Nos Lo Cana den e Nomber di Yehova pa Semper!

“Nos . . . lo cana den e nomber di SEÑOR nos Dios pa semper y semper.”—MIKEAS 4:5.

1. Ki mensahe Mikeas capitulo 3 pa 5 ta contene?

YEHOVA tin algo di bisa su pueblo, y e ta uza Mikeas como su profeta. Dios su proposito ta pa tuma accion contra hacidonan di maldad. E ta bai castiga Israel pa su apostasia. No obstante, felismente, Yehova ta bai bendiciona hende cu ta cana den su nomber. E mensahenan aki ta bin bon cla padilanti den capitulo 3 pa 5 di e profecia di Mikeas.

2, 3. (a) Ki cualidad e lidernan di Israel mester desplega, pero en realidad kico nan ta haciendo? (b) Con lo bo splica e idioma simbolico na Mikeas 3:2 y 3?

2 E profeta di Dios ta declara: “Tende awor, cabesantenan di Yacob y gobernantenan di e cas di Israel. Boso no mester conoce husticia?” Si, nan mester a ocupa nan mes cu husticia. Pero, ta kico nan ta haciendo en bes di esei? Mikeas ta bisa: “Boso cu ta odia bondad y ta stima maldad, cu ta ranca e cuero di mi pueblo kita for di nan curpa y e carni for di nan wesonan, y cu ta come e carni di mi pueblo, cu ta ranca nan cuero kita for di nan curpa, cu ta kibra nan wesonan, y cu ta kap nan na pida-pida manera carni pa bai weya , y manera carni den weya .”—Mikeas 3:1-3.

3 Figura bo, ta net e lidernan ta oprimi hende pober y indefenso! Ta facil pa cualkier hende cu tende Mikeas compronde e idioma simbolico cu el a uza aki. Ora di cushina un carne cu nan a mata, prome nan tawata kita su cuero, y despues kap e na pida pida. Tin bes nan tawata kibra e wesonan pa laga e tuti di weso sali. Nan tawata cushina e carni hunto cu e wesonan den un weya grandi, manera esun cu Mikeas a menciona. (Ezekiel 24:3-5, 10) Ta un bon ilustracion pa describi e abuso cu e pueblo den e tempo di Mikeas mester a wanta na man di nan lidernan malbado!

Yehova Ta Spera di Nos pa Nos Practica Husticia

4. Ki contraste tin entre Yehova y e lidernan di Israel?

4 Tin un contraste grandi entre Yehova, e Wardador amoroso, y e lidernan di Israel. Door cu nan no ta practica husticia, nan no ta cumpliendo cu e encargo cu nan a haya pa proteha e tou. En bes di esei, manera Mikeas 3:10 ta bisa, nan ta probecha egoistamente di e carnenan simbolico. Nan no ta trata nan cu husticia y ta somete nan na “dramamento di sanger.” Kico nos por siña for di e situacion aki?

5. Kico Yehova ta spera di esnan cu ta hiba delantera den su pueblo?

5 Dios ta spera di esnan cu ta hiba delantera den su pueblo pa nan actua cu husticia. Y esei ta loke nos ta mira sosode den Yehova su sirbidonan awe. Esaki ta cuadra tambe cu Isaias 32:1, caminda nos ta lesa: “Mira, un rei lo reina cu husticia, y prinsnan lo goberna cu huicio.” Pero kico nos ta haya den tempo di Mikeas? E lidernan “cu ta odia bondad y ta stima maldad” ta blo corumpi husticia.

Ken Su Oracionnan Ta Ser Contesta?

6, 7. Ki punto importante Mikeas 3:4 ta enfatisa?

6 E malbadonan cu a biba den tempo di Mikeas por spera di haya Yehova su aprobacion? Claro cu no! Mikeas 3:4 ta declara: “Nan lo sclama na SEÑOR, ma e lo no contesta nan. Al contrario, e lo sconde su cara pa nan e tempo ei, pasobra nan echonan tawata malo.” Esaki ta enfatisa un punto hopi importante.

7 Yehova lo no contesta nos oracionnan si nos ta practica pica. Esaki ta e caso sigur si nos ta hiba un bida dobel, esta, sconde nos maldad anto pretende di ta sirbi Dios fielmente. Na Salmo 26:4 David a canta: “Mi no ta sinta hunto cu hombernan gañado, tampoco lo mi no anda cu hipocritanan.” Si David mes no a anda cu hende hipocrita, Yehova sigur lo no contesta oracion di hende cu ta desobedece su Palabra deliberadamente!

