Tene Curashi Jehova Ta cu Bo!

1, 2. (a) Ki cualidadnan lo yuda nos enfrenta prueba cu exito? (b) Con lo bo defini fe? Ilustra esey.

NOS ta haya hopi goso den nos sirbishi na Jehova. Pero, mescos cu tur otro hende, nos tambe ta haya nos cu dificultad den bida y kisas ta “sufri pa causa di husticia.” (1 Ped. 3:14; 5:8, 9; 1 Cor. 10:13) Pa nos por enfrenta e pruebanan ey cu exito, nos tin mester di fe y curashi.

² Kico ta fe? Apostel Pablo a skirbi: “Fe ta e confianza firme cu hende tin cu loke nan ta spera ariba lo keda realisa, e demostracion cla di realidadnan cu nan no ta mira.” (Heb. 11:1) E palabra Griego traduci como “confianza firme” tabata aparece hopi biaha den documentonan di negoshi y a transmiti e idea di un garantia di algo cu un hende lo a haya den futuro. Di igual manera, hende cu tin fe cu Dios lo cumpli cu su promesanan tin e garantia cu nan lo ricibi loke nan ta spera. Nos fe ta duna nos e conviccion cu loke Dios a priminti lo cumpli sigur y cu tur loke e ta bisa nos den su Palabra ta berdad, hasta e cosnan cu nos ‘no por mira.’

3, 4. (a) Kico ta curashi? (b) Kico por yuda nos haya mas fe y curashi?

³ Curashi ta e forsa pa papia y actua sin miedo ora nos ta den situacionnan dificil y peligroso. Si nos tin curashi, nos lo tin briyo, nos lo ta sigur di nos mes y hasta dispuesto pa sufri pa nos creencianan.—Mar. 6:49, 50; 2 Tim. 1:7.

⁴ Fe y curashi ta cualidadnan masha deseabel. Awor, kico nos por haci si nos ta sinti cu nos tin mester di mas fe y curashi? Wel, Bijbel ta papia di miles di sirbidor di Dios cu a manifesta e cualidadnan aki y cu ta sirbi como un bon ehempel pa nos. Laga nos analisa algun di e ehempelnan aki y mira con nan por yuda nos haya mas fe y curashi.

JEHOVA TABATA CU JOSUE

5. Pa Josue por tabata un bon lider, kico e tabatin mester?

⁵ Laga nos bay bek un 3.500 aña den historia. Cuarenta aña a pasa desde cu Jehova a uza su man poderoso pa libra miyones di Israelita for di sclavitud na Egipto. Profeta Moises tabata nan lider. E tabatin 120 aña dia el a subi Sero Nebo y a para mira e Tera Priminti di aleu. El a muri eynan riba top di e sero. Su sucesor tabata Josue, un homber “yen di e spirito di sabiduria.” (Deu. 34:1-9) E Israelitanan tabata cla pa conkista e tera di Canan. Pa Josue por a sirbi como un bon lider, e tabatin mester di e sabiduria di Dios. Tambe e mester a pone fe den Jehova, e mester tabatin confianza y tene curashi.—Deu. 31:22, 23.

6. (a) Segun Josue 23:6, nos mester di curashi pa haci kico? (b) Kico nos ta siña for di e palabranan di Echonan 4:18-20 y Echonan 5:29?

⁶ E sabiduria, curashi y fe cu Josue a demostra durante e tempo largo cu nan a bringa pa conkista Canan lo mester a fortalece e Israelitanan. Ma nan tabatin mester di curashi no solamente pa bringa den bataya sino tambe pa obedece Dios. Un poco prome cu Josue a muri, el a bisa nan den su discurso di despedida: “Sea masha firme anto [of, “tene curashi”, NW] pa warda y haci tur loke ta para skirbi den e buki di ley di Moises, pa boso no bira bay for di dje ni na man drechi ni na man robes.” (Jos. 23:6) Nos tambe mester tin curashi pa obedece Jehova na tur momento, incluso ora hende manda nos haci algo cu ta bay contra di e boluntad di Dios. (Lesa Echonan 4:18-20; 5:29.) Si nos confia den Jehova y pidi su guia, e lo duna e curashi cu nos tin mester.

CON NOS POR TIN EXITO?

7. Pa Josue por a actua cu curashi y logra exito, kico e mester a haci?

⁷ Pa nos por tin e curashi pa haci e boluntad di Dios, nos tin cu studia Su Palabra y pon’e na practica. Esey ta loke Jehova a bisa Josue haci ora el a bira sucesor di Moises: “Sea fuerte y tene hopi curashi; percura di haci conforme henter e ley cu mi sirbidor Moises a ordena bo . . . E buki di ley aki lo no aparta for di bo boca, ma bo mester medita den dje di dia y anochi, pa bo percura di haci conforme tur loke ta para skirbi den dje; pasobra e ora ey lo bo haci bo caminda prospera, y e ora ey lo bo tin exito.” (Jos. 1:7, 8) Josue tabatin exito pasobra el a sigui e conseho ey. Si nos haci mescos, nos tambe lo tin mas curashi y exito den e sirbishi di Dios.

8. Kico ta e texto di aña pa 2013, y con bo ta kere cu e palabranan ey lo yuda bo?

⁸ Josue lo mester a haya hopi mas confianza pa cumpli cu su asignacion ora cu el a tende loke Jehova a sigui bis’e: “Sea fuerte y tene curashi! No tembla ni desmaya, pasobra SEÑOR [Jehova] bo Dios ta cu bo unda cu bo bay.” (Jos. 1:9) Jehova ta cu nos tambe. Pues, no ta importa ki prueba nos haya nos cu ne; nos no tin nodi tene miedo. Specialmente e siguiente palabranan ta importante pa nos: ‘Sea fuerte y tene curashi! . . . Jehova bo Dios ta cu bo.’ E palabranan ey di Josue 1:9 a ser scogi como e texto di aña pa 2013. Nan lo fortalece nos sigur den e lunanan binidero, hunto cu e ehempel di otro personanan cu a demostra fe y curashi tanto cu palabra y accion.

CU CURASHI NAN A SCOGE PA HACI E BOLUNTAD DI DIOS

9. Den ki manera Rahab a demostra fe y curashi?

⁹ Ora Josue a manda dos homber bay spiona e tera di Canan, e prostituta Rahab a sconde nan y despista nan enemigonan. Pa e fe y curashi cu el a demostra, e cu su famia a scapa ora cu e Israelitanan a conkista e stad Jerico. (Heb. 11:30, 31; Sant. 2:25) Naturalmente, Rahab a bandona su bida inmoral pa e por a agrada Jehova. Tin hende cu a bira cristian cu tambe tabatin e fe, curashi y fortaleza moral necesario pa haci cambionan similar pa agrada Dios.

10. Den ki situacion Ruth a scoge pa adoracion berdadero, y esey a resulta den ki bendicion p’e?

¹⁰ Ruth, e Moabita, a biba despues di Josue, y cu curashi e tambe a scoge pa adoracion berdadero. Como viuda di un Israelita, probablemente e tabata sa algo di Jehova. Su suegra Noemi tabata biba na Moab y e tambe tabata viuda, pero el a dicidi di bay bek Israel pa biba na Betlehem. Na caminda, Noemi a urgi Ruth pa bay bek cerca su hendenan, pero e Moabita a contest’e: “No keda insisti pa mi bay laga bo, ni kita mi di sigui bo . . . Bo pueblo lo ta mi pueblo, y bo Dios, mi Dios.” (Ruth 1:16) Ruth tabata sincero den su palabranan. Cu tempo, Boaz, un famia di Noemi, a casa cu Ruth. Ruth a haya un yiu homber y a bira un antepasado di David y Hesus. Ta bisto cu Jehova ta bendiciona hende cu demostra fe y curashi.—Ruth 2:12; 4:17-22; Mat. 1:1-6.

HOPI A RISCA NAN BIDA!

11. Con Joiada y Josaba a demostra curashi, y kico nan a logra cu nan accion?

¹¹ Nos ta haya mas fe y curashi ora nos mira cu Dios ta cu esnan cu ta risca nan bida pa haci su boluntad y pa proteha nan rumannan. Tuma, por ehempel, Sumo Sacerdote Joiada y su esposa, Josaba. Despues cu Rey Ocozias a muri, su mama Atalia a mata tur e yiunan di e Rey, cu excepcion di Joas, y a corona su mes como reina. Joiada y Josaba a risca nan bida pa scapa Joas, yiu homber di Ocozias, y a scond’e pa seis aña largo. Den e di shete aña, Joiada a proclama Joas como rey y a duna ordo pa mata Atalia. (2 Rey. 11:1-16) Mas despues, Joiada a yuda Rey Joas drecha e tempel. Ora Joiada a muri na edad di 130 aña, nan a der’e entre e reynan “pasobra el a haci loke ta bon den Israel y na Dios y Su cas.” (2 Cro. 24:15, 16) Ademas, ta pasobra Joiada cu su esposa a actua cu curashi, e liña di descendencia real di David a keda conserva te na e Mesias.

12. Con Ebed-melek a demostra curashi?

¹² Ebed-melek, un eunuco den e cas di Rey Sedekias, a risca su bida pa profeta Jeremias. E Rey a entrega Jeremias den man di e prinsnan di Juda, kendenan a acus’e falsamente di a desanima e soldaatnan y henter e pueblo. E prinsnan a tir’e den un rembak yen di lodo y a bay lag’e eyden pa e muri. (Jer. 38:4-6) Ebed-melek a bay cerca Rey Sedekias y a suplic’e pa yuda e profeta. Loke Ebed-melek a haci tabata peligroso, ya cu hopi hende tabata odia Jeremias. Pero Sedekias a bay di acuerdo pa yud’e y a bisa Ebed-melek pa bay cu 30 homber y saca Jeremias for di e rembak. Mediante Jