“Hala Serca Dios”

“Hala serca Dios y E lo hala serca boso.”—SANTIAGO 4:8.

1, 2. (a) Kico hende ta pretende hopi bes? (b) Kico Santiago a anima e cristiannan pa haci, y dicon esei tawata necesario?

“DIOS ta cu nos.” Hende a yega di pone e palabranan aki riba emblema nacional y asta uniform di solda. Den nos tempo hende a graba e palabranan “den Dios nos ta confia” riba masha hopi moneda y placa di papel. Ta normal pa hende pretende di tin un bon relacion cu Dios. Pero, djis bisa cu bo tin un bon relacion cu Dios, of pon’e den un lema pa hende mira, ainda no kiermen cu di berdad bo tin un bon relacion cu Dios; bo no ta di acuerdo?

² Bijbel ta mustra cu nos por tin un bon relacion cu Dios. Pero pa logr’e nos mester haci esfuerso. Asta algun cristian ungi di prome siglo tawatin cu fortalece nan relacion cu Yehova Dios mas. Santiago, un anciano cristian, mester a spierta algun di nan tocante nan tendencianan carnal y nan falta di limpiesa spiritual. Den su conseho el a duna nan e animacion poderoso aki: “Hala serca Dios y E lo hala serca boso.” (Santiago 4:1-12) Kico Santiago tawata kiermen cu nos mester “hala serca Dios”?

3, 4. (a) Kico e expresion “hala serca Dios” por a pone algun di e lectornan di prome siglo di e carta di Santiago corda? (b) Dicon nos por ta sigur cu nos por hala serca Dios?

³ Santiago a uza un expresion cu lo a zona conoci pa hopi di su lectornan. E Lei di Moises a duna e sacerdotenan instruccion spesifico tocante con pa “acerca” Yehova na fabor di su pueblo. (Exodo 19:22) Pues, e palabranan ei por a pone e lectornan di Santiago su carta corda cu acerca Yehova no ta un cos chikito. E ta e dignatario di mas halto di universo.

⁴ Di otro banda, manera un experto di Bijbel a yega di remarca, “e conseho [na Santiago 4:8] ta mustra cu Santiago tawatin un gran optimismo.” Santiago tawata sa cu semper Yehova a invita hende imperfecto di un manera amoroso pa hala serca dje. (2 Cronicanan 15:2) E sacrificio di Hesus a habri caminda pa hende por hala serca Yehova den un sentido mas completo. (Efesionan 3:11, 12) Awe, miyones di hende tin e posibilidad di acerca Dios! Pero con nos por probecha di e oportunidad maraviyoso aki? Brevemente nos lo trata tres manera pa nos hala serca Yehova Dios.

Sigui Siña Conoce Dios

5, 6. Con e ehempel di Samuel como mucha ta yuda nos compronde kico “conoce” Dios ta encera?

⁵ Na Huan 17:3 Hesus a bisa: “Esaki ta bida eterno, cu nan por conoce bo, e unico Dios berdadero, y Hesucristo, kende Bo a manda.” Beibel Santu y hopi otro traduccion di e texto aki ta papia simplemente di “conoce” Dios. Pero Traduccion di Mundo Nobo ta uza e expresion ‘gana conocemento’ di Dios. Ademas, varios experto a yega di comenta cu e manera cu e palabra ta ser uza den e texto Griego original ta encera hopi mas cu “conoce”: e ta encera un proceso cu ta sigui, y cu por asta hiba dos persona na conoce otro intimamente.

⁶ E idea di siña conoce Dios intimamente no tawata algo desconoci den tempo di Hesus. Por ehempel, den e Scritura Hebreo ta para skirbi cu tempo Samuel tawata mucha, e “no tawata conoce SEÑOR ainda.” (1 Samuel 3:7) Esei kiermen cu Samuel tawata sa masha poco tocante su Dios? No. Su mayornan y e sacerdotenan lo mester a siñ’e hopi cos. Pero segun un experto, e palabra Hebreo uza den e versiculo ei por referi na conoce “den e sentido di mas intimo.” Na e momento ei ainda Samuel no a siña conoce Yehova intimamente manera el a bin conoc’e despues, tempo cu el a sirbi como bosero di Yehova. Segun cu Samuel a sigui crece, el a siña conoce Yehova di berdad, y a forma un relacion personal y intimo cu ne.—1 Samuel 3:19, 20.

