo, nos mester corda cu principio por ta sea bon of malo. Por ehempel, den e ultimo dies pico añanan aki, mas y mas hende tin e spirito cu a ser identifica como e spirito di ‘ami prome.’ Aunke hopi hende kisas no conoce e expresion ei of ta haya cu e no ta conta pa nan, varios ta esnan cu ta bira lomba pa norma eleva di conducta y ta recori na e principio di ‘ami prome.’ Sea cu e ta ser defini asina of no, e actitud di ‘ami prome’ ta un manifestacion di egoismo, hopi bes compaña pa un materialismo sin sentido. “Ta dos principio so nos tin”, un ehecutivo di television na China a bisa. “Uno ta, satisface e demanda. E otro ta, traha placa.”

E spirito di ‘ami prome’ por actua manera un magnet. Y con un magnet ta afecta un compas? Ora nan ta banda di otro, e hangua di e compas ta bruha. Mescos tambe, e spirito di ‘ami prome’ por bruha of confundi un persona su compas moral, of regla di bon conducta, door di laga e persona kere cu ta su deseonan ta mas importante cu tur otro cos.

Lo bo keda sorprendi si bo haya sa cu e spirito di ‘ami prome’ no ta un fenomeno moderno? E fenomeno aki a cuminsa den e hofi di Eden tempo cu nos prome mayornan a bandona e norma di conducta cu nos Creador a establece. Esei a bruha nan compas moral. Como desendiente di Adam cu Eva, hende tin e mesun actitud aki. Solamente awor e yama ‘ami prome.’—Genesis 3:6-8, 12.

E actitud ei a plama notablemente specialmente durante e tempo cu profecia di Bijbel ta yama “e ultimo dianan”, marca pa “temponan trabahoso.” Hopi hende ta “stimador di nan mes.” Nada straño anto cu nos tambe ta sinti e presion pa imita e actitud di ‘ami prome.’—2 Timoteo 3:1-5.

Tal bes bo ta di acuerdo cu un hoben cu yama Olaf, kende a skirbi un sucursal di Testigonan di Yehova na Europa: “Ta masha dificil pa keda moralmente limpi, specialmente pa nos cu ta hoben. Por fabor, sigui corda nos cu nos mester pega na principionan di Bijbel.”

E punto di bista di Olaf ta refleha bon dicernimento. Principionan di Dios por yuda nos—hoben y bieu—pega na normanan halto di conducta. Tambe nan por yuda nos resisti e actitud di ‘ami prome’, sea cu e yama asina of no. Si bo kier siña mas tocante con principio di Bijbel por echt yuda bo, sea asina bon di analisa e siguiente articulo.

[Plachi na pagina 4]

Awe masha poco hende ta tene cuenta cu necesidad di otro