Interes den “Santonan” A Bolbe Lanta

“Bo ta corda cu un tempo nos tawata harta di heroe? Ta parce cu esei no a afecta e 4,2 miyon Mericanonan cu a mira e entiero di Mama Teresa dia 13 di september. For di dia cu el a muri, dia 5 di september, Vaticano a haya boshi di peticion pa declar’e oficialmente como santo. Masha poco hende ta duda cu esei lo tuma luga.” —Sun-Sentinel, MERCA, 3 DI OCTOBER 1997.

HOPI hende ta mira e obranan humanitario y di caridad di e misionero catolico Mama Teresa como un muestra di kico kiermen ser un berdadero santo. Otro religionnan tambe tin nan personahenan cu a haci obranan grandi y digno di merito. Pero, kisas ningun di nan no ta ser reconoci oficialmente manera esnan cu Iglesia Catolico Romano a canonisa of declara como santo.

Papa Huan Pablo II a canonisa mas cu 450 persona durante su periodo como papa. Esei ta mas cu e cantidad cu tur otro papa di siglo 20 hunto a yega di canonisa.a Pakico te ainda tin hende deboto na “santo”, aunke por lo general hopi di nan no ta mucho conoci den e catoliconan mes?

Lawrence Cunningham, teologo di Universidad Notre Dame, ta splica: “E idea di cu lo tin santonan den e mundo aki ta lanta hende su interes. Existencia di santonan ta mustra cu te ainda hende por tin su meritonan den bida.” Ademas, ta reina e pensamento cu e “santonan” tin acceso special na Dios, y cu door di esei nan por intercede bon pa hende na bida. Ora hende haya pertenencia of resto humano di un “santo”, nan ta venera esaki pasobra nan ta kere cu e supuesto santo ta emiti poder.

E Catisashi di e Consilio di Trent, publica den siglo 16 pa confirma e doctrina catolico, a decreta: “Nos tin rason ora nos bisa cu e acto di honra e santonan ‘cu ta drumi den Señor’, e acto di pidi nan pa nan intercede pa nos, y e acto di venera nan pertenencianan y shinishi sagrado, sigur no ta bayendo perdi. Mas bien, esakinan tin tendencia principalmente di contribui na e gloria di Dios. Na mesun tempo e speransa cristian ta ser anima y fortifica, y e cristian mes ta bira ansioso pa imita e birtud di e santonan.” (The Catechism of the Council of Trent, 1905) Cristiannan berdadero sigur kier hiba un bida di birtud, acerca Dios na e manera corecto y ricibi su yudansa. (Santiago 4:7, 8) Pesei, segun e Palabra di Dios, ken ta e berdadero santonan? Y ki papel nan ta hunga?

[Nota]