Dicon Nos No Por Ta Completamente Independiente

“Dos ta miho cu un . . . Si un di nan cai, esun lo lanta su compañero.”—Rei Salomon

REI SALOMON di Israel di antiguedad a declara: “Dos ta miho cu un, pasobra nan tin un bon pago pa nan trabou. Pasobra si un di nan cai, esun lo lanta su compañero. Ma ai di esun cu cai ora no tin ningun hende pa lant’e.” (Eclesiastes 4:9, 10) Asina e sabio aki cu a studia comportacion di hende a enfatisa nos necesidad di compañerismo y e importancia di no isola nos mes. Sinembargo, esaki no tawata djis un opinion di hende. Salomon por a declara esaki door cu e tawatin sabiduria dibino y a ser inspira door di Dios.

No ta sabi pa isola nos mes. Hende tin mester di otro. Nos tur tin mester di e fortalesa y yudansa cu nos por ricibi for di otro hende. Un proverbio biblico ta bisa: “Esun cu isola su mes ta busca su mes deseo; su furia ta lanta contra tur sabiduria sano.” (Proverbionan 18:1) Pesei no ta straño cu sociologonan ta anima hende pa join un grupo y pa mustra interes den otro hende.

Entre e recomendacionnan pa rebiba e manera cu hende mester biba bon cu otro den un comunidad, profesor Robert Putnam ta menciona “e influencia fortalecedor di religion.” Testigonan di Yehova ta sobresali den e aspecto aki pasobra rond mundo den nan congregacionnan tin un ambiente di famia cu ta brinda nan proteccion. Na harmonia cu e palabranan di apostel Pedro, nan ta ‘stima henter e asociacion di rumannan’ cu ta “teme Dios” y respet’e. (1 Pedro 2:17) Ademas, Testigonan di Yehova ta evita isolacion y su efectonan perhudicial pasobra nan tin hopi actividad positivo relaciona cu adoracion berdadero cu ta tene nan ocupa den yuda nan prohimo siña e berdad cu Bijbel, e Palabra di Dios, ta contene.—2 Timoteo 2:15.

Amor y Compañerismo A Cambia Nan Bida

Testigonan di Yehova ta forma un comunidad uni den cua tur miembro ta hunga un papel importante. Considera como ehempel, e caso di Miguel, Froylán, y Alma Ruth, tres miembro di e mesun famia Latinoamericano. Nan a nace cu un malesa di weso cu a pone cu nan a keda enano. Nan tur tres tin cu uza rolstul. Ki efecto asociacion cu Testigonan tawatin riba nan bida?

Miguel ta comenta: “Mi a pasa den hopi crisis, pero ora mi a cuminsa asocia cu e pueblo di Yehova, mi bida a cambia. Isola bo mes ta masha peligroso. Asociacion cu compañeronan creyente tur siman na reunion cristian tawata di gran yudansa pa mi por a haya satisfaccion den bida.”

Alma Ruth ta agrega: “Tawatin momentonan cu mi tawata hopi deprimi; mi tawata sinti mi hopi tristo. Pero ora mi a cuminsa siña tocante Yehova, mi a sinti cu mi por a sera un relacion intimo cu ne. Esei a bira e cos di mas balioso den mi bida. Mi famia a apoya nos masha hopi mes, y esaki a uni nos mas ainda.”

Cu amor Miguel su tata a siñ’e lesa y skirbi. Despues Miguel na su turno a yuda Froylán cu Alma. Esaki tawata esencial pa nan spiritualidad. “E echo cu nos a siña lesa a beneficia nos masha hopi mes, pasobra e ora ei nos por a alimenta nos mes spiritualmente door di lesa Bijbel y publicacionnan biblico”, Alma Ruth a bisa.

Actualmente Miguel ta sirbi como un anciano cristian. Froylán a lesa henter e Bijbel nuebe bes. For di 1996, Alma Ruth a amplia su sirbishi na Yehova door di sirbi como un minister pionero, esta, un proclamado di Reino di tempo completo. El a bisa: “Ta cu bendicion di Yehova mi a logra e meta aki, segun cu mi ta haya apoyo di mi ruman mohenan stima. Nan no solamente ta yuda mi pa mi por predica, sino tambe pa mi por siña otro hende door di conduci 11 studio di Bijbel cu mi a logra cuminsa.”

