Graduadonan di Galad Encurasha pa Papia di “Echonan Poderoso”

UN GRUPO grandi di 6.635 hende for di 52 pais tawata presente na e programa di graduacion di e di 115 klas di e Scol Biblico di Galad di Watchtower dia 13 di september 2003.

Nan a tende e animacion basa riba Bijbel cu e 48 studiantenan di e klas a ricibi pa nan proclama “e echonan poderoso di Dios” na hende di 17 pais. (Echonan 2:11) Actualmente e graduadonan ei ta cumpliendo cu nan trabou di misionero na e paisnan ei.

Den su palabranan di introduccion, Stephen Lett, un miembro di Cuerpo Gobernante di Testigonan di Yehova y cu a fungi como presidente di e programa di graduacion, a recorda e studiantenan: “Ora boso sali rumbo pa boso asignacion, sin importa unda boso bai of kico boso experencia, lo tin mas cu ta cu boso cu tin contra boso.” Uzando capitulo 6 di Segundo Reinan, Ruman Lett a recorda e studiantenan cu nan por conta cu e apoyo di Yehova Dios y di un cantidad grandi di angel segun cu nan ta proclama “e echonan poderoso di Dios.” (2 Reinan 6:15, 16) Cristiannan di prome siglo a confronta oposicion y personanan indiferente den nan trabou di predica y siña hende, y misioneronan cristian djawe tambe ta confronta cirunstancianan similar. Sinembargo, nan por conta cu sosten for di shelo y tambe for di Yehova su organisacion riba tera.—Salmo 34:7; Mateo 24:45.

Papia di “e Echonan Poderoso di Dios”

Despues di e palabranan di introduccion di e presidente, Harold Corkern di e Comite di Sucursal di Merca a papia riba e tema “Expectativanan Realistico Ta e Clave pa Sirbishi Gososo y Exitoso.” Ruman Corkern a trece dilanti cu, manera Proverbionan 13:12 ta mustra, speransa cu no cumpli por hiba na decepcion. Sinembargo, hopi bes decepcion ta bin door cu hende tin expectativanan irealistico cu no ta ser cumpli. E graduadonan mester tin un punto di bista balansa y realistico di nan mes y di otro hende. Nan mester ta conciente cu nan lo comete algun eror, pero esaki no mester haci nan demasiado tristo mientras cu nan ta haci esfuerso pa yuda otro hende compronde “e echonan poderoso di Dios.” Ruman Corkern a curasha e misioneronan nobo pa depende riba Yehova, “Esun cu ta recompensa esnan cu ta busc’e.”—Hebreonan 11:6.

E siguiente discursante tawata Daniel Sydlik, un miembro di Cuerpo Gobernante, cu a papia riba e tema “E Speransa Cristian—Kico E Ta?” El a declara: “Speransa ta un birtud cristian. Birtud ta un norma di loke ta corecto cu ta trece un persona den un relacion apropiado cu Dios. Ta imposibel pa un hende cu no ta cristian carga speransa manera nos.” Anto Ruman Sydlik a describi diferente aspecto di e speransa cristian cu ta yuda nos keda optimista apesar di dificultadnan di bida. “Cu speransa, nos por confronta bida diario cu diligencia y cu un spirito victorioso.” E speransa di un cristian ta yud’e mira Yehova como un Dios di proposito y alegra den su sirbishi na Yehova.—Romanonan 12:12.

Wallace Liverance, secretario di Scol di Galad, a anima e studiantenan pa “Sigui Cana Segun e Spirito.” (Galationan 5:16) El a mustra con Baruk, e secretario di Yeremias, casi a stop di cana segun e spirito. Na dado momento, Baruk a cansa y a cuminsa busca cosnan grandi pa su mes. (Yeremias 45:3, 5) Ruman ­Liverance e ora ei a mustra cu algun hende a stop di sigui Hesus y a rechasa berdad spiritual, locual ta necesario pa salbacion. Nan a haci esei pasobra nan no a compronde kico Hesus tawata siña, y nan tawata decepciona cu nan expectativanan carnal no a cumpli na e tempo ei. (Huan 6:26, 27, 51, 66) Kico misioneronan, cu tin e trabou di dirigi atencion na e Creador y su proposito, por siña for di e relatonan aki? E studiantenan a haya e animacion pa nan no precupa pa haya cierto puesto of reconocemento serca hende, ni uza un asignacion teocratico pa ganashi personal.

Mark Noumair, instructor di Galad, a plantia e pregunta: “Lo Bo Ta Un Cu Ta Duna of Un Cu Ta Tuma?” El a basa su comentarionan riba Huesnan 5:2, caminda Israelitanan individual a ser elogia pasobra boluntariamente y sin egoismo nan a ofrece nan mes pa sirbi den e ehersito di Barak. E studiantenan di Galad a ser elogia pasobra nan tambe boluntariamente a reacciona riba e yamada di Barak Mayor, Hesucristo, pa bira mas activo den guera spiritual. Soldanan di Cristo mester ta interesa den haya e aprobacion di esun cu a recluta nan. Ruman Noumair a recorda e studiantenan: “Ora nos cuminsa consentra riba agrada nos mes, nos ta stop di bringa contra e enemigo. . . . Sirbishi di misionero no ta tocante abo. E ta tocante Yehova, su derecho di goberna como Soberano di universo y e echo cu su boluntad ta cumpli. Nos no ta sirbi como misionero pasobra nos kier pa Yehova haci nos felis, nos ta sirbie pasobra nos stim’e.”—2 Timoteo 2:4.

