Yehova, e Dios di Berdad

“Bo ta salba mi, SEÑOR, Dios di berdad.”—SALMO 31:5, Beibel na papiamentu koriente.

1. Ki condicion tawatin den shelo y riba tera tempo cu no tawatin mentira?

TAWATIN un tempo cu no tawatin mentira. Den shelo invisibel tawatin criaturanan spiritual perfecto ta sirbi nan Creador, “e Dios di berdad.” (Salmo 31:5, BPK) No tawatin ningun falsedad, ningun engaño. Yehova a comunica loke ta berdad na su yiunan spiritual. El a haci esei pasobra el a stima nan y pasobra e tawata profundamente interesa den nan bienestar. E situacion riba tera tawata mescos. Yehova a crea e prome homber y mohe, y mediante su bosero, semper el a papia berdad cu nan den un manera cla y stret. Esei lo mester tawata algo maraviyoso!

2. Ken a introduci mentira, y pakico?

2 Sinembargo, cu tempo un yiu spiritual di Dios tawatin e tribilidad di cuminsa opone Yehova door di establece su mes como un dios rival. E criatura spiritual aki, cu a bira conoci como Satanas e Diabel, tawata kier pa otronan ador’e. Pa logra su meta, el a introduci mentira como e medio pa trece otronan bou di su control. Door di haci esei el a bira “un gañado y e tata di mentira.”—Huan 8:44.

3. Con Adam cu Eva a reacciona riba e mentiranan di Satanas, y cu ki resultado?

3 Via un colebra, Satanas a bisa e prome mohe, Eva, cu si e ignora e mandamento di Dios y come e fruta prohibi, lo e no muri. Esei tawata un mentira. Ademas Satanas a bis’e cu door di come e fruta lo e bira manera Dios, conociendo bon y malo. Esei tambe tawata un mentira. Aunke nunca prome Eva a tende un mentira, e mester a ripara cu loke el a tende for di e colebra no tawata cuadra cu loke Dios a bisa su casa Adam. Pero toch, Eva a scohe pa kere Satanas y no Yehova. Siendo totalmente gaña, el a coi e fruta y a com’e. Despues, Adam tambe a come e fruta. (Genesis 3:1-6) Mescos cu Eva, Adam tampoco no a tende un mentira nunca, y toch e no a wordo gaña. (1 Timoteo 2:14) Pero cu su accion el a demostra cu el a rechasa Esun cu a trah’e. E consecuencianan pa humanidad tawata desastroso. Debi na Adam su desobediencia, pica y morto—hunto cu corupcion y hopi miseria—a plama na tur su desendencia.—Romanonan 5:12.

4. (a) Kico tawata e mentiranan cu Satanas a papia den Eden? (b) Kico nos tin cu haci pa Satanas no gaña nos?

4 Hunto cu eseinan, mentira tambe a plama. Nos tin cu admiti cu e mentiranan ei cu Satanas a papia den e hofi di Eden tawata pa daña Yehova su reputacion como un Dios cu ta papia berdad. Satanas a declara cu conviccion cu Dios na un manera engañoso a priva e prome pareha di algo bon. Claro cu esei no tawata berdad. Adam cu Eva no a beneficia di nan desobediencia. Nan a muri, manera Yehova a bisa cu lo a pasa cu nan. No obstante, Satanas a sigui calumnia Yehova te na e grado cu siglonan despues apostel Huan a wordo inspira pa skirbi cu Satanas “ta gaña henter mundo.” (Revelacion 12:9) Pa evita cu Satanas e Diabel ta gaña nos, nos mester tin pleno confiansa cu loke Yehova y su Palabra ta bisa ta berdad. Con bo por desaroya bo confiansa den Yehova y hacie mas firme? Y con bo por fortalece bo mes contra e engaño y mentiranan cu Yehova su Adversario ta fomenta?

Yehova Sa e Berdad

5, 6. (a) Ki conocemento Yehova ta posee? (b) Con hende su conocemento ta compara cu esun di Yehova?

5 Bijbel consistentemente ta identifica Yehova como esun cu “a crea tur cos.” (Efesionan 3:9) Ta e “a traha shelo y tera y lama y tur loke tin den nan.” (Echonan 4:24) Siendo cu ta Yehova ta e Creador, e sa e berdad di tur cos. Pa ilustra esaki, pensa riba un homber cu a diseña su mes cas y despues a trah’e, pegando cada tabla y clabando delaster un clabo. Lo e conoce tur nachi di e cas y lo ta compronde miho cu cualkier observado con e cas ta hinca den otro. Hende sa tur detaye di e cosnan cu nan diseña y traha. Asina tambe e Creador sa tur loke tin di sa tocante loke el a crea.