Cu Poder di e Spirito di Dios

8. Ki spiertamento e profetanan falso di Mikeas su tempo a haya?

8 Practicanan deplorabel a para bira normal pa e lidernan spiritual di Israel! Profeta falso ta pone e pueblo di Dios dual den sentido spiritual. E lidernan haragan pa cos ta grita “Pas!”, pero en realidad nan ta declara guera santo contra esnan cu no ta pone nada den nan boca. “Pesei”, Yehova ta bisa, “lo ta nochi pa boso—sin vision, y scuridad pa boso—sin adivinacion. Solo lo drenta over di e profetanan, y dia lo bira scur over di nan. E miradonan lo keda na berguensa, y e adivinadonan lo keda brongosa. Di berdad, nan tur lo tapa nan boca.”—Mikeas 3:5-7a.

9, 10. Kico ta nifica ‘tapa boca’, y pakico Mikeas si no tin nodi haci esei?

9 Pakico e hendenan malbado den tempo di Mikeas tin cu “tapa nan boca”? Pa motibo di berguensa. Y e malbadonan ei mester tin berguensa en berdad. “No ta bin contesta for di Dios” pa nan. (Mikeas 3:7b) Yehova no ta presta atencion na oracion di hende orguyoso y malbado.

10 Mikeas si no tin motibo pa ‘tapa su boca.’ E no ta sinti berguensa. Yehova ta contesta su oracionnan. Wak kico e profeta fiel ta bisa na Mikeas 3:8: “Ma al contrario, ami ta yen di poder—cu e spirito di SEÑOR—y cu husticia y curashi.” Mikeas ta masha gradicido cu durante henter su ministerio largo y fiel, semper e tawata “yen di poder—cu e spirito” di Yehova! Esei a dun’e forsa pa “haci Yacob conoce su echo di rebeldia, y Israel su pica.”

11. Con hende ta haya forsa pa declara e mensahenan di Dios?

11 Forsa humano so no ta suficiente pa Mikeas proclama Dios su mensahe di condenacion. Tambe e tin mester di Yehova su spirito, of forsa activo poderoso. Kico di nos? E unico manera cu nos por cumpli cu nos encargo pa predica ta si Yehova fortalece nos pa medio di su spirito santo. Si nos practica pica deliberadamente, nos esfuersonan pa predica lo fracasa sigur. Dios lo no contesta nos ora nos resa pidie forsa pa cumpli cu su trabou. Si e ‘spirito di Yehova’ no ta riba nos, definitivamente nos lo no por declara e mensahenan di huicio di nos Tata celestial. Mescos cu Mikeas, nos por papia e palabra di Dios cu curashi door cu Yehova ta scucha nos oracionnan y nos tin e yudansa di spirito santo.

12. Pakico e prome disipelnan di Hesus por a ‘papia e palabra di Dios cu tur curashi’?

12 Kisas bo ta corda e relato cu tin na Echonan 4:23-31. Imagina cu abo ta un di e disipelnan di Hesus den prome siglo. Persiguidonan fanatico tin algun tempo caba ta silencia e siguidonan di Cristo. Pero e sirbidonan leal aki ta resa pidi nan Señor Soberano: “[Yehova], tuma nota di nan menasanan y laga bo sirbidonan papia bo palabra cu tur frankesa [“curashi”, NW].” Kico ta e resultado? Ora nan haci nan suplica, e luga caminda nan a bin hunto ta wordo sagudi, y nan tur ta wordo yena cu spirito santo y ta cuminsa papia e palabra di Dios cu curashi. Pesei, laga nos acerca Yehova den oracion y depende riba su yudansa pa medio di spirito santo segun cu nos ta cumpli cu nos ministerio.

13. Kico lo sosode cu Herusalem y Samaria, y pakico?

13 Pensa atrobe riba Mikeas su tempo. Segun Mikeas 3:9-12, e lidernan culpabel di dramamento di sanger ta pronuncia huicio pa placa pasa bou di mesa, e sacerdotenan ta exigi pago pa nan instrui, y e profetanan falso ta mira destino pa placa. Nada straño anto cu Dios a decreta cu e capital di Huda, esta, Herusalem, “lo bira un monton di ruina”! Adoracion falso y corupcion moral ta reina na Israel tambe, pesei Dios ta inspira Mikeas pa e spierta nan cu Dios ta bai haci Samaria “un monton di ruina.” (Mikeas 1:6) De echo, Mikeas ta biba pa mira cumplimento di e profecia tocante e destruccion di Samaria na man di e trupanan di Asiria, na aña 740 prome cu nos era. (2 Reinan 17:5, 6; 25:1-21) Ta bisto cu ta cu e poder di Yehova so Mikeas por a entrega e mensahenan poderoso aki contra Herusalem y Samaria.

14. Con e profecia di Mikeas 3:12 a cumpli, y ki efecto esei mester tin riba nos?

14 Definitivamente Huda no por scapa e condenacion di Yehova. E profecia registra na Mikeas 3:12 ta bisa cu Sion lo “wordo geploeg manera un cunucu.” Nos cu ta biba den siglo 21 tin e bentaha di por wak bek den historia y mira cu e cosnan aki a tuma luga ora e Babilonionan a destrui Huda y Herusalem na aña 607 prome cu nos era. Esei a tuma luga hopi aña despues cu Mikeas a profetisa tocante dje, pero e tawatin sigur cu e destruccion tawata na caminda. Sin duda nos tambe mester tin e mesun confiansa cu e sistema di cosnan di e mundo malbado djawe lo caba na nada ora e “dia” profetisa di Yehova yega.—2 Pedro 3:11, 12.

Yehova Ta Rectifica Asuntonan

15. Con lo bo describi e profecia registra na Mikeas 4:1-4 den bo mes palabranan?

15 Ora nos sigui lesa, nos ta mira con Mikeas ta transmiti un mensahe di speransa hopi emocionante. E palabranan cu nos por lesa na Mikeas 4:1-4 ta masha animante! Un parti di dje ta bisa: “Lo sosode den e ultimo dianan cu e sero di e cas di SEÑOR lo wordo estableci como hefe di e seronan. E lo wordo halsa mas halto cu e seritonan, y e pueblonan lo basha bai na dje. . . . Y e lo husga entre hopi pueblo y haci decision pa nacionnan leu y poderoso. E ora ei nan lo bati nan spadanan traha ploeg cu nan, y nan lo bati nan lansanan traha sker pa snui cu nan; nacion lo no lanta spada contra nacion, y nunca mas nan lo no train pa guera. Y cada un di nan lo sinta bou di su palo di wendruif y bou di su palo di figo, y ningun hende lo no spanta nan, pasobra e boca di e SEÑOR di ehersitonan a papia.”

16, 17. Con Mikeas 4:1-4 ta cumpliendo awe?

16 Ta cua ta e ‘hopi pueblonan’ y ‘nacionnan poderoso’ menciona aki? Eseinan no ta e nacionnan y gobiernonan di e mundo aki. Mas bien, e profecia ta aplica na personanan individual di tur e nacionnan cu ta uni nan mes den sirbishi sagrado na Yehova su sero di adoracion berdadero.

17 Manera e profecia di Mikeas a bisa, pronto hende rond mundo lo practica Yehova su adoracion puro. Aworaki mes caba, hende cu ta “corectamente dispuesto pa bida eterno” ta siña di Yehova su camindanan. (Echonan 13:48, NW) Yehova ta ‘husga y haci decision’, of miho bisa, rectifica asuntonan den sentido spiritual pa creyentenan cu ta scohe e banda di e Reino. Nan lo sobrevivi e “gran tribulacion” como parti di e “multitud grandi.” (Revelacion 7:9, 14) Ya cu nan a bati nan spada traha ploeg, nan ta biba for di awor na pas cu nan compañeronan Testigo di Yehova, y cu otro hende. Ki un goso pa ta entre nan!

Determina pa Cana den e Nomber di Yehova

18. Kico e ‘sintamento bou di bo mes mata di wendruif y palo di figo’ ta simbolisa?

18 Awor cu den nos tempo miedo ta colga riba henter mundo manera nubia scur, ta emocionante pa mira cu tin hopi hende ta siña Yehova su camindanan. Nos ta anhela e dia, cu awor ta asina serca, ora cu tur hende cu stima Dios lo no siña di guera mas. Nan lo sinta bou di nan mes mata di wendruif y palo di figo. Hopi bes sa tin palo di figo planta den hofi di wendruif. (Lucas 13:6) Sinta bou di bo mes mata di wendruif y palo di figo ta simbolisa pas, prosperidad y siguridad. Aworaki mes caba, nos relacion cu Yehova ta duna nos pas mental y siguridad spiritual. Ora e situacionnan ei ta existi bou di e gobernacion di e Reino, nos lo ta completamente sigur y sin miedo.

19. Kico ta nifica cana den e nomber di Yehova?

19 Pa nos por haya Dios su aprobacion, nos tin cu cana den Yehova su nomber. Na un manera firme e profeta ta trece esaki dilanti na Mikeas 4:5: “Tur e pueblonan ta cana cada un den e nomber di su dios, ma pa loke ta nos, nos si lo cana den e nomber di [“Yehova”, NW] nos Dios pa semper y semper.” Cana den e nomber di Yehova no ta nifica djis bisa cu e ta nos Dios. Nos tin cu haci mas cu djis participa den reunionnan cristian y e trabou di predica e Reino, aunke e actividadnan ei tambe ta vital. Si nos ta cana den e nomber di Yehova, nos ta dedica na dje y nos ta haci esfuerso pa sirbie fielmente pa motibo di nos amor profundo p’e. (Mateo 22:37) Y como su adoradonan, claro cu nos ta determina pa cana den e nomber di Yehova nos Dios pa tur eternidad.