7, 8. (a) Dicon nos no mester tin miedo di studia e siñansanan profundo di Bijbel? (b) Cua ta algun berdad profundo den e Palabra di Dios cu ta bon pa nos studia?

⁷ Abo ta trahando pa siña conoce Yehova, pa bo por tin un relacion intimo cu ne? Pa bo haci esei bo mester “anhela” e cuminda spiritual cu Dios ta percura. (1 Pedro 2:2) No keda contento cu djis e siñansanan basico. Traha pa bo compronde e siñansanan mas profundo cu tin den Bijbel. (Hebreonan 5:12-14) Bo ta sinti cu bo no por debi cu, segun bo, cierto siñansanan ta mucho dificil? Si esei ta e caso, corda cu Yehova ta e “Siñador.” (Isaias 30:20) E sa con pa haci berdadnan profundo bira comprendibel pa mente humano imperfecto. Y E por bendiciona bo esfuersonan sinsero pa compronde loke E ta siña bo.—Salmo 25:4.

⁸ Dicon bo no ta examina cuanto bo sa tocante algun di e cosnan profundo di Dios? (1 Corintionan 2:10) E temanan aki no ta laf manera e topiconan cu teologo- y lidernan religioso ta papia ariba. Nan ta siñansanan bibo cu ta duna nos un comprondemento fasinante di e mente y curason di nos Tata amoroso. Por ehempel tin e rescate, e “misterio” of “secreto sagrado” y e diferente pactonan cu Yehova a uza na beneficio di su pueblo y pa cumpli cu su proposito. E temanan aki, y hopi otro tema similar, ta hopi agradabel y util pa investiga y studia.—1 Corintionan 2:7.

9, 10. (a) Pakico orguyo ta peligroso, y kico por yuda nos evita di bira orguyoso? (b) Pa loke ta trata e conocemento di Yehova, dicon nos mester percura pa keda humilde?

⁹ Segun cu bo ta crece den conocemento di berdadnan spiritual profundo, bo mester tene cuidou cu un peliger cu por presenta ora bo aumenta den conocemento: orguyo. (1 Corintionan 8:1) Orguyo ta peligroso, pasobra e ta hala hende for di Dios. (Proverbionan 16:5; Santiago 4:6) Corda cu ningun hende no tin motibo pa broma tocante su conocemento. Mira por ehempel kico tin skirbi den e introduccion di un buki cu ta examina e avancenan cientifico mas nobo: “Mas nos haya sa, mas nos ta realisa con poco nos sa. . . . Tur loke nos a siña no ta nada compara cu tur loke nos falta pa siña ainda.” Bo no ta topa comentarionan humilde asina cu hopi frecuencia, y ta agradabel ora nan presenta. Pero, e conocemento di mas amplio cu ta existi ta e conocemento di Yehova Dios. Pues, den loke ta toca e conocemento ei, nos tin asta mas rason pa keda humilde. Dicon?

¹⁰ Mira algun di e expresionnan den Bijbel tocante Yehova. “Bo pensamentonan ta masha profundo.” (Salmo 92:5) “[Yehova] su comprondemento ta infinito.” (Salmo 147:5) “[Yehova] su comprondemento ta inscudriñabel.” (Isaias 40:28) “O profundidad di e rikesanan, tanto di e sabiduria como di e conocemento di Dios!” (Romanonan 11:33) Claramente, nunca nos lo no haya sa tur loke tin pa sa tocante Yehova. (Eclesiastes 3:11) El a siña nos hopi cos maraviyoso, pero semper lo sobra un cantidad sin fin di cos pa nos sigui siña. Ora bo pensa riba esei, e no ta pone bo sinti emociona y humilde na mes momento? Pesei, segun cu nos ta siña mas, laga nos semper uza nos conocemento como base pa hala serca Yehova y yuda otro hende haci mescos, y nunca como un medio pa halsa nos mes riba otro hende.—Mateo 23:12; Lucas 9:48.