6 Cu bunita palabra profeta Isaias a expresa e magnitud di Yehova su conocemento. Nos ta lesa: “Ta ken a midi e awanan den e hol di su man, a marca e shelonan cu e hanchura di su man, a calcula e stof di tera cu un midi y a pisa e seronan den un balansa, y e seritonan cu peso? Ta ken a dirigi e spirito di SEÑOR, of a instru’e como su consehero? Ta ken el a consulta y ta ken a dun’e comprondemento? Ta ken a siñ’e den e caminda di husticia y a siñ’e conocemento, y a instru’e e caminda di comprondemento?” (Isaias 40:12-14) Realmente Yehova ta “un Dios di conocemento” y ta “perfecto den conocemento.” (1 Samuel 2:3; Job 36:4, NW; 37:16) Esta tiki nos sa na comparacion cu ne! Apesar di e conocemento impresionante cu humanidad a acumula, nos comprondemento di e creacion material no ta ni sikiera “un punta di loke Dios a haci.” E ta djis “un vrunvrun” compara cu un “zonido poderoso.”—Job 26:14, BPK.

7. Kico David a reconoce tocante e conocemento di Yehova, y pesei kico nos tin cu reconoce?

7 Siendo cu ta Yehova a crea nos, ta logico pa conclui cu e conoce nos bon. Rei David a reconoce esaki. El a skirbi: “O SEÑOR, bo a samina mi y bo conoce mi. Bo sa ki ora mi ta sinta y ki ora mi ta lanta; bo ta compronde mi pensamentonan djaleu. Bo ta scudriña mi canamento y mi drumimento, y tur mi camindanan ta conoci pa bo. Prome cu tin un palabra riba mi lenga, ya bo conoce esaki caba, o SEÑOR.” (Salmo 139:1-4) Claro cu David tawata sa cu hende tin boluntad liber; Dios a duna nos e capasidad di obedece of desobedece Dios. (Deuteronomio 30:19, 20; Hosue 24:15) No obstante, Yehova conoce nos miho cu nos conoce nos mes. E kier loke ta miho pa nos, y e por dirigi nos caminda. (Yeremias 10:23) Si, no tin ningun maestro ni experto ni consehero miho ekipa cu ne pa siña nos e berdad y haci nos sabi y felis.

Yehova Ta Papia Berdad

8. Con bin nos sa cu Yehova semper ta papia berdad?

8 Sa e berdad ta un cos, pero semper ser honesto y papia e berdad ta henteramente un otro cos. Por ehempel, Diabel a scohe pa no “para den e berdad.” (Huan 8:44) Na contraste, Yehova ta “abunda den . . . berdad.” (Exodo 34:6) E Scritura consistentemente ta duna testimonio di e echo cu Yehova ta papia berdad. Apostel Pablo a declara cu “ta imposibel pa Dios gaña”, y cu Dios “no por gaña.” (Hebreonan 6:18; Tito 1:2) Papia berdad ta un parti importante di Dios su personalidad. Nos por steun riba Yehova y confi’e pasobra semper e ta papia berdad; nunca e ta gaña su sirbidonan leal.

9. Con Yehova su nomber ta conecta cu berdad?

9 Asta Yehova su nomber ta duna testimonio cu semper e ta papia berdad. E nomber dibino ta nifica “E Ta Causa pa Bira.” Esaki ta identifica Yehova como esun cu progresivamente ta bira Cumplidor di tur loke e priminti. Ningun otro persona tin e capasidad ei. Debi cu Yehova ta Esun Supremo, no tin nada cu por stroba su propositonan di wordo realisa. Yehova no solamente ta papia berdad, sino tambe ta e so tin e poder y sabiduria pa realisa tur loke e bisa.

10. (a) Con Hosue tawata testigo di cu Yehova ta papia berdad? (b) Cua promesanan di Yehova abo a mira cumpli?

10 Hosue tawata un di e hopi personanan cu a mira susesonan remarcabel cu a duna testimonio cu Yehova ta papia berdad. Hosue tawata na Egipto ora cu Yehova a trece dies plaga riba e nacion ei. Y cada un di e plaganan ei Yehova a profetisa di antemano. Entre e cosnan profetisa cu Hosue a experencia nan cumplimento ta Yehova su promesa di libra e Israelitanan for di Egipto y hiba nan na e Tera Priminti, dominando e poderoso ehersitonan Cananeo cu a bringa contra nan. Na fin di su bida, Hosue a bisa e ancianonan di e nacion di Israel: “Boso sa di henter boso curason y di henter boso alma cu ni un palabra di tur e bon palabranan cu SEÑOR boso Dios a papia tocante di boso no a faya; tur a keda cumpli pa boso, ni un di nan no a faya.” (Hosue 23:14) Aunke abo no a mira e milagernan cu Hosue a mira, bo a experencia durante bo bida cu e promesanan di Dios ta cumpli?