20. Kico Mikeas 4:6-13 ta profetisa di dje?

20 Awor, laga nos considera e palabranan profetico di Mikeas 4:6-13. “E yiu mohe di Sion” tin cu bai den exilio te na “Babilonia.” Esei ta precis loke a sosode cu e habitantenan di Herusalem den siglo 7 prome cu nos era. Sinembargo, e profecia di Mikeas ta indica cu un resto di Hudiu mester bolbe na Huda, y cu ora Sion ser restaura Yehova lo percura pa su enemigonan caba na nada.

21, 22. Con Mikeas 5:2 a cumpli?

21 Mikeas capitulo 5 ta profetisa di mas acontecimentonan dramatico. Por ehempel, wak kico Mikeas 5:2-4 ta bisa. Mikeas ta profetisa cu un Gobernante cu Dios lo nombra, kende “su origen ta for di hopi tempo pasa”, lo sali for di Betlehem. Lo e goberna como wardado “den e forsa di SEÑOR.” Ademas, e Gobernante aki lo ta grandi, no na Israel so, sino “te na e finnan di tera.” Kisas mundo en general no ta logra saca afo ken e ta, pero pa nos si e no ta un misterio.

22 Ken ta e persona di mas importante cu a yega di nace na Betlehem? Y ken lo bai ta “grandi te na e finnan di tera”? Nada mas ni nada menos cu e Mesias, Hesucristo! Ora Herodes e Grandi a puntra e sacerdotenan principal y e escribanan unda e Mesias mester a nace, nan a responde: “Na Betlehem di Hudea.” Asta nan a cita e palabranan di Mikeas 5:2. (Mateo 2:3-6) Algun hende di e pueblo comun tambe tawata sa esaki, pasobra segun Huan 7:42 nan a puntra: “Scritura no a bisa cu e Cristo ta bini di e desendencia di David, y for di Betlehem, e pueblito caminda David tawata?”

Berdadero Refrescamento pa e Pueblo

23. Con Mikeas 5:7 ta cumpliendo aworaki?

23 Mikeas 5:5-15 ta papia di un invasion di Asiria cu lo tin exito, pero temporalmente so. Tambe Mikeas ta profetisa cu Dios ta bai tuma vengansa contra nacionnan desobediente. Mikeas 5:7 ta priminti cu Dios lo laga un resto di Hudiu repenti bolbe nan patria, pero e palabranan aki ta conta pa nos tempo tambe. Mikeas ta declara: “E restante di Yacob lo ta meimei di hopi pueblo, manera serena for di SEÑOR, manera yobidanan di awa riba vegetacion.” Mikeas ta uza e bunita palabranan poetico aki pa profetisa cu e resto di Yacob, esta, Israel spiritual, lo ta un bendicion di Dios pa e pueblo. Pa e “otro carnenan” di Hesus, cu tin e speransa di biba riba tera, ta un goso di por sirbi hunto cu e resto djawe di “e Israel di Dios.” (Huan 10:16; Galationan 6:16; Sofonias 3:9) Relaciona cu esaki tin un punto importante cu nos tin cu medita ariba. Como proclamadonan di Reino, nos tur mester aprecia nos privilegio di por hiba berdadero refrescamento pa otro hende.

24. Kico nos a siña for di Mikeas capitulo 3 pa 5?

24 Kico bo a siña for di e profecia di Mikeas capitulo 3 pa 5? Podise e siguiente puntonan: (1) Dios ta spera di esnan cu ta hiba delantera den su pueblo pa nan actua cu husticia. (2) Yehova no ta contesta nos oracionnan si nos ta practica pica deliberadamente. (3) Nos por cumpli cu nos encargo di predica unicamente si Dios fortalece nos cu su spirito santo. (4) Pa nos por tin Yehova su aprobacion, nos tin cu cana den su nomber. (5) Como proclamadonan di Reino, nos mester aprecia nos privilegio di hiba berdadero refrescamento pa e hendenan. Kisas tin mas punto cu a impresiona bo. Kico mas nos por siña for di e buki profetico di Bijbel aki? E siguiente articulo lo yuda nos saca lesnan practico for di e ultimo dos capitulonan di e profecia di Mikeas cu ta fortalece nos fe.

Con Lo Bo Contesta?

• Kico Dios ta spera di esnan cu ta hiba delantera den su pueblo?

• Pakico oracion y spirito santo ta hunga un rol importante den nos sirbishi na Yehova?

• Con hende ‘ta cana den e nomber di Yehova’?

[Plachi na pagina 15]

Bo por splica Mikeas su ilustracion tocante un weya di cushina?

[Plachi na pagina 16]

Mescos cu Mikeas, nos ta cumpli cu nos ministerio cu curashi