“Dios Ta Amor”

“Esun cu no ta stima no conoce Dios, pasobra Dios ta amor.”—1 HUAN 4:8.

1-3. (a) Kico Bijbel ta declara tocante Yehova su cualidad di amor, y dicon esaki ta un declaracion unico? (b) Dicon Bijbel ta bisa cu “Dios ta amor”?

TUR Yehova su cualidadnan ta excelente, perfecto y atractivo. Pero amor ta su cualidad di mas atractivo cu tur. No tin nada otro cu ta hala nos serca Yehova asina poderoso manera su amor. Afortunadamente amor ta su cualidad dominante tambe. Con nos por sa esei?

2 Wel, tin un cos cu Bijbel ta bisa tocante amor cu e no ta bisa di ningun di Yehova su otro cualidadnan principal. E Scritura no ta bisa cu Dios ta poder ni cu Dios ta husticia ni cu Dios ta sabiduria. E tin e cualidadnan ei y e ta e fuente supremo di nan tres. Pero tocante amor, 1 Huan 4:8 ta bisa algo mas profundo: “Dios ta amor.” Si, amor ta un parti integral di Yehova su personalidad; esei ta henter su caracter. Por lo general nos por pensa di esaki di e siguiente manera: Yehova su poder ta permitie actua. Su husticia y su sabiduria ta guia su manera di actua. Sinembargo, Yehova su amor ta motiv’e pa actua. Y su amor semper ta wordo refleha den e manera cu e ta uza su otro cualidadnan.

³ Hopi bes hende sa bisa cu Yehova ta amor en persona. Pues, si nos kier siña tocante amor, nos tin cu siña tocante Yehova. Laga nos analisa anto algun faseta di Yehova su amor inigualabel.

E Acto Mas Grandi di Amor

4, 5. (a) Cua ta e acto mas grandi di amor den henter historia? (b) Dicon nos por bisa cu Yehova y su Yiu ta uni mediante e banchi di amor di mas fuerte cu hamas a existi?

⁴ Yehova a mustra amor den varios manera, pero tin un cu ta destaca riba tur. Cua esei ta? Ora el a manda su Yiu pa sufri y muri pa nos. Nos por bisa cu tur confiansa cu esei ta e acto mas grandi di amor den henter historia. Dicon nos por bisa esei?

⁵ Bijbel ta yama Hesus “e primogenito di henter creacion.” (Colosensenan 1:15) Pensa un rato. Yehova su Yiu a existi prome cu e universo material. Ta cuanto tempo anto e cu su Tata tawatin hunto? Algun cientifico ta calcula cu e universo ta 13 mil miyon aña bieu. Sinembargo, asta si e calculo aki ta corecto, esei lo no ta suficiente pa indica cuanto aña Yehova su Yiu primogenito tin na bida! Kico el a haci durante tur e siglonan ei? E Yiu a sirbi felismente como “trahado experto” di su Tata. (Proverbionan 8:30; Huan 1:3) Yehova cu su yiu a traha hunto pa crea tur otro cos. Ki un tempo excitante y felis nan tawatin! Cua di nos por realmente compronde e poder di e banchi cu nan tawatin cu otro y cu a existi pa un periodo di tempo asina largo? Ta bisto cu Yehova Dios y su Yiu ta uni mediante e banchi di amor di mas fuerte cu hamas a existi.

6. Con Yehova a expresa su sintimento pa Su Yiu ora cu Hesus a batisa?

⁶ Apesar di tur esei, Yehova a manda su Yiu na tera pa nace como un baby humano. Esei a nifica cu pa algun decada Yehova lo no tawatin asociacion intimo cu su Yiu stima den shelo. Cu sumo interes El a observa for di shelo con Hesus a crece bira un homber perfecto. Ora Hesus tawatin mas o menos 30 aña, el a batisa. Na e ocasion ei e Tata a papia personalmente for di shelo y a bisa: “Esaki ta mi Yiu stima, den kende mi tin goso.” (Mateo 3:17) Hesus su Tata mester tawata hopi contento ora el a mira cu Hesus a cumpli fielmente cu tur loke a ser profetisa y cu tur loke el a pidie haci!—Huan 5:36; 17:4.

