Ugarit—Un Stad Domina pa Adoracion di Baal

NA AÑA 1928, e herment di ploeg di un campesino Sirio a dal riba un piedra cu tawata tapa un graf cu a contene ceramica di antiguedad. E campesino no por a imagina con importante su descubrimento tawata. E siguiente aña un team di arkeologo Frances cu a tende di e hayasgo inespera aki, a biaha pa e sitio. E team tawata encabesa pa Claude Schaeffer.

No a tarda hopi cu e team a coba saca un inscripcion cu a yuda nan identifica e ruinanan cu tawata surgi for di nan trabou di coba e tereno cu cuchara di mesla. E luga tawata Ugarit, “un di e stadnan di antiguedad mas importante di Cercano Oriente.” Autor Barry Hoberman asta a bisa: “Ningun descubrimento arkeologico, ni sikiera esun di e Rolnan di Lama Morto, a causa un impacto asina profundo riba nos comprondemento di Bijbel.”—The Atlantic Monthly.

Crusada di Rutanan Strategico

Situa riba un serito conoci como Ras Shamra, na Costa Mediteraneo di loke awe ta den nort di Siria, Ugarit tawata un stad cosmopolita prospero cu a existi mas cu 3.000 aña pasa. Su teritorio a cubri un area cu a extende un 60 kilometer for di Sero Casio cu a keda den nort te na Tell Sukas den suit y 30 pa 50 kilometer for di Mediteraneo den west pa Vaye Orontes den oost.

Crio di bestia a prospera den e clima agradabel di Ugarit. E region a produci cereal, azeta di oleifi, biña y palo pa construccion, cu ta un producto hopi scars na Mesopotamia y Egipto. Ademas, e echo cu e stad tawata situa na un crusada di rutanan comercial strategico, a hacie un di e prome gran hafnan internacional. Na Ugarit comerciantenan for di Anatolia, Babilonia, Egeo, Egipto y otro partinan di Medio Oriente, a cumpra y bende metal, productonan di agricultura y un cantidad di mercancia produci localmente.

Apesar di su prosperidad material, semper Ugarit tawata un reino subordina. E stad tawata e base militar mas nort di e Imperio Egipcio te ora cu el a ser incorpora den e Imperio Heteo (of Hitita) den siglo 14 prome cu nos era. Ugarit tawata obliga na paga tributo y suministra solda na e rei cu a domin’e. Ora cu “Pueblonan di Lama”a a cuminsa destrosa Anatolia (Turkia central) y den nort di Siria, e Heteonan a exigi pa Ugarit manda su solda- y flotanan pa nan. Como resultado, Ugarit mes a keda sin defensa y a ser destrui completamente rond di aña 1200 prome cu nos era.

Restaurando Pasado

E destruccion di Ugarit a laga un enorme serito di casi 20 meter halto y cu a cubri un area di mas cu 25 bender of hectar. Un sexto parti so di e area aki nan a coba. Entre e ruinanan, arkeologonan a descubri e restonan di un inmenso compleho di palacio cu tawatin casi shen camber y varios plenchi y cu a cubri un tereno di un 10.000 meter cuadra. E compleho tawatin awa di tubo, toilet y un sistema di riolering. Mueblenan tawata fura cu oro, cu ivor y cu un piedra precioso blou cu yama lapis lazuli. Tambe nan a haya varios panel di ivor labra cu dibuhonan masha detaya. Un hardin sera cu muraya y un baki di awa den flur a haci e palacio mas atractivo ainda.

Loke a destaca riba e stad y e tereno plat rond di dje ta e tempelnan di Baal y Dagan.b E tempelnan aki cu tawata den forma di torennan di mas o menos 20 meter halto, a consisti di un lobby chikito cu a hiba na un cuarto interior caminda tawatin un imagen di e dios. Un trapi a hiba na un balcon caminda e rei tawata presidi durante varios ceremonia. Anochi of durante tormenta, nan lo tawata sende lus di faro riba e top di e tempelnan pa asina guia barconan sano y salvo den e haf. Nabegantenan cu a haya cu ta e dios di tormenta Baal-Hadad por tawata kier cu nan a regresa sano y salvo tawata dun’e ofrenda di gradicimento den forma di anker di piedra. Casi sigur ta di nan e 17 ankernan di piedra cu a haya den e santuario a bin.