Otro excelente ehempel ta esun di Emelia. El a haya un accidente cu a lag’e den rolstul debi na lesionnan cu el a ricibi na su pia y wes’i lomba. Testigonan di Yehova na Mexico City a studia Bijbel cu ne, y el a batisa na 1996. Emelia a bisa: “Prome cu mi a conoce e berdad, mi kier a mata mi curpa; mi no kier a biba mas. Mi tawata sinti un bashi inmenso y mi tawata yora di dia y anochi. Pero ora mi a cuminsa asocia cu e pueblo di Yehova, mi a sinti e amor di e rumannan. E interes personal cu nan a mustra den mi a duna mi animo. Un di e ancianonan tawata manera un ruman of un tata pa mi. El a haci areglo pa algun sirbido ministerial hiba mi reunion y den e trabou di predica den mi rolstul.”

José, kende a batisa como Testigo di Yehova na 1992, ta biba su so. E tin 70 aña di edad y a baha cu pension na 1990. José tawata sintie deprimi, pero despues cu un Testigo a predica na dje, mesora el a cuminsa asisti na reunionnan cristian. El a gusta loke el a tende y mira einan. Por ehempel, el a observa e compañerismo cu tin entre e rumannan y el a sinti cu nan tawata realmente interesa den dje. Awor e ancianonan y sirbidonan ministerial den su congregacion ta percura p’e. (Filipensenan 1:1; 1 Pedro 5:2) E compañeronan di fe ei ta ‘curash’e’ masha. (Colosensenan 4:11) Nan ta hib’e docter, bishit’e na cas y nan a dun’e apoyo moral durante e periodonan cu el a haci cuater operacion. El a bisa: “Nan ta mustra interes den mi. Nan realmente ta mi famia. Mi ta disfruta di nan compañerismo.”

Dunamento Ta Trece Berdadero Felicidad

Ora cu Rei Salomon a bisa cu “dos ta miho cu un”, ta net despues cu el a caba di mustra e banidad di dedica tur energia pa haya rikesa material. (Eclesiastes 4:7-9) Y esei ta precisamente loke hopi hende ta ansha nan bida cu ne awe, aunke esaki ta nifica cu nan tin cu sacrifica nan relacionnan cu otro hende tanto pafo como den famia.

Golosidad y egoismo a pone hopi hende isola nan mes. Pero esaki no a trece ni felicidad ni satisfaccion den nan bida, pasobra frustracion y desesperacion ta comun entre hende cu ta laga golosidad y egoismo guia nan. Na contraste cu esei, e relatonan cu nos a caba di conta ta mustra e bon resultadonan di asociacion cu hende cu ta sirbi Yehova y cu ta motiva door di amor p’e y pa nan prohimo. Asistencia regular na reunionnan cristian, apoyo y interes di compañeronan cristian, y actividad celoso den sirbishi tawata factornan vital cu a yuda e personanan aki vence sintimentonan negativo cu tin di aber cu isolacion.—Proverbionan 17:17; Hebreonan 10:24, 25.

Siendo cu nos ta depende di otro, ta normal cu ora nos ta haci cos pa otro nos ta haya un satisfaccion. Albert Einstein, kende su obra a beneficia otro hende, a bisa: “Mester balora hende na loke e ta duna y no na loke e por ricibi.” Esaki ta di acuerdo cu e palabranan di nos Señor Hesucristo: “Tin mas felicidad den duna cu tin den ricibi.” (Echonan 20:35, NW) Pesei, aunke ta bon pa ricibi amor, mustra amor na otro hende tambe ta masha bon pa salu.

Un superintendente biahero cu tin varios aña ta bishita congregacionnan pa duna yudansa spiritual y tambe a yuda traha luga di reuni pa cristiannan di menos recurso, a expresa su sintimentonan cu e palabranan aki: “E goso di sirbi mi rumannan y di mira nan cara yen di aprecio ta motiva mi pa sigui busca oportunidad pa yuda. Mi a realisa cu mustra interes personal den otro hende ta e clave pa felicidad. Y mi sa cu como anciano, nos mester ta ‘manera un refugio contra biento . . . , manera coridanan di awa den un tera seco, manera sombra di un baranca masha grandi mes den un tera cu tin sed di awa.’”—Isaias 32:2.

Ki Dushi Ta pa Rumannan Biba Hunto den Harmonia!