7, 8. (a) Kico Hesus mester a soporta dia 14 di nisan di aña 33, y con esaki a afecta su Tata celestial? (b) Dicon Yehova a permiti su Yiu sufri y muri?

⁷ Pero con Yehova a sinti dia 14 di nisan di aña 33, ora cu Hesus a ser traiciona y despues aresta door di un multitud rabia? Ora cu nan a haci bofon di Hesus, scupie y dal e cu mokete? Ora cu nan a sut’e te cu su lomba a keda tur habri na herida? Ora cu nan a clab’e, na man cu pia, na un palo y lag’e colga einan mientras cu hende tawata insult’e? Con e Tata a sinti ora cu su Yiu stima tawata sclama na dje den agonia? Si, con Yehova a sinti ora cu Hesus a hala su ultimo rosea y, pa prome bes desde principio di tur creacion, Su Yiu stima a stop di existi?—Mateo 26:14-16, 46, 47, 56, 59, 67; 27:26, 38-44, 46; Huan 19:1.

⁸ Como cu Yehova tin sintimento, ta imposibel pa nos describi e dolor cu lo e mester a sinti ora cu su Yiu a muri. Loke si por ser expresa ta e motibo pakico Yehova a permiti esaki sosode. Dicon e Tata tawata dispuesto pa soporta e dolor ei? Yehova ta revela algo maraviyoso na nos na Huan 3:16. Esaki ta un versiculo asina importante cu nan a yega di yam’e e Evangelio na miniatura. E ta bisa: “Dios a stima mundo asina tanto, cu el a duna su Yiu unigenito, pa ken cu kere den dje no bai perdi, ma tin bida eterno.” Pues loke a motiva Dios tawata esaki: amor. Hende nunca a demostra un amor asina grandi.

E Manera Cu Yehova Ta Sigura Nos di Su Amor

9. Kico Satanas kier pa nos kere tocante e manera cu Yehova ta mira nos, pero kico Yehova ta sigura nos?

⁹ Sinembargo, tin un pregunta importante cu ta lanta: Dios ta stima nos individualmente? Tin hende ta di acuerdo cu Dios ta stima humanidad en general, manera Huan 3:16 ta bisa. Pero en realidad nan ta pensa: ‘Dios nunca lo por stima ami como persona.’ Echo ta cu Satanas e Diabel ta ansioso pa nos kere cu nos no tin balor den bista di Yehova y cu e no ta stima nos. Pero na otro banda, no ta importa con inutil nos ta sinti nos mes ni con indigno di wordo stima nos ta pensa cu nos ta, Yehova ta sigura nos cu cada un di su sirbidonan fiel tin balor p’e.

10, 11. Con e ilustracion di mofi cu Hesus a uza ta mustra cu nos tin balor den bista di Yehova?

¹⁰ Por ehempel, considera Hesus su palabranan skirbi na Mateo 10:29-31. Pa ilustra con balioso su disipelnan ta, Hesus a bisa: “Dos mofi no ta wordo bendi pa un cen? Y ni un di nan lo no cai na suela si no ta e boluntad [of, “sin conocemento”, NW] di boso Tata. Y asta e drachinan di cabei riba boso cabes, tur ta conta. Pesei, no tene miedo; boso bal mas cu un cantidad di mofi.” Pensa un rato riba loke e palabranan ei a nifica pa e oyentenan di Hesus den prome siglo.

¹¹ Den tempo di Hesus, mofi tawata e parha mas barata di tur e parhanan cu nan tawata bende como cuminda. Pa un cen (un moneda cu tawatin masha poco balor), un cumprado a haya dos mofi. Pero mas despues Hesus a bisa, manera ta para skirbi na Lucas 12:6 y 7, cu pa dos placa (dos di e mesun moneda menciona na Mateo) un hende por a haya no cuater mofi sino cinco. Bendedonan a agrega e parha extra ei como si fuera e no tawatin ningun balor. Kisas den bista di hende e parhanan ei no tawatin balor, pero con e Creador a considera nan? Hesus a bisa: “Ni un di nan [ni sikiera esun extra] no ta wordo lubida dilanti di Dios.” Kisas awor nos ta cuminsa compronde Hesus su punto. Ya cu un solo mofi tin asina tanto balor pa Yehova, hende mester tin mucho mas balor ainda! Manera Hesus a bisa, Yehova sa delaster un detaye di nos. Figura bo, asta e drachinan di cabei riba nos cabes ta conta!

