Pordona Otro Libremente

1, 2. Pakico ta na su luga pa bo puntra bo mes si bo ta dispuesto pa pordona?

E PALABRA di Dios ta yuda nos compronde con Jehova ta mira pica y con e ta reacciona ora nos comete pica. Su Palabra ta revela tambe cu e ta dispuesto pa pordona hende. Den e articulo anterior, nos a siña con e actitud di David y di Manases a pone cu Jehova a pordona nan. Loke nan a haci a duel nan di curason, y esey a pone nan confesa y rechasa nan picanan y mustra berdadero arepentimento. Jehova na su turno tabata dispuesto atrobe pa duna nan su aprobacion.

² Laga nos analisa e asunto di pordon for di un otro angulo. Con lo bo a sinti bo si un di e victimanan inocente di Manases tabata bo famia? Lo bo por a pordona Manases? Esaki ta un pregunta al caso awe pasobra nos ta biba den un mundo malbado, violento y domina pa egoismo. Pues, pakico un cristian mester siña di ta dispuesto pa pordona? Y si un hende ofende bo of comete un inhusticia contra bo, kico por yuda bo controla bo emocionnan, reacciona na un manera cu lo agrada Jehova y ser dispuesto pa pordona?

DICON NOS MESTER TA DISPUESTO PA PORDONA?

3-5. (a) Ki ilustracion Hesus a duna su oyentenan pa yuda nan compronde cu nan mester ta dispuesto pa pordona? (b) Kico Hesus kier a siña nos cu su ilustracion registra na Mateo 18:21-35?

³ Nos mester ta dispuesto pa pordona hende cu ta ofende nos, sea cu nan ta parti di e congregacion cristian of no. Esey ta yuda nos keda na paz cu miembronan di nos famia, nos amigonan, otro hende y Jehova. Bijbel ta mustra cu nos mester ta dispuesto pa pordona otro hende, maske cuanto biaha nan faya contra nos. Esey ta un rekisito cristian. Pa mustra con rasonabel e rekisito aki ta, Hesus a uza un ilustracion tocante un esclavo cu tabatin un debe grandi.

⁴ E esclavo tabata debe su doño asina tanto placa cu lo e tabatin cu traha 60.000.000 dia pa por a pag’e bek. Ma su doño a cancela e debe. Despues di esey, e esclavo a sali bay y a topa un otro esclavo cu tabata deb’e un suma di placa pa cua lo e mester a traha 100 dia p’e. E otro esclavo a roga e prome esclavo pa tene pasenshi cu ne, pero e esclavo kende su debe enorme a keda pordona a laga cera e otro esclavo den prizon. E actitud ey a pone nan doño rabia hopi. E doño a puntr’e: “‘Abo tambe lo no mester a tene misericordia di bo compañero, mescos cu ami a tene misericordia di bo?’ Anto su doño, furioso, a entreg’e [esta, e esclavo cu no kier a pordona e otro] na e wardadornan di preso te ora cu e paga tur loke e tabata debe.”​—Mat. 18:21-34.

⁵ Kico Hesus kier a siña nos cu e ilustracion aki? El a splica: “Asina tambe mi Tata celestial lo trata cu boso, si cada un di boso no pordona su ruman di curason.” (Mat. 18:35) E splicacion di Hesus tabata bon cla. Como hende imperfecto, nos ta comete masha hopi pica den nos bida y nos no por cumpli cu Jehova su normanan perfectamente. Toch e ta dispuesto pa pordona nos y haci comosifuera nos no a peca mes contra dje. Pesey, si nos kier ta su amigo, nos mester pordona nos prohimo. Of manera Hesus a bisa den su Sermon Riba Sero: “Si boso ta pordona hende nan faltanan, boso Tata celestial tambe lo pordona boso; ma si boso no ta pordona hende nan faltanan, boso Tata tampoco lo no pordona boso faltanan.”​—Mat. 6:14, 15

6. Dicon no ta semper facil pa pordona?

⁶ Kisas bo ta bisa cu esey ta zona masha bunita, pero e no ta facil pa haci. Esey ta pasobra ora hende faya contra nos, nos por bira hopi emocional. Un persona por rabia, sinti cu el a ser traiciona y hasta pensa cu e tin cu tuma venganza of percura pa esun cu a faya cu ne paga pa loke el a haci. En realidad, algun hende ta pensa cu hamas nan lo por pordona e persona cu a faya contra nan. Si abo ta pensa mescos, con bo por siña di ta mas dispuesto pa pordona manera Jehova ta rekeri?

ANALISA BO EMOCIONNAN

7, 8. Kico por yuda bo ser dispuesto pa pordona ora un hende trata bo malo y pone bo rabia?

⁷ Ora un hende trata nos malo, of ora nos ta kere cu un hende a trata nos malo, nos por reacciona na un manera hopi emocional. Wak por ehempel con un yoncuman a reacciona, manera e siguiente estudio tocante rabia a describie: “Un biaha mi tabata asina rabia cu mi a bay for di cas y hura cu hamas lo mi bolbe bek. Tabata un dushi dia den zomer y mi a cana bay masha leu riba un caminda agradabel. Pocopoco pero sigur e trankilidad y e bunita naturaleza a calma mi y consola mi, y despues di algun ora mi a bolbe cas cu un curason arepenti.” Manera e experencia aki ta ilustra, ora bo tuma tempo pa calma un poco y pensa riba e situacion den tur trankilidad, bo ta evita di reacciona na un manera cu lo duel bo despues.​—Sal. 4:4; Prov. 14:29; Sant. 1:19, 20.

⁸ Pero kico bo mester haci si despues di a tuma tempo pa calma ainda bo ta rabia? Purba di saca afo kico ta pone bo sinti asina. Acaso ta pa motibo di un trato inhusto? Ta pasobra e hende a papia malo cu bo? Of ta pasobra bo ta kere cu e hende a purba di hurt bo pa malo? Loke el a haci tabata realmente asina malo? Ora bo analisa y purba di compronde pakico bo ta reacciona asina, bo por bin mira cua principio di Bijbel por yuda bo cambia e sintimentonan ey y asina reacciona na un manera cu Jehova ta aproba. (Lesa Proverbionan 15:28; 17:27.) E analisis ey lo por yuda bo bira mas obhetivo y dispuesto pa pordona. Pa dificil cu esey por parce, bo ta laga e palabra di Dios saca na cla e ‘pensamentonan y intencionnan di bo curason.’ Esey lo yuda bo bira mes dispuesto cu Jehova pa pordona.​—Heb. 4:12.

DI BERDAD BO MESTER SINTI BO OFENDI?

9, 10. (a) Con un hende por reacciona ora e sinti su mes ofendi? (b) Con un actitud positivo, dispuesto pa pordona, por cambia bo manera di mira cos den bida?

⁹ Tin hopi situacion den bida cu por pone un hende rabia. Por ehempel, supone cu bo ta coriendo auto y un otro vehiculo ta hera box cu esun di bo. Con lo bo reacciona? Tin hende ta rabia asina tanto cu nan ta ataca e otro chauffeur. Pero como cristian, abo sigur lo no kier haci un cos asina, no ta berdad?

¹⁰ No ta mucho mas mihor pa pensa un rato prome cu bo reacciona? Podise bo tambe tin un tiki falta pa loke a pasa pasobra bo no a pone atencion na trafico. Of kisas e auto di e otro chauffeur tabatin un problema mecanico. E punto ta cu si nos purba di compronde loke a pasa, trata di mira cos cu un mente habri y ser dispuesto pa pordona, nos lo ta menos inclina pa rabia, keda desapunta of sinti nos ofendi. Eclesiastes 7:9 ta bisa: “No sea lihe den bo curason pa rabia, pasobra rabia ta biba den pecho di hende bobo.” No sinti bo ofendi mucho lihe. Hopi biaha, ora nos pensa cu un hende a bisa of haci un cos pa malo, en realidad no ta asina; esey por ta simplemente e resultado di imperfeccion of un mal comprondemento. Pesey, purba di wak cos cu un mente habri y sea dispuesto pa laga amor motiva bo pa pordona otro. Si bo logra esey, lo bo ta mas feliz.​—Lesa 1 Pedro 4:8.

‘LAGA BOSO PAZ BIN BEK CERCA BOSO’

11. Maske con e hendenan reacciona na e mensahe di e bon noticia, ki actitud nos mester tin como proclamador di Reino?

¹¹ Con bo por mantene bo dominio propio ora un hende papia malo cu bo den sirbishi di veld? Ora Hesus a manda 70 di su discipelnan bay predica, el a bisa nan pa desea paz riba cada cas cu nan a bishita. El a bisa: “Si tin un amigo di paz eynan, boso paz lo keda riba dje. Ma si no tin, boso paz lo bin bek cerca boso.” (Luc. 10:1, 5, 6) Nos ta keda contento ora hende ta reacciona faborablemente na nos mensahe, pasobra esey lo beneficia nan. Pero tin biaha nan no ta reacciona dje pacifico ey. Kico nos mester haci e ora ey? Hesus a bisa cu nos mester keda cu e paz cu nos a desea riba e cas ey. Maske con e doño di cas trata nos, nos mester por bay laga cada cas cu paz den nos curason. Si nos laga e mal manera di e doño di cas pone nos rabia, nos lo no por mantene nos paz.

12. Segun e palabranan di Pablo na Efesionan 4:31 y 32, con nos mester actua?

¹² Purba di mantene bo paz den tur situacion, no solamente den sirbishi. Claro cu e echo cu bo ta dispuesto pa pordona no ta nifica cu bo tin cu aproba un hende su mal comportacion of minimisa e daño cu esey ta causa. Pero e ta nifica si cu bo no ta laga e persona su mal conducta pone bo carga rencor. Mas bien, bo ta purba di mantene paz den bo curason. Algun hende ta keda cana cu pensamento negativo y ta blo corda con malo nan a ser trata. Consecuentemente, nan ta laga comportacion di otro hende kita nan felicidad. No laga e pensamentonan ey controla bo. Corda cu bo no por ta feliz ora bo ta carga rencor. Pesey, sea dispuesto pa pordona!​—Lesa Efesionan 4:31, 32.

REACCIONA NA UN MANERA CU TA AGRADA JEHOVA

13. (a) Con un cristian ta “montona carbon cayente” riba cabes di su enemigo? (b) Kico por sosode si nos reacciona na un manera suave ora un persona provoca nos?

¹³ Por sosode cu bo ta pensa cu bo por yuda un hende cu a haci malo contra bo interesa den e normanan cristian. Apostel Pablo a skirbi: “‘Si bo enemigo tin hamber, dun’e di come; si e tin sed, dun’e algo di bebe; pasobra haciendo esaki lo bo montona carbon cayente riba su cabes.’ No laga malo vence bo, ma sigui vence malo cu bon.” (Rom. 12:20, 21) Ora bo keda cortes na momento cu un hende provoca bo, bo por suavisa hasta e actitud di mas malo cu un hende por tin y saca su bon cualidadnan na cla. Si bo ta compronde pakico e ta haci asina y mustra empatia​—hasta compasion​—na dje, lo bo por yud’e siña e berdadnan di Bijbel. Maske con e persona reacciona, un contesta suave ta dun’e motibo pa puntra su mes pakico abo ta asina diferente.​—1 Ped. 2:12; 3:16.

14. Maske con malo un hende a trata bo, pakico bo no mester carga rencor contra dje?

¹⁴ Di otro banda, lo no ta bon pa asocia cu cierto personanan. Esaki ta inclui esnan cu un tempo tabata miembro di congregacion pero cu a peca, no a arepenti y a ser expulsa. Si un persona asina a hurt bo, podise ta sumamente dificil pa pordon’e, hasta si e arepenti, ya cu herida emocional ta tuma tempo pa cura. Bou di e circunstancianan ey, bo tin cu keda pidi Jehova yuda bo cultiva e actitud corecto, uno cu ta dispuesto pa pordona e pecador arepenti. Al fin y al cabo, con bo por sa kico ta biba den e otro persona su curason? Pero Jehova si sa. E ta samina un persona su inclinacionnan di mas profundo, y e tin pasenshi cu hende cu peca contra dje. (Sal. 7:9; Prov. 17:3) Pesey e Scritura ta declara: “No paga malo cu malo. Trata di haci loke ta bon den bista di tur hende. Si ta posibel, te asina leu cu ta depende di boso, keda na paz cu tur hende. No tuma venganza, rumannan stima, ma laga luga pa e rabia di Dios; pasobra ta para skirbi: ‘Venganza ta di mi; ami lo paga bek, Jehova ta bisa.’” (Rom. 12:17-19) Abo tin derecho di condena un otro hende? No. (Mat. 7:1, 2) Pero bo por tin sigur cu husticia ta den man di Jehova.

15. Kico ta bon pa nos corda ora un persona a trata nos malo?

¹⁵ Si bo ta sinti cu bo a bira victima di un inhusticia y ta haya cu ta dificil pa pordona e persona cu a haci malo contra bo, pero cu a arepenti, ta bon pa bo corda cu e tambe ta un victima. E tambe ta sinti e efectonan di imperfeccion hereda. (Rom. 3:23) Jehova ta sinti compasion pa hende imperfecto. Pesey ta bon pa nos haci oracion pa e persona cu a haci malo contra nos, pero cu a arepenti. Ora nos ta haci oracion pa un hende, nos sintimentonan di rabia contra dje ta baha. Hesus a mustra bon cla cu nos tin cu evita di carga rencor hasta contra hende cu a trata nos malo. El a bisa: “Sigui stima boso enemigonan y haci oracion pa esnan cu ta persigui boso.”​—Mat. 5:44.

16, 17. Con bo mester reacciona ora ancianonan cristian yega na e decision cu un pecador a arepenti, y pakico?

¹⁶ Jehova a duna ancianonan cristian e responsabilidad di atende casonan den congregacion di personanan cu a comete pica serio. Aunke e rumannan aki no sa tur detaye di cada situacion manera Dios sa, nan meta ta pa nan decision cuadra cu e instruccion cu e Palabra di Dios ta duna bou di guia di spirito santo. Pesey, loke nan dicidi tocante e asuntonan aki despues cu nan a busca e guia di Jehova den oracion lo refleha Su punto di bista.​—Mat. 18:18.

¹⁷ Den un situacion asina nos mester ta leal. Ora e ancianonan ta haya cu un persona a arepenti, lo bo pordon’e y mustra cu ainda bo ta stim’e? (2 Cor. 2:5-8) Esaki lo no ta nada facil, specialmente si abo of un miembro di bo famia tabata victima di su pica. Ma si bo pone bo confianza den Jehova y den su manera di trata e problemanan aki den congregacion, lo bo actua sabi. Lo bo demostra cu di berdad bo ta dispuesto pa pordona otro hende.​—Prov. 3:5, 6.

18. Menciona e beneficionan cu lo bo haya si bo ta dispuesto pa pordona.

¹⁸ Ora hende no kier pordona, nan ta sinti nan malo, nan ta daña nan relacion cu otro hende, nan ta haya stress y nan tin dificultad pa comunica bon cu otro hende. Di otro banda, expertonan di salud mental ta reconoce cu ora hende ta dispuesto pa pordona, lo bay bon cu nan. Nan lo ta liber di e emocionnan cu ta dañino pa salud y nan lo tin un mihor relacion cu otro hende. Pero e bendicion di mas importante cu nos ta haya ora nos ta dispuesto pa pordona ta un bon relacion cu nos Tata celestial, Jehova.​—Lesa Colosensenan 3:12-14.