Yehova Ta Revela e Berdad

11. Kico ta mustra cu Yehova kier comunica e berdad na humanidad?

11 Imagina bo un mayor cu tin hopi conocemento pero cu masha poco biaha ta papia cu su yiunan. Abo no ta contento cu Yehova no ta asina? Yehova amorosamente ta comunica cu humanidad, y e ta hacie na abundancia. E Scritura ta yam’e e “Magnifico Instructor.” (Isaias 30:20, NW) Den su bondad amoroso, e ta comunica asta cu esnan cu no ta inclina na scuch’e. Por ehempel, Ezekiel a ser asigna pa predica na hende cu Yehova tawata sa cu nan lo no ta dispuesto pa ricibie. Yehova a bisa: “Yiu di hende, bai serca e cas di Israel y papia cu nan cu mi palabranan.” Anto Yehova a spiert’e: “[Nan] lo no ta dispuesto pa scucha na bo, pasobra nan no ta dispuesto pa scucha na mi. Pasobra henter e cas di Israel ta cabesura y soberbe.” Esei tawata un asignacion dificil, pero Ezekiel a cumpli cu ne fielmente, y door di haci esei, el a refleha Yehova su compasion. Si abo tin un teritorio dificil pa predica y bo ta depende riba Dios, bo por tin sigur cu lo e fortalece bo mescos cu el a fortalece profeta Ezekiel.—Ezekiel 3:4, 7-9.

12, 13. Den ki maneranan Dios a comunica cu hende?

12 Yehova ta desea pa “tur hende wordo salba y yega na conocemento di e berdad.” (1 Timoteo 2:4) El a papia pa medio di profeta, pa medio di angel y asta pa medio di su Yiu stima, Hesucristo. (Hebreonan 1:1, 2; 2:2) Hesus a bisa Pilato: “Pa esaki mi a nace y pa esaki mi a bin den mundo, pa duna testimonio di e berdad. Tur esnan cu ta [na banda] di e berdad ta tende mi bos.” Pilato tawatin e oportunidad preciosisimo pa siña directamente for di e Yiu di Dios e berdad tocante Yehova su areglo pa haya salbacion. Sinembargo, Pilato no tawata na banda di e berdad, y e no kier a siña for di Hesus. En bes di esei, Pilato a puntra cu un tono di duda y menosprecio: “Kico ta berdad?” (Huan 18:37, 38) Loke el a haci ta hopi lamentabel! Sinembargo, hopi hende si a tende e berdad cu Hesus a proclama. El a bisa su disipelnan: “Bendiciona ta boso wowonan, pasobra nan ta mira; y boso horeanan, pasobra nan ta tende.”—Mateo 13:16.

13 Yehova a conserva e berdad mediante e Bijbel y a hacie disponibel pa hende rond mundo. Bijbel ta revela cosnan manera nan ta. E ta describi Dios su cualidadnan, propositonan y mandamentonan, y tambe e berdadero condicion di e situacion di humanidad. Hesus a bisa Yehova den oracion: “Bo palabra ta berdad.” (Huan 17:17) Esaki ta haci Bijbel un buki unico. Ta e so a wordo skirbi bou di inspiracion di e Dios cu sa tur cos. (2 Timoteo 3:16) Bijbel ta un regalo precioso cu Dios a duna humanidad, un regalo cu su sirbidonan ta atesora. Ta sabi pa les’e tur dia.

Tene Duro na e Berdad

14. Kico ta algun cos cu Yehova ta bisa cu lo e haci, y pakico nos lo mester ker’e?

14 Nos mester tuma na serio loke Yehova ta bisa nos den su Palabra. E ta loke e ta bisa cu e ta, y lo e haci loke e bisa cu e ta bai haci. Nos tin tur motibo pa confia den Dios. Nos por kere Yehova ora e ta bisa cu lo e “duna pago mereci na esnan cu no conoce Dios y na esnan cu no ta obedece e evangelio di nos Señor Hesus.” (2 Tesalonicensenan 1:8) Tambe nos por kere Yehova ora e ta bisa cu e ta stima esnan cu ta sigui husticia, ora e ta bisa cu lo e duna bida eterno na esnan cu eherce fe, y ora e ta bisa cu lo e elimina dolor, yoramento y asta morto. Yehova a enfatisa cu e ultimo promesa ei ta confiabel door di duna e siguiente instruccion na apostel Huan: “Skirbi, pasobra e palabranan aki ta fiel y berdadero.”—Revelacion 21:4, 5; Proverbionan 15:9; Huan 3:36, NW.

