Hende Por Ta Honesto den un Mundo Corupto?
“Nos kier comporta nos mes na un manera honesto den tur cos.”—HEBREONAN 13:18.
AUNKE nos imperfeccion, e mundo cu nos ta biba aden y Diabel ta pone hopi presion riba nos, nos por resisti nan influencia. Con? E clave ta pa hala cerca Dios y aplica principio biblico. Semper e principionan aki a duna bon resultado. Laga nos considera dos di nan.
PRINCIPIO BIBLICO: “Stop di laga e mundo aki forma boso.”—Romanonan 12:2.
“Bijbel a yuda mi mira e balor di honestidad.”—GUILHERME
Experencia di bida real: Guilherme, un comerciante exitoso na Brazil, ta admiti cu no ta facil pa ta honesto. E ta bisa: “E presion pa logra metanan di e compania of pa tene cabes riba awa den e mundo competitivo aki por pone un comerciante bira deshonesto. Mayoria di hende ta mira pasamento di placa bou di mesa como algo masha normal. No ta facil pa ta honesto ora bo ta un comerciante cu tin cu cumpli cu obligacionnan financiero pisa.”
A pesar di esey, Guilherme a logra resisti e presion pa bira deshonesto. E ta bisa: “Bo por ta honesto hasta den un ambiente comercial den cua corupcion ta masha normal. Bo mester tin balornan moral halto. Bijbel a yuda mi mira e balor di honestidad. Un persona cu ta honesto tin un consenshi limpi, paz interno y autoestima. E por tin un influencia positivo riba e hendenan rond di dje.”
PRINCIPIO BIBLICO: “Hende cu ta determina pa bira rico ta cay den tentacion, den trampa y den hopi deseo bobo y perhudicial cu ta hiba hende na destruccion y ruina. Pasobra amor pa placa ta raiz di tur sorto di cos perhudicial.”—1 Timoteo 6:9, 10.
“Mi ta contento cu mi ta aplica principionan moral halto di Bijbel pasobra nan a yuda mi haya un bon reputacion.”—ANDRÉ
Experencia di bida real: André ta doño di un compania cu ta instala sistema di siguridad. Un di su clientenan ta un club grandi di futbol. Un biaha, despues di un partido importante, André a bay na oficina di e club pa entrega un factura di un trabou cu el a haci. Na e momento ey ainda nan tabata contando e placa cu a drenta na benta di carchi. Como cu ya a bira laat, e supervisor a pura paga tur e hendenan cu a bin cobra, incluyendo André.
André ta conta: “Riba caminda pa cas mi a ripara cu mi a haya placa di mas, y mi tabata sa cu e supervisor nunca lo por a saca afo ta ken el a paga di mas. Pero tambe mi tabata sa cu e pober homber lo mester a paga e diferencia for di su mes saco. Mi a dicidi di bay bek. Mi a logra pasa meymey di un grupo di fanatico y entrega e placa di mas. E supervisor a keda babuca, pasobra nunca ningun hende no a yega di trece placa cu nan a haya di mas bek.”
André ta sigui conta: “Mi honestidad a pone cu mi a gana respet di e supervisor. Awe, un par di aña despues, di tur e companianan cu e club tabatin contract cu ne e tempo ey, mi compania ta e unico cu te ainda e club ta traha cu ne. Mi ta contento cu mi ta aplica principionan moral halto di Bijbel pasobra nan a yuda mi haya un bon reputacion.”
Cu yudansa di Dios nos tambe por resisti influencia negativo. Esey no ta un gran animacion? Ma esfuersonan individual nunca por caba cu corupcion completamente. Si, e raiznan di corupcion ta asina hundo cu hende imperfecto no por ranca nan riba nan mes forsa. Esaki ta nifica cu hende lo tin cu siña biba cu corupcion? E ultimo articulo di e serie aki lo resalta e bunita speransa cu Bijbel ta duna.