Demostra Bo Amor pa Yehova

11, 12. (a) Ki efecto loke nos ta siña tocante Yehova mester tin riba nos? (b) Kico ta mustra cu un hende su amor pa Dios ta berdadero?

¹¹ Corectamente apostel Pablo a conecta conocemento cu amor. El a skirbi: “Esaki ta mi oracion, cu boso amor por abunda mas y mas ainda den conocemento berdadero y tur discernimento.” (Filipensenan 1:9) En bes di pone nos bira orguyoso, cada berdad precioso cu nos siña tocante Yehova y su propositonan mester pone nos stima nos Tata celestial mas ainda.

¹² Claro cu hopi hende cu ta pretende di stima Dios no ta stim’e di berdad. Kisas nan ta sinsero den e sentido cu en berdad tin sintimento fuerte ta lanta pa Dios den nan curason. Ta bon y asta elogiabel cu nan tin tal sintimentonan, basta nan ta na harmonia cu conocemento exacto. Pero riba nan mes e sintimentonan ei no kiermen cu e persona tin berdadero amor pa Dios. Dicon no? Mira kico e Scritura ta bisa cu amor pa Dios ta: “Esaki ta e amor di Dios, cu nos ta warda su mandamentonan.” (1 Huan 5:3) Pues, amor pa Yehova ta berdadero solamente ora e persona ta demostr’e cu actonan di obediencia.

13. Con temor di Dios lo yuda nos demostra cu nos ta stima Yehova?

¹³ Temor di Dios lo yuda nos obedece Yehova. E admiracion y respet profundo aki pa Yehova ta desaroya door cu nos ta siña conoce Dios y tambe su santidad, gloria, poder, husticia, sabiduria y amor infinito. Temor di Dios ta esencial pa nos por hala serca dje. De echo, mira kico Salmo 25:14 ta bisa: “E comunion intimo di SEÑOR ta cu esnan cu ta tem’e.” Pesei, si nos tin un temor saludabel di desagrada nos Tata celestial stima, nos por hala serca di dje. Temor di Dios lo yuda nos obedece e conseho sabi skirbi na Proverbionan 3:6: “Den tur bo camindanan reconoc’e, y E lo dirigi bo bereanan.” Kico esei kiermen?

14, 15. (a) Cua ta algun di e desisionnan cu nos ta enfrenta den nos bida di tur dia? (b) Con nos por mustra cu nos ta teme Dios ora di tuma desision?

¹⁴ Tur dia bo tin cu tuma desision grandi y chikito. Por ehempel, tocante kico bo ta bai combersa cu bo coleganan di trabou, compañeronan di scol, y cu bo biciñanan? (Lucas 6:45) Lo bo traha duro pa cumpli cu loke hende duna bo pa haci, of lo bo purba ‘lora’ haciendo menos esfuerso posibel? (Colosensenan 3:23) Lo bo bira mas sera cu hende cu no ta mustra mucho amor pa Yehova, of cu no ta stim’e mes? Of lo bo traha pa fortalece bo relacion cu hende spiritual? (Proverbionan 13:20) Kico lo bo haci, asta den cos chikito, na fabor di e Reino di Dios? (Mateo 6:33) Si bo ta laga principionan biblico manera esnan cita aki guia bo desisionnan di tur dia, e ora ei di berdad bo ta tuma Yehova na cuenta of reconoc’e “den tur bo camindanan.”