15. Menciona algun mentira cu Satanas ta fomenta.

15 Satanas ta exactamente lo contrario di Yehova. En bes di ilumina hende, e ta gaña nan. Pa logra su meta di desvia hende for di adoracion puro, Satanas ta fomenta un cantidad di mentira. Por ehempel, Satanas kier pa nos kere cu Dios no ta sinti cu ta necesario pa nos tin un relacion intimo cu ne y cu e no tin cunes cu e sufrimento cu ta tumando luga riba tera. Sinembargo, Bijbel ta mustra cu Yehova ta profundamente interesa den su criaturanan y cu e ta lamenta e maldad y sufrimento cu ta tuma luga. (Echonan 17:24-30) Tambe Satanas kier pa hende kere cu actividadnan spiritual ta perdemento di tempo. Pero na otro banda e Scritura ta sigura nos cu “Dios no ta inhusto pa lubida boso trabou y e amor cu boso a mustra pa su nomber.” Ademas, Bijbel ta mustra bon cla cu Dios “ta recompensa esnan cu ta busc’e.”—Hebreonan 6:10; 11:6.

16. Dicon cristiannan mester keda alerta y tene duro na e berdad?

16 Apostel Pablo a skirbi relaciona cu Satanas: “E dios di e mundo aki a ciega mente di esnan cu no ta kere, pa nan no mira e lus di e evangelio di e gloria di Cristo, kende ta e imagen di Dios.” (2 Corintionan 4:4) Tin hende cu, mescos cu Eva, ta completamente gaña door di Satanas e Diabel. Otronan ta sigui e rumbo di Adam, kende no a wordo gaña pero cu deliberadamente a scohe e caminda di desobediencia. (Hudas 5, 11) Pues, ta masha importante pa cristiannan keda alerta y tene duro na e berdad.

Yehova Ta Rekeri “Fe Sinsero”, sin Hipocresia

17. Kico nos tin cu haci pa haya Yehova su aprobacion?

17 Como cu Yehova ta refleha berdad den tur loke e haci, e ta spera di esnan cu ta ador’e pa nan tambe ta asina. E salmista a skirbi: “O SEÑOR, ken por biba den bo tabernakel? Ken por biba riba bo sero santo? Esun cu ta cana den rectitud y ta haci husticia, y ta papia berdad den su curason.” (Salmo 15:1, 2) Pa e Hudiunan cu a canta e palabranan ei, e mencion di Yehova su sero santo sin duda a pone nan corda riba Sero Sion, caminda David a trece e arca di pacto den e tabernakel (of tent) cu el a lanta einan. (2 Samuel 6:12, 17) E sero y e tabernakel a recorda nan di e luga caminda Yehova a biba simbolicamente. Einan hende por a acerca Dios pa suplic’e pa nan haya su aprobacion.

18. (a) Kico ta e rekisitonan pa nos por tin amistad cu Dios? (b) Kico nos lo trata den e siguiente articulo?

18 Ken cu kier tin amistad cu Yehova mester papia berdad “den su curason”, no cu boca so. Berdadero amigonan di Dios mester tin un curason honesto y mester duna prueba di tin “fe sinsero”, es decir, sin hipocresia, pasobra obranan cu ta cuadra cu berdad ta sali for di curason. (1 Timoteo 1:5; Mateo 12:34, 35) Un amigo di Dios no ta tramposo ni engañoso, pasobra Yehova ‘ta aborece e homber gañado.’ (Salmo 5:6) Testigonan di Yehova rond mundo ta traha duro pa papia berdad y asina imita nan Dios. E siguiente articulo lo analisa esaki.

Con Lo Bo Contesta?

• Dicon Yehova sa e berdad di tur cos?

• Kico ta demostra cu Yehova ta papia berdad?

• Con Yehova a revela e berdad?

• Kico ta ser rekeri di nos relaciona cu berdad?

[Plachi na pagina 10]

E Dios di berdad sa tur cos di loke el a crea

[Plachi na pagina 12, 13]

E promesanan di Yehova lo wordo realisa