Dicon Hende No Por Caba cu Corupcion?

E PALABRANAN ey ta duna un bon descripcion di e manera cu lidernan humano a actua a traves di tempo. Pa nan motibo tin hopi sufrimento y miseria. Aunke semper tabatin hende cu kier a forma un comunidad mas husto, golosidad y corupcion a caba cu tur nan bon intencionnan. Pa ki motibo nan a fracasa? Dicon hende mes no por caba cu corupcion? Basicamente, esaki ta debi na tres factor cu ta eherce un influencia negativo riba nos.

1. Pica.

Bijbel ta bisa bon cla cu nos tur ta “den gara di pica.” (Romanonan 3:9) Pica ta “biba” den nos manera un enfermedad incurabel cu nos a hereda. Pa miles di aña caba pica ta “reina” manera rey riba humanidad, y su “leynan” keto bay ta dirigi nos bida. Hende su inclinacionnan pecaminoso ta pone cu nan ta pensa riba nan so of ta biba pa acumula sea rikesa of poder a costo di otro hende.​—Romanonan 5:21; 7:17, 20, 23, 25.

2. E mundo malbado cu nos ta biba aden.

Golosidad y egoismo ta bisto tur caminda, y pa motibo di esey algun hende ta haya cu no ta facil pa ta diferente. Ambicion combina cu egoismo ta duna nan sed pa poder. Tambe nan ta cuminsa desea mas placa y propiedad​—mas di loke nan tin mester. Ta tristo pa bisa cu pa logra e metanan ey, nan ta hasta dispuesto pa haci cosnan deshonesto. En bes di resisti influencia negativo, e tipo di hendenan ey ta “sigui e mayoria den hacimento di maldad.”​—Exodo 23:2.

3. Satanas e Diabel.

Satanas, un criatura spiritual rebelde, ‘ta gañando henter e tera habita.’ (Revelacion 12:9) E tin placer den manipula hende. Na un manera astuto e ta probecha di e deseo natural cu hende tin pa comodidad material y siguridad financiero te na e grado cu nan ta bira corupto.

Acaso esaki ta nifica cu nos ta obliga di obedece Satanas y haci loke e kier? Nos lo haya e contesta den e siguiente articulo.