Pregunta di Lector

Con nos por sa cu e descripcion di sabiduria na Proverbionan 8:22-31 ta aplica na Hesucristo den su existencia prehumano?

E descripcion inspira di sabiduria den e buki di Proverbionan ta bisa: “[Jehova] a crea mi na principio di su caminda, prome cu su obranan di prome aya ... Prome cu e seronan a wordo poni na nan luga, prome cu e seritonan mi a nace ... Ora cu el a establece e shelonan, mi tabat’ei, ... e tempo ei mi tabata na su lado, manera un trahado experto, y dia tras dia mi tabata su delicia, regocihando semper su dilanti, ... y mi delicia tabata den e yiunan di hende.”

E loke ta cita aki no por ta papiando simplemente di Dios su sabiduria ni di sabiduria den e sentido abstracto. Dicon no? Pasobra e sabiduria describi akinan a ser ‘crea’ como e principio di Jehova su caminda. Jehova Dios semper a existi y semper tabata sabi. (Salmo 90:1, 2) Su sabiduria no tabatin principio ni a ser crea. Su sabiduria no a “nace.” Ademas, e sabiduria describi den e textonan aki ta papia y actua, representando un persona.—Proverbionan 8:1.

E buki di Proverbionan ta bisa cu hopi tempo pasa sabiduria tabata na Jehova—e Creador—su lado como “un trahado experto.” Esei definitivamente ta aplica na Hesus. Hopi prome cu Hesus a bin na tera, el a traha asina estrechamente cu Jehova cu e Palabra di Dios ta bisa: “Pa medio di dje tur cos a wordo crea ... E ta prome cu tur cos, y den dje tur cos ta consisti.”—Colosensenan 1:16, 17; Revelacion 3:14.

Ta na su luga cu Bijbel ta describi e Yiu di Dios como sabiduria, ya cu t’e a revela Jehova su proposito- y decretonan sabi. Ademas, durante Hesus su existencia prehumano e tabata e Palabra of Vocero di Dios. (Juan 1:1) Hesus ta ser describi como “e poder di Dios y e sabiduria di Dios.” (1 Corintionan 1:24, 30) Ki un bunita descripcion di e Yiu di Dios, kende su cariño pa humanidad a motiv’e pa duna su bida como un rescate na nan fabor!—Juan 3:16.

[Plachi na pagina 31]

“Prome cu e seronan ... mi a nace”