12. Dicon nos por ta sigur cu Hesus tawata realistico ora cu el a bisa cu e drachinan di cabei riba nos cabes ta conta?

¹² Tin hende kisas ta asumi cu Hesus a exagera den e asunto aki di conta e drachinan di cabei riba nos cabes. Pero pensa un rato riba e resureccion. Yehova mester conoce nos masha bon mes pa e por bolbe crea nos! Pa Yehova, nos tin asina tanto balor cu e ta corda tur nos detayenan, entre otro, nos codigo genetico complica y tur nos añanan di experencia y tur nos recuerdonan. Conta e drachinan di cabei riba nos cabes (cu ta mas o menos 100.000 riba un cabes normal) ta un tarea masha simpel na comparacion cu resusita hende. Hesus su palabranan ta sigura nos na un manera masha bunita cu Yehova ta interesa den cada un di nos personalmente!

13. Con e caso di Rei Josafat ta mustra cu Yehova ta busca e bon cu tin den nos apesar cu nos ta imperfecto?

¹³ Bijbel ta revela un cos mas cu ta sigura nos cu Yehova stima nos. E ta busca y ta balora e bon cu tin den nos. Tuma por ehempel, e bon Rei Josafat. Ora cu e Rei a comete un bobedad, Yehova su profeta a bis’e cu el a ‘trece e rabia di Yehova riba su mes.’ Esei tawata un cos serio. Pero Yehova su mensahe no a termina einan. El a sigui bisa: “Sinembargo, tin algo bon den bo.” (2 Cronicanan 19:1-3) Pues Yehova su rabia husto no a cieg’e pa e “bon” cu tawatin den Josafat. No ta un consuelo pa sa cu Dios ta busca e bon cu tin den nos apesar cu nos ta imperfecto?

Un Dios Cu Ta “Cla pa Pordona”

14. Ki sintimentonan angustioso nos lo por tin ora nos peca, pero con nos lo por beneficia di Yehova su pordon?

¹⁴ Ora nos peca, e decepcion, berguensa y culpa cu nos ta sinti por pone nos pensa cu nunca nos lo ta digno di sirbi Yehova. Pero corda cu Yehova ta “cla pa pordona.” (Salmo 86:5) De echo, si nos repenti di nos picanan y traha duro pa no ripiti nan, nos lo por beneficia di Yehova su pordon. Ban wak con Bijbel ta describi e maraviyoso faseta aki di Yehova su amor.

15. Con leu for di nos Yehova ta pone nos picanan?

¹⁵ E salmista David a uza un expresion bibo pa describi Yehova su pordon: “Mes leu cu oost ta for di west, asina leu El a aleha nos transgresionnan for di nos.” (Letter schuin ta di nos; Salmo 103:12, The Amplified Bible) Con leu oost ta for di west? Den un sentido, oost ta semper na e distancia di mas leu cu hende lo por imagina for di west; e dos puntonan ei no por contra nunca. Un experto a comenta cu e expresion aki ta nifica “mas leu posibel; di mas leu cu nos por imagina.” David su palabranan inspira ta bisa nos cu ora Yehova pordona, e ta pone nos picanan mas leu for di nos cu nos por imagina.

16. Ora Yehova pordona nos picanan, dicon nos por tin sigur cu djei padilanti e ta considera nos limpi?

¹⁶ Bo a yega di purba kita un mancha for di un paña colo cla? Podise apesar cu bo a haci bo best, e mancha a keda visibel. Tuma nota con Yehova ta describi su capasidad di pordona: “Maske boso picanan ta manera escarlata, nan lo bira blanco manera sneu; maske nan ta cora manera escarlata, nan lo bira manera lana.” (Isaias 1:18) E palabra “escarlata” ta indica un colo cora bibo.a Riba nos mes forsa nunca nos lo no por kita e mancha di pica. Sinembargo, Yehova por kita pica cu ta manera escarlata y haci nan blanco manera sneu of manera lana puro. Pesei ora Yehova pordona nos picanan, nos no mester sinti cu nos ta carga e mancha di tal pica pa resto di nos bida.