Berdaderamente, yuda otro hende y busca compañerismo di esnan cu ta sirbi Yehova ta trece berdadero felicidad y hopi beneficio. E salmista a sclama: “Mira, ki bon y ki dushi ta pa rumannan biba hunto den harmonia!” (Salmo 133:1) Manera e caso di Miguel, Froylán y Alma Ruth a mustra, union den famia ta un factor vital pa yuda otro. Y ta ki un bendicion pa ta uni cu otro den adoracion berdadero! Despues cu apostel Pedro a duna esposo y esposa cristian conseho, el a skirbi: “Finalmente, boso tur sea di acuerdo cu otro, teniendo compasion cu otro, stimando manera ruman, y sea misericordioso y humilde den spirito.”—1 Pedro 3:8.

Berdadero amistad ta trece hopi beneficio, tanto emocionalmente como spiritualmente. Dirigiendo su mes na su compañeronan di fe, apostel Pablo a duna e spiertamento: “Encurasha esnan cu ta falta animo, yuda e debilnan, tene pasenshi cu tur hende. . . . Semper busca loke ta bon pa otro y pa tur hende.”—1 Tesalonicensenan 5:14, 15.

Pesei, busca maneranan practico pa haci bon na otro hende. “Haci bon na tur hende, y specialmente na esnan cu ta di [bo] famia di fe” pasobra esaki lo duna bo bida berdadero proposito y lo yuda bo haya satisfaccion. (Galationan 6:9, 10) Santiago, disipel di Hesus, a skirbi: “Si un ruman homber of ruman mohe ta sin paña y den necesidad di e cuminda di cada dia, y un di boso bisa nan: ‘Bai na pas, tene bo curpa cayente y yena bo bariga’ y sinembargo, boso no ta duna nan loke ta necesario pa nan curpa, kico esei ta bal?” (Santiago 2:15, 16) E contesta riba e pregunta ei ta obvio. Nos no mester ‘busca nos interes personal so, ma busca tambe interes di otronan.’—Filipensenan 2:4.

Ademas di yuda otro hende cu cosnan material ora un necesidad special of desaster surgi, Testigonan di Yehova ta traha duro tambe pa beneficia nan prohimo den un manera cu ta sumamente importante: door di predica e evangelio di e Reino di Dios. (Mateo 24:14) E echo cu tin mas cu 6.000.000 Testigo ta participa den proclama e mensahe di speransa y consuelo aki ta duna prueba di nan berdadero interes amoroso den otro hende. Pero e yudansa cu nan ta duna for di e Scritura Santo tambe ta yuda satisface un otro necesidad di hende. Kico esei ta?

Satisfaciendo un Necesidad Vital

Pa nos disfruta di berdadero felicidad, nos mester tin un bon relacion cu Dios. Un autor a yega di bisa: “E echo cu hende di tur caminda y di tur tempo, for di principio te cu awor, a sinti e impulso pa invoca algo cu e ta kere ta mas eleva y mas poderoso cu ne, ta mustra cu e deseo pa adora ta algo cu nos a nace cu ne y esei ta un cos cu ciencia mester reconoce. . . . E manera cu hende di tur parti di mundo ta busca y kere den un ser supremo mester yena nos cu asombro y respet profundo.”—Man Does Not Stand Alone di A. Cressy Morrison.

Hesucristo a declara: “Felis ta esnan cu ta conciente di nan necesidad spiritual.” (Mateo 5:3, NW) Cos no ta bai bon pa hende cu ta isola nan mes hopi tempo for di otronan. Sinembargo, e situacion ta bira hopi mas serio ainda si nos isola nos mes for di nos Creador. (Revelacion 4:11) Adkiri y aplica “e conocemento di Dios” mester ta un parti importante di nos bida. (Proverbionan 2:1-5) Si, nos mester ta determina pa satisface nos necesidad spiritual, pasobra nos no por biba independiente ni sin yudansa di Dios. Un bida cu realmente ta duna nos satisfaccion ta depende di un bon relacion cu Yehova, “e Haltisimo riba henter tera.”—Salmo 83:18.

[Plachi na pagina 5]

Miguel: “Mi a pasa den hopi crisis, pero ora mi a cuminsa asocia cu e pueblo di Yehova, mi bida a cambia”

[Plachi na pagina 5]

Alma Ruth: “Ora mi a cuminsa siña tocante Yehova, mi a sinti cu mi por a sera un relacion intimo cu ne”

[Plachi na pagina 6]

Emelia: “Prome cu mi a conoce e berdad, . . . mi tawata sinti un bashi inmenso”

[Plachi na pagina 7]

Asociacion cu adoradonan berdadero ta yuda satisface nos necesidad spiritual