¹⁵ De echo, cada bes cu nos tuma un desision nos lo mester laga e pensamento aki guia nos: ‘Kico Yehova lo kier pa mi haci? Ki desision lo agrad’e mas?’ (Proverbionan 27:11) Mustra temor di Dios na e manera aki ta un excelente forma pa demostra cu nos ta stima Yehova. Ademas, temor di Dios lo motiva nos pa keda limpi den sentido spiritual, moral y fisico. Corda cu den e mesun versiculo caminda Santiago ta anima cristiannan pa “hala serca Dios” e ta conseha nan esaki tambe: “Limpia boso mannan, boso pecadonan; y purifica boso curason, boso di curason dobel.”—Santiago 4:8.

16. Kico nos no por logra nunca door di duna Yehova, y sinembargo, kico si semper nos lo kier logra haci?

¹⁶ Claro cu expresa nos amor pa Yehova kiermen hopi mas cu djis keda sin haci malo. Amor ta motiva nos pa haci bon tambe. Por ehempel, con nos ta reacciona na Yehova su inmenso generosidad? Santiago a skirbi: “Tur bon regalo y tur don perfecto ta for di ariba, y ta baha bin for di e Tata di lusnan.” (Santiago 1:17) Ta berdad cu ora nos duna Yehova nos cosnan material, nos no ta hacie mas rico. Tur recurso y tur cos ta di dje caba. (Salmo 50:12) Y ora nos duna Yehova nos tempo y energia, nos no ta yudand’e cu algo cu lo E no por logra na un otro manera. Asta si nos nenga di predica e bon nobo di e Reino di Dios, E por laga piedra mes sclama! Wel, pakico anto nos mester duna Yehova nos recursonan, nos tempo y nos energia? Principalmente pasobra asina nos ta demostra cu nos ta stim’e cu tur nos curason, alma, mente y forsa.—Marco 12:29, 30.

17. Kico por motiva nos pa duna alegremente na Yehova?

¹⁷ Ora nos duna na Yehova, nos mester hacie di buena gana, “pasobra Dios ta stima esun cu ta duna cu alegria.” (2 Corintionan 9:7) E principio registra na Deuteronomio 16:17 por yuda nos duna cu alegria: “Tur hende mester duna manera e por, conforme e bendicion di SEÑOR bo Dios cu el a duna bo.” Ora nos mira con generoso Yehova ta cu nos, nos ta sinti un deseo pa duna alegremente na dje. Ora nos haci esei, su curason ta alegra, manera ora un yiu stima ta haci su mayor contento cu un regalito. Si nos expresa nos amor na e manera aki, esei lo yuda nos hala serca Yehova.

Bira Mas Intimo pa Medio di Oracion

18. Dicon ta bale la pena pa analisa con pa mehora nos oracionnan?

¹⁸ E ratonan cu nos ta haci oracion den priva ta oportunidadnan hopi balioso; nan ta momentonan pa nos papia na un manera intimo y confidencial cu nos Tata celestial. (Filipensenan 4:6) Ya cu oracion ta un medio esencial pa nos hala serca Dios, ta bale la pena pa para pensa con nos oracionnan ta. No cu nan mester ta obranan maestro bon organisa y yen di palabra grandi, pero nan mester ta expresionnan sinsero cu ta sali di nos curacion. Con nos por mehora nos oracionnan?

19, 20. Pakico ta bon pa medita prome cu nos haci oracion, y cua ta algun tema apropiado pa medita ariba?

¹⁹ Nos por purba medita prome cu nos haci oracion. Si nos medita prome, nos por haci nos oracionnan mas spesifico y cu mas sentido, y asina evita di ripiti frasenan di custumber cu ta bini na bo boca automaticamente. (Proverbionan 15:28, 29) Por ta util si nos pensa riba algun di e temanan cu Hesus a menciona den su oracion modelo, y purba mira con nan ta pas den nos sircunstancia personal. (Mateo 6:9-13) Por ehempel, nos lo por puntra nos mes ki papel chikito nos ta spera di hunga den cumplimento di Yehova su boluntad aki riba tera. Nos lo por bisa Yehova cu nos kier ta mas util posibel p’e, y pidie yuda nos cumpli cu e responsabilidadnan cu el a duna nos? Nos ta carga cu precupacion tocante nos necesidadnan material? Pa ki picanan nos tin mester di pordon, y ken nos mester siña pordona mas tanto? Ki tentacionnan ta tormenta nos? Nos ta realisa cu cuanto urgencia nos tin mester di Yehova su proteccion contra e tentacionnan aki?