17. Den ki sentido Yehova ta tira nos picanan tras di su lomba?

¹⁷ Den un cantica di gratitud conmovedor cu Ezekias a compone despues cu el a cura di un enfermedad mortal, el a bisa Yehova: “Bo a tira tur mi picanan tras di bo lomba.” (Isaias 38:17) Aki e ta describi Yehova como si fuera e ta coi e picanan di un pecado repenti y tira nan tras di Su lomba caminda E no ta mira nan ni tuma nota di nan mas. Segun un buki di referencia, e idea cu ta ser transmiti por ser expresa asin’aki: “Bo a haci [cu mi picanan] como si fuera nan no a tuma luga.” Esei no ta un consuelo?

18. Con profeta Mikeas ta indica cu ora Yehova pordona, E ta kita nos picanan permanentemente?

¹⁸ Den un promesa di restauracion, profeta Mikeas a expresa su conviccion cu Yehova lo a pordona su pueblo repenti, bisando: “Ken ta un Dios manera bo, kende . . . ta pasa e acto di rebeldia di e restante di su herencia voorbij? . . . Abo lo tira tur nan picanan den e profundidadnan di lama.” (Mikeas 7:18, 19) Imagina bo kico e palabranan ei a nifica pa hende cu tawata biba den tempo biblico. Lo tawatin un chens cu lo bo por a recupera algo cu a ser tira “den e profundidadnan di lama”? Mikeas su palabranan ta indica anto cu ora Yehova pordona, e ta kita nos picanan permanentemente.

“E Misericordia Tierno di Nos Dios”

19, 20. (a) Kico e palabra Hebreo traduci como “mustra compasion” of “tene misericordia” ta nifica? (b) Con Bijbel ta uza e sintimentonan di un mama pa su baby pa siña nos tocante e compasion di Yehova?

¹⁹ Compasion ta un otro faseta di Yehova su amor. Kico ta compasion? Den Bijbel, e palabra compasion y misericordia ta hopi liga cu otro. Tin varios palabra Hebreo y Griego cu ta transmiti e sentido di compasion. Por ehempel, e palabra Hebreo ra·chám hopi bes ta ser traduci como “mustra compasion” of “tene misericordia.” E palabra Hebreo aki, cu Yehova ta aplica na su mes, ta relaciona cu e palabra pa “matris” y por ser describi como “compasion di mama.”

²⁰ Bijbel ta uza e sintimentonan di un mama pa su baby pa siña nos tocante e compasion di Yehova. Isaias 49:15 ta bisa: “Un mohe por lubida su yiu cu e ta cria na pecho, y no tene compasion [ra·chám] cu e yiu di su mondongo? Esakinan por lubida, ma ami si lo no lubida bo.” Ta dificil pa imagina cu un mama lo lubida di alimenta y cuida su yiu na pecho, un criatura indefenso cu mester di e atencion di su mama di dia y anochi. Pero lamentablemente negligencia di parti di mamanan no ta algo raro, specialmente den e “temponan trabahoso” aki. (2 Timoteo 3:1, 3) “Ma ami si lo no lubida bo”, Yehova ta declara. E tierno compasion cu Yehova tin pa su sirbidonan ta inmensamente mas fuerte cu e cariño natural di mas tierno cu nos por imagina: e compasion cu un mama normalmente ta sinti pa su baby.

21, 22. Kico e Israelitanan a experencia na Egipto di antiguedad, y con Yehova a reacciona riba nan sclamacion?

²¹ Con Yehova ta mustra compasion, manera un mayor amoroso? Nos ta mira e cualidad aki bon cla den e manera cu el a trata cu Israel di pasado. Banda di fin di siglo 16 prome cu nos era, miyones di Israelita tawata catibo na Egipto, caminda nan a ser oprimi severamente. (Exodo 1:11, 14) Den nan angustia, e Israelitanan a sclama na Yehova. Con e Dios di compasion a reacciona?

