Armagedon​—Kico Nan Sa Bisa Cu E Ta?

“Y nan a reuni nan tur hunto na e luga cu na lenga Hebreo yama Armagedon.”​—REVELACION 16:16, Beibel Santu.

KICO ta bini na bo mente ora bo tende e palabra “Armagedon”? Probablemente bo ta imagina bo mes un catastrofe enorme. Aunke Bijbel ta menciona e palabra “Armagedon” un biaha so, medionan di comunicacion y lidernan religioso si ta uz’e varios biaha.

E conceptonan cu hende en general tin di Armagedon ta cuadra cu loke Bijbel ta siña? Esey ta un bon pregunta. Dicon? Pasobra ora bo haya sa e berdad tocante Armagedon, esey por libra bo di miedo innecesario, yuda bo mira futuro cu optimismo y cambia bo punto di bista tocante Dios.

Siguientemente, nos lo analisa tres pregunta y compara e conceptonan cu hende en general tin encuanto Armagedon cu loke Bijbel ta siña realmente.

1. ARMAGEDON TA UN DESASTER CU HENDE TA CAUSA?

Hopi bes, periodista- y expertonan ta uza e palabra “Armagedon” pa describi desasternan cu hende ta causa. Por ehempel, ta e palabra ey nan a uza pa describi e Prome y Segunda Guera Mundial. Despues di e dos gueranan ey, hende tabatin miedo cu Merca y Union Sovietico lo uza nan armanan nuclear contra otro. Medionan di comunicacion a yama e conflicto cu lo por a surgi debi na esey “un Armagedon nuclear.” Awendia, expertonan ta spierta hende tambe pa un “Armagedon di clima” pasobra nan tin miedo cu polucion lo causa cambionan drastico den e clima di planeta Tera.

E concepto aki ta encera cu: Futuro di tera y di tur loke tin bida ta depende di hende. Anto, si gobernantenan no tuma decision sabi, planeta Tera lo sufri daño permanente.

Loke Bijbel ta siña: Dios lo no permiti hende destrui tera. Bijbel ta duna nos e siguransa cu Jehovaa no a crea tera “pa e keda bashi.” Mas bien, el a form’e “pa e wordo habita.” (Isaias 45:18) Pues, en bes di laga hende caba cu nos planeta, Dios lo “caba cu esnan cu ta caba cu e tera.”​—Revelacion 11:18.

2. ARMAGEDON TA UN DESASTER NATURAL?

Tin biaha, periodistanan ta uza e palabra “Armagedon” pa describi un desaster natural grandi. Por ehempel na aña 2010, tabatin un articulo cu a papia di “‘Armagedon’ na Haiti.” E articulo ey a papia di e sufrimento, e daño y di e mortonan cu e temblor fuerte aki a causa. Reportero- y trahadonan di pelicula ta uza e palabra aki no solamente pa referi na sucesonan cu a tuma luga caba sino tambe pa referi na esnan cu nan ta teme cu lo sosode. Por ehempel, nan ta uza e palabra “Armagedon” pa describi e efectonan imaginario di un asteroide cu ta dal den planeta Tera.

E concepto aki ta encera cu: Armagedon ta tuma luga pa casualidad y lo mata tanto hende malbado como esnan inocente. Y bo no por haci mucho pa proteha bo mes.

Loke Bijbel ta siña: Armagedon no ta un suceso cu lo destrui hende pa loco. Mas bien, ta e malbadonan so lo ser destrui. Si, Bijbel ta priminti cu pronto “e malbado lo no t’ei mas; maske cuanto bo busca su luga, e lo no t’ei.”​—Salmo 37:10.

3. DIOS LO DESTRUI TERA NA ARMAGEDON?

Hopi hende religioso ta kere cu lo tin un confrontacion final entre bon y malo cu lo caba cu nos planeta. Un encuesta cu Princeton Survey Research Associates a haci na Merca a mustra cu 40 porciento di e adultonan cu a participa den e encuesta ta kere cu mundo lo caba den “un guera na Armagedon.”

E concepto aki ta encera cu: Nunca no tabata e intencion pa hende keda biba pa semper riba tera ni pa nos planeta existi pa semper. Y cu Dios a crea hende pa nan muri tardi of trempan.

Loke Bijbel ta siña: Bijbel ta mustra bon cla cu Dios “a establece tera riba su fundeshinan, pa asina esey no kita for di su luga nunca mas.” (Salmo 104:5) Anto relaciona cu e habitantenan di mundo, Bijbel ta bisa: “E hustonan lo hereda e tera, y lo biba den dje pa semper.”​—Salmo 37:29.

Ta bisto anto cu Bijbel ta contradeci e conceptonan cu hende en general tin di Armagedon. Pero awor, kico ta e berdad?

[Nota]