²⁰ Tambe nos lo por pensa riba hende cu nos conoce y cu tin mester di Yehova su yudansa pa un necesidad special. (2 Corintionan 1:11) Sinembargo, loke nos no mester lubida tampoco ta di duna gradicimento. Si nos para keto y pensa, nos mester por cai riba algun motibo pa gradici Yehova y alab’e tur dia pa su bondad abundante. (Deuteronomio 8:10; Lucas 10:21) Y duna gradicimento tin asta un beneficio extra: e por yuda nos mira bida na un manera mas positivo y cu mas aprecio.

21. Cua ehempelnan di Bijbel nos por studia pa yuda nos sa con pa acerca Yehova den oracion?

²¹ Studiamento tambe por yuda nos mehora nos oracionnan. Tin algun oracion excelente di homber y mohe fiel skirbi den e Palabra di Dios. Por ehempel, si tin un problema dificil ta acerca y e ta pone nos sinti un poco ansiedad of asta miedo pa nos mes y pa bienestar di esnan cu nos ta stima, nos lo por bolbe lesa e oracion di Yacob tocante e encuentro cu e tawata bai tin cu su ruman Esau, cu kier a tuma vengansa di dje. (Genesis 32:9-12) Of nos lo por studia e oracion cu Rei Asa a haci ora un ehersito di mas o menos un miyon Etiope tawata menasa e pueblo di Dios. (2 Cronicanan 14:11, 12) Si nos ta precupa tocante un problema cu lo por trece reproche riba Yehova su bon nomber, anto ta bale la pena pa nos considera e oracion di Elias dilanti e adoradonan di Baal na Sero Carmelo, y tambe e oracion di Nehemias tocante e situacion deplorabel cu Herusalem tawata aden. (1 Reinan 18:36, 37; Nehemias 1:4-11) Door di lesa y medita riba oracionnan asina nos por fortalece nos fe, y nan por duna nos un idea con nos por acerca Yehova miho tocante precupacionnan cu ta pisa riba nos.

22. Kico ta e texto di aña pa 2003, y kico nos lo por puntra nos mes de bes en cuando segun cu e aña ta transcuri?

²² Claramente, no ta existi honor mas grandi, ni meta mas noble, cu cumpli cu e conseho di Santiago pa “hala serca Dios.” (Santiago 4:8) Laga nos haci esei door di progresa den nos conocemento di Dios, busca manera pa demostra nos amor na dje mas y mas, y desaroya un relacion intimo cu ne den nos oracionnan. Durante aña 2003, segun cu nos ta tene Santiago 4:8 na mente como nos texto di aña, laga nos sigui examina nos mes pa mira si di berdad nos ta halando serca Yehova. Pero, kico nos por bisa di e di dos parti di e declaracion? Den ki sentido Yehova lo ‘hala serca nos’, y ki bendicionnan lo e trece? E siguiente articulo ta bai trata e tema aki.

Bo Ta Corda?

• Dicon hala serca Yehova ta un asunto pa pensa seriamente ariba?

• Cua ta algun meta cu nos lo por pone relaciona cu siña conoce Yehova?

• Con nos por demostra cu nos ta stima Yehova di berdad?

• Cua ta algun manera cu nos por bira mas intimo cu Yehova den oracion?

[Comentario na pagina 12]

E texto di aña pa 2003 lo ta: “Hala serca Dios y E lo hala serca boso.”—Santiago 4:8.

[Plachi na pagina 8, 9]

Segun cu Samuel a madura, el a siña conoce Yehova intimamente

[Plachi na pagina 12]

E oracion cu Elias a haci na Sero Carmelo ta un bon ehempel pa nos