Lawrence Bowen, instructor di Galad, tawata e siguiente moderado di e parti “Santifica Nan den e Berdad.” (Huan 17:17) El a remarca cu e studiantenan di e di 115 klas ta sirbidonan santifica di Dios. Durante e tempo cu nan tawata den e scol nan a participa tambe den sirbishi di veld, buscando amantenan sinsero di e berdad. Mescos cu Hesus y su prome disipelnan, e studiantenan no a papia di “nan mes autoridad.” (Huan 12:49, 50) Cu celo nan a presenta e palabra inspira di e berdad cu ta duna bida. E studiantenan a conta y presenta reconstruccion di nan experencianan cu a demostra e efecto poderoso cu Bijbel tawatin riba esnan cu nan a haya contacto cu ne.

Conseho y Experencia Ta Duna Animacion

Anthony Perez y Anthony Griffin, miembronan di e Departamento di Sirbishi di e sucursal di Merca, a entrevista miembronan di Comitenan di Sucursal di rond mundo. E rumannan aki a papia tocante e dificultadnan cu misioneronan nobo ta confronta y a duna conseho practico basa riba nan experencia personal. Algun di e retonan ta entre otro, diferencianan cultural, un clima tropical henter aña, of un ambiente religioso y politico cu ta diferente for di loke e studiantenan a custumbra cu ne. Kico por yuda misioneronan nobo trata cu exito cu nan ambiente nobo? Amor pa Yehova, amor pa hende, no wak patras y no actua descabeya. Un miembro di comite di sucursal a bisa: “E hendenan den nos asignacion a biba einan pa hopi siglo prome cu nos. Awel nos tambe sigur lo por biba einan y adapta nos mes. Cada biaha cu nos a topa dificultad, nos a considera nan como oportunidad pa mehora nos caracter. Bo ta depende riba oracion y riba e spirito di Yehova, y bo ta experencia e berdad di e palabranan di Hesus: ‘Mi ta cu boso.’”—Mateo 28:20.

Samuel Herd, un miembro di Cuerpo Gobernante, a hiba e programa na un punto culminante cu su discurso, “Sigui Papia di e Echonan Poderoso di Dios.” E dramamento di spirito santo riba dia di Pentecoste di aña 33 di nos era, a duna e disipelnan di Hesus e vigor pa papia di “e echonan poderoso di Dios.” Kico por yuda misioneronan nobo awe papia cu mesun celo tocante e Reino di Dios? E mesun spirito santo. Ruman Herd a anima e studiantenan cu a caba di gradua pa nan ta “ferviente den spirito”, entusiasma cu nan asignacion, y nunca lubida e entrenamento cu a inverti den nan. (Romanonan 12:11) “Bijbel ta un di e cosnan poderoso di Dios”, Ruman Herd a bisa. “Nunca balota su balor. Su mensahe ta bibo. E ta penetra te den curason di un asunto. Uz’e pa corigi cosnan den boso bida. Lag’e cambia e manera cu boso ta pensa. Proteha boso capasidad di pensa door di studia, lesa y medita riba e Scritura . . . Pone como boso meta y determinacion pa uza boso entrenamento di Galad pa sigui papia di ‘e echonan poderoso di Dios.’”

Despues di e lesamento di saludonan for di rond mundo y e presentacion di diploma, un graduado a lesa un carta di e klas pa expresa nan aprecio pa e entrenamento cu nan a ricibi. Anto Ruman Lett a conclui e ocasion gososo aki apropiadamente door di referi na 2 Cronicanan 32:7 y Deuteronomio 20:1 y 4. Conectando su palabranan final na su palabranan di introduccion, el a conclui: “Pesei kerido graduadonan, corda segun cu boso ta bai, segun cu boso ta marcha drenta e bataya spiritual den boso asignacion nobo, cu Yehova lo ta ­marchando hunto cu boso. Nunca lubida e echo cu tin mas cu ta cu boso cu tin contra boso.”

[Cuadro na pagina 25]

ESTADISTICANAN DI E KLAS

Cantidad di pais representa: 7

Cantidad di pais na cua a asigna nan: 17

Cantidad di studiante: 48

Edad promedio: 33,7

Promedio di aña den e berdad: 17,8

Promedio di aña den sirbishi di tempo completo: 13,5

[Plachi na pagina 26]

E di 115 Klas di Graduadonan di e Scol Biblico di Galad di Watchtower

Den e lista akibou, e reinan ta numera di dilanti bai patras, y e nombernan ta bai di robes pa drechi den cada rei.

(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.