²² Esaki a conmove Yehova su curason. El a bisa: “Mi a mira e afliccion di mi pueblo cu ta na Egipto, y a tende nan sclamacion . . . mi ta conciente di nan sufrimentonan.” (Exodo 3:7) Yehova no por a mira e sufrimento di su pueblo ni tende nan sclamacion sin sinti pa nan. Yehova ta un Dios di empatia. Y empatia—e habilidad di sinti y compronde e dolor di otro hende—ta liga cu compasion y misericordia. Sinembargo, Yehova no a djis sinti pa su pueblo; el a ser motiva pa actua na nan fabor. Isaias 63:9 ta bisa: “Den su amor y den su misericordia el a redimi nan.” Cu “un man poderoso”, el a rescata e Israelitanan for di Egipto. (Deuteronomio 4:34) Mas despues el a percura alimento milagroso pa nan y a hiba nan na un pais fructifero di nan mes.

23. (a) Con e salmista su palabranan ta sigura nos cu Yehova ta profundamente interesa den nos individualmente? (b) Den ki maneranan Yehova ta yuda nos?

²³ No ta na su pueblo como grupo so Yehova ta mustra compasion. Nos Dios amoroso ta profundamente interesa den nos como persona individual. E ta sumamente conciente di cualkier sufrimento cu kisas nos ta pasando aden. E salmista a bisa: “E wowonan di SEÑOR ta riba e hustonan, y su horeanan ta atento pa scucha nan sclamacion. SEÑOR ta serca di e hende di curason kibra, y ta salba esnan di spirito abati.” (Salmo 34:15, 18) Con Yehova ta yuda nos individualmente? No necesariamente door di kita e causa di nos sufrimento. Pero si el a haci masha hopi percuracion pa esnan cu ta sclama na dje pa yudansa. Su Palabra ta ofrece conseho practico cu por yuda nos masha hopi. Den congregacion, el a percura pa nos tin superintendentenan spiritualmente cualifica, kendenan ta haci esfuerso pa refleha su compasion ora di yuda otro hende. (Santiago 5:14, 15) Como cu Yehova ta Esun “cu ta scucha oracion”, e ta duna “spirito santo na esnan cu pidie.” (Salmo 65:2; Lucas 11:13) Tur e provisionnan ei ta muestra di “e misericordia tierno di nos Dios.”—Lucas 1:78.

24. Con lo bo reacciona riba e amor di Yehova?

²⁴ No ta emocionante pa reflexiona riba e amor di nos Tata celestial? Den e articulo anterior, nos a ser recorda cu Yehova a expresa su poder, husticia y sabiduria den maneranan amoroso pa nos beneficio. Den e articulo aki, nos a mira cu Yehova a expresa su amor pa humanidad directamente—y pa nos cada un individualmente—den maneranan remarcabel. Awor ta bon pa nos cada un puntra nos mes: ‘Con lo mi reacciona riba e amor di Yehova?’ Laga nos reacciona door di stim’e cu henter nos curason, mente, alma y forsa. (Marco 12:29, 30) Nos ta spera cu e manera cu bo ta hiba bo bida tur dia ta refleha bo deseo sinsero di hala semper mas serca di Yehova. Y cu Yehova, e Dios cu ta amor, hala mas serca bo, pa tur eternidad!—Santiago 4:8.

[Nota]

[Komentario di e plachi na página 15]

“Dios . . . a duna su Yiu unigenito”

[Komentario di e plachi na página 16]

© J. Heidecker/VIREO

[Komentario di e plachi na página 16]

“Boso bal mas cu un cantidad di mofi”

[Komentario di e plachi na página 18]

E sintimentonan di un mama pa su baby por siña nos tocante Yehova su compasion

[Komentario di e plachi na página 19]

Bo Ta Corda?

• Con nos sa cu amor ta Yehova su cualidad dominante?

• Dicon nos por bisa cu e echo cu Yehova a manda su Yiu pa sufri y muri pa nos ta e acto di amor di mas grandi den historia?

• Con Yehova ta sigura nos cu e ta stima nos individualmente?

• Den ki maneranan bibo Bijbel ta describi Yehova su pordon?