Bon Liderato—Ta un Reto Mundial

E homber tawata un escritor y poeta. Su curason tawata yen di speransa cu futuro lo trece cos bon pa tur hende. Un 90 aña pasa, el a imagina un luga “caminda e mente no ta sinti miedo y hende ta cana cabes na halto; caminda conocemento ta gratis; caminda barera nacional no ta parti mundo na pida pida; caminda hende ta papia berdad; [y] caminda hende door di esfuerso vigoroso ta yega mas y mas cerca di perfeccion.”

E ESCRITOR aki a expresa e speransa cu un dia su pais y tambe e resto di mundo lo bira un luga asina. Si e poeta aki, ganado di Premio Nobel, tawata na bida awe, lo e tawata hopi decepciona. Apesar di tur avance y adelanto inespera cu mundo a haci, e ta mas dividi cu nunca. Y en general hende ta mira futuro scur.

Ora nan a puntra un cunukero dicon violencia a estaya asina repentinamente entre faccionnan den su pais, el a indica loke na su opinion tawata un motibo. E di: “Ta debi na lidernan incompetente.” Historiado Jonathan Glover a expresa un punto di bista similar den su buki Humanity—A Moral History of the Twentieth Century (Humanidad—Un Historia di Moralidad di Siglo 20), bisando: “E genocidio [den e mesun pais ei] no tawata un erupcion spontaneo di odio entre tribunan, e tawata algo plania door di hende cu kier a keda na poder.”

Ora guera a start entre dos republica di loke tawata Yugoslavia, na principio di añanan ’90 di siglo 20, un reportera a skirbi: “Nos tawata biba felismente hunto pa hopi aña y awor a para bira cu nos ta mata baby di otro. Ta kico ta pasando cu nos?”

Miles di kilometer for di Europa nos ta haya India, pais natal di e poeta menciona na principio. Den un charla titula “India Por Sobrevivi Como un Solo Nacion?”, autor Pranay Gupte a remarca: ‘Un 70 porshento di India su inmenso poblacion ta bou di 30 aña di edad, pero no tin lider pa sirbi como nan role model, un ehempel digno pa nan imita.’

Den algun pais, lidernan tawatin cu baha for di nan puesto debi na acusacionnan di corupcion. Pues, tin varios motibo, pakico mundo evidentemente ta pasando door di un crisis pa haya bon lider. E estado di e mundo aki ta duna prueba cu loke un profeta cu a biba un 2.600 aña pasa a bisa ta berdad. El a bisa: “E caminda di hende no ta di dje mes; tampoco no ta keda na hende pa dirigi su pasonan.”—Yeremias 10:23.

Tin un solucion pa e angustia mundial cu tin aworaki? Ken por dirigi humanidad na un mundo caminda sociedad humano no ta ser asota pa conflicto ni no ta yen di miedo? Caminda berdadero conocemento ta gratis y na abundancia, y caminda hende ta rumbo pa perfeccion?

[Reconocemento pa Potret na pagina 3]

Fatmir Boshnjaku