Un Tesoro di Inscripcion

Nan a descubri miles di tabla di klei den tur parti di e ruinanan di Ugarit. A haya textonan economico, huridico, diplomatico y administrativo na ocho idioma, skirbi na cinco diferente letra of alfabet. E team di Schaeffer a haya inscripcionnan den un idioma cu te cu e tempo ei tawata desconoci—nan a dun’e e nomber Ugaritico—y cu a uza 30 simbolo di spijkerschrift, locual a hacie un di e alfabetnan mas bieu cu hamas nan a descubri.

Fuera di trata asuntonan di tur dia, e documentonan na idioma Ugaritico a contene textonan literario cu a duna expertonan un comprondemento nobo di e concepto- y practicanan religioso di e tempo ei. E religion di Ugarit ta parce di tawatin gran similaridad cu loke e Cananeonan biciña a practica. Segun Roland de Vaux, e textonan aki “ta un refleho basta exacto di civilisacion den e tera di Canan djis prome cu e Israelitanan a conkist’e.”

Religion den e Stad di Baal

E documentonan di Ras Shamra ta menciona mas cu 200 dios y diosa. E dios supremo tawata El, yama tata di e diosnan y di hende. Y e dios di tormenta Baal-Hadad tawata “e hinete di e nubianan” y “e señor di tera.” Nan a pinta El como un homber bieu y sabi cu barba blanco cu a keda leu for di humanidad. Na otro banda, Baal tawata un dios fuerte y ambicioso cu a trata na goberna riba e diosnan y humanidad.

E textonan cu nan a descubri probablemente tawata ser resita durante fiestanan religioso, manera aña nobo of fiesta di cosecha. Sinembargo, e interpretacion exacto no ta mucho cla. Den un poema tocante un disputa pa gobernacion, Baal ta derota El su yiu faborito, e dios di lama Yamm. Kisas ta e victoria aki a duna e nabegantenan di Ugarit e confiansa cu Baal lo proteha nan riba lama. Den un pelea cu Mot, Baal ta ser derota y ta baha den e mundo di mortonan. Esei ta causa un secura, y actividadnan humano ta stop. Anat, esposa y alabes ruman mohe di Baal—diosa di amor y guera—ta mata Mot y ta restaura Baal na bida. Baal ta masacra e yiunan di e esposa di El, Athirat (Asera), y ta recupera e trono. Pero Mot ta regresa shete aña despues.

Tin hende ta interpreta e poema aki como un simbolo di e ciclo anual di e temporadanan di aña durante cua e awasero cu ta duna bida ta ser venci door di e cayente di zomer y ta regresa den herfst. Otronan ta pensa cu e ciclo di shete aña ta relaciona cu miedo di hamber y secura. Den ambos caso, nan a considera e superioridad di Baal como algo esencial pa e exito di actividadnan humano. Erudito Peter Craigie a remarca: “E meta di e religion di Baal tawata pa sigura su supremacia; ta solamente ora el a keda supremo, segun su adoradonan, nan lo a sigui haya cosecha y crio di bestia cu tawata asina esencial pa sobrevivencia humano.”

Un Barera Contra Paganismo

Un cos cu ta destaca bon cla den e textonan cu nan a descubri ta e corupcion y perversion di e religion Ugaritico. The Illustrated Bible Dictionary ta bisa: “E textonan ta mustra e resultadonan degrada di adora e diosnan aki; cu nan enfasis riba guera, prostitucion sagrado, amor erotico y e degradacion social cu eseinan ta trece cu ne.” De Vaux a remarca: “Ora bo lesa e poemanan aki, bo ta compronde pakico berdadero creyentenan di Yahweh y e gran profetanan tawatin asco di e adoracion aki.” E Lei cu Dios a duna e antiguo nacion di Israel tawata un barera contra tal religion falso.

Wakmento di destino, astrologia y magia a ser practica ampliamente den Ugarit. Nan tawata busca señal pa sa futuro no solamente den cuerponan celestial sino tambe den feto deforma y den organonan di bestia cu nan mata. Historiado Jacqueline Gachet a comenta: “Nan a kere cu e dios na ken nan a ofrece un bestia sacrifica segun cierto rito, a bira un parti di dje y cu e spirito di e dios a join cu e spirito di e bestia. Pesei, door di lesa e marcanan visibel riba e organonan aki, tawata posibel pa determina e boluntad di e diosnan kendenan por a duna sea un contesta positivo of negativo riba un pregunta relaciona cu susesonan di futuro of relaciona cu kico pa haci den un situacion spesifico.” (Le pays d’Ougarit autour de 1200 av.J.C.) Na contraste, e Israelitanan mester a keda leu di e practicanan ei.—Deuteronomio 18:9-14.

E Lei di Moises claramente a prohibi tenemento di relacion sexual cu bestia. (Levitico 18:23) Con e pueblo di Ugarit a considera e practica aki? Den e documentonan cu nan a descubri, Baal ta tene relacion sexual cu un bishe. Arkeologo Cyrus Gordon a comenta: “Si e argumento ta cu Baal ta tuma e forma di un toro pa haci esei, pero no por bisa mescos di su sacerdotenan kendenan a ripiti e accionnan di su carera mitologico.”

E Israelitanan a ricibi e mandamento: “No haci ningun corta na boso curpa pa un morto.” (Levitico 19:28) Sinembargo, reaccionando riba e morto di Baal, e dios El “a corta su cuero cu un cuchiu, y cu un blit; el a corta su banda di cara y cachete.” Cortamento di curpa como rito aparentemente tawata un custumber serca adoradonan di Baal.—1 Reinan 18:28.

Ta parce cu un poema Ugaritico ta indica cu tawata comun den religion Cananeo pa herbe un yiu di cabrito den lechi como parti di un rito di fertilidad. Sinembargo, den e Lei di Moises, e Israelitanan a haya e siguiente mandamento: “No herbe un yiu di cabrito den lechi di su mama.”—Exodo 23:19.

Comparando Texto Biblico cu Texto Ugaritico

Originalmente nan a traduci e textonan Ugaritico principalmente cu yudansa di e Hebreo di Bijbel. Peter Craigie a remarca: “Tin hopi palabra cu e texto biblico Hebreo a uza di cua nan nificacion no ta mucho cla, y tin biaha nan ta desconoci; traductornan prome cu siglo 20 a rei nan posibel nificacion uzando varios medio. Pero ora e mesun palabranan ei ta aparece den e texto Ugaritico, ta bira posibel pa compronde e nificacion.”

Por ehempel, un palabra Hebreo uza na Isaias 3:18 por lo general ta ser traduci como “banchi pa bisti na frenta.” E raiz di un palabra Ugaritico paresido ta referi na tanto solo como e diosa di solo. Pues, e mohenan di Herusalem menciona den e profecia di Isaias kisas a dorna nan mes cu hanger chikito den forma di solo y tambe den forma di luna (“luneta”) na honor di diosnan Cananeo.

Na Proverbionan 26:23 den e texto masoretico, “lipnan ferviente y un mal curason” ta ser compara cu un articulo di klei pasa den “scuma di plata.” E raiz di un palabra Ugaritico ta permiti pa traduci e comparacion “manera un capa lombrante riba pida klei.” Beibel na papiamentu koriente apropiadamente a traduci e proverbio aki: “Palabranan bunita for di un curason cu mal intencion ta manera un bañ’i plata riba un pochi di klei.”

Fundeshi di Bijbel?

Examinacion di e textonan di Ras Shamra a pone algun experto yega na e conclusion cu cierto pasashinan di Bijbel ta un adaptacion di e literatura poetico di Ugarit. Por ehempel André Caquot, miembro di e Instituto Frances, a bisa cu “e base cultural Cananeo ta fundeshi di e religion Israelita.”

Relaciona cu Salmo 29, Mitchell Dahood di e Instituto Biblico Pontifical na Roma a bisa: “E salmo aki ta e manera cu adoradonan di Yahweh a adapta un himno Cananeo mas bieu dedica na e dios di tormenta Baal . . . Casi tur palabra den e salmo bo por haya bek den textonan Cananeo mas bieu.” Tal conclusion ta hustifica? Absolutamente cu no!

Expertonan un poco mas cauteloso ta admiti cu e similaridadnan a ser exagera. Teologo Garry Brantley a declara: “Ni un solo texto Ugaritico ta paralelo cu henter Salmo 29. . . . No tin ningun base di evidencia pa sugeri cu Salmo 29 (of cualkier otro texto biblico) ta un adaptacion di un mito pagano.”

E echo cu tin similaridad den e uzo di comparacionnan, paralelonan poetico y rasgonan di estilo ta un prueba di adaptacion? Al contrario, bo mester spera tal paralelo. The Encyclopedia of Religion ta bisa: “Nan forma y contenido ta mescos pasobra nan ta bini di e mesun cultura: apesar di e gran diferencia geografico y di tempo entre Ugarit y Israel, nan tawata parti di un entidad cultural mas grandi cu a comparti e mesun vocabulario poetico y religioso.” Pesei Garry Brantley a conclui: “No ta corecto pa splica cu creencianan pagano ta forma e fuente di texto biblico djis pasobra nan tin similaridadnan linguistico.”

Por ultimo mester bisa cu si tin cualkier paralelo entre e textonan di Ras Shamra y Bijbel, nan ta puramente literario y no spiritual. Arkeologo Cyrus Gordon a remarca: ‘Den Ugarit bo no ta haya e nivelnan etico y moral cu Bijbel ta alcansa.’ En realidad, tin mucho mas diferencia cu tin similaridad.

E investigacionnan di Ugarit probablemente lo sigui yuda studiantenan di Bijbel compronde e ambiente cultural, historico y religioso di e escritornan biblico y di e nacion Hebreo en general. Mas examinacion di e textonan di Ras Shamra kisas lo por tira lus nobo riba e comprondemento di e antiguo Hebreo. Sinembargo, mas cu tur cos, e descubrimentonan arkeologico na Ugarit ta resalta claramente e contraste entre e adoracion degrada di Baal y e adoracion puro di Yehova.

[Nota]

[Comentario na pagina 25]

Descubrimentonan arkeologico na Ugarit a mehora nos comprondemento di e Scritura

[Mapa/Plachi na pagina 24, 25]

(Pa texto den formato completo, wak publicacion)

Imperio Heteo den siglo 14 prome cu nos era

LAMA MEDITERANEO

Eufrates

SERO CASIO (JEBEL EL-AGRA)

Ugarit (Ras Shamra)

Tell Sukas

Orontes

SIRIA

EGIPTO

[Reconocemento]

Estatua chikito di Baal y copa den forma di cabes di un bestia: Musée du Louvre, Paris; pintura di e palacio real: © D. Héron-Hugé pour “Le Monde de la Bible”

[Plachi na pagina 25]

Restonan di e entrada di e palacio

[Plachi na pagina 26]

Un poema Ugaritico di mitologia kisas ta duna informacion cu ta yuda aclara Exodo 23:19

[Reconocemento]

Musée du Louvre, Paris

[Plachi na pagina 27]

Piedra inscribi di Baal

Tayo di oro cu dibuho di un esena di yagmento

Tapa di ivor di un caha di cosmetico cu dibuho di un diosa di fertilidad

[Reconocemento]

Tur potret: Musée du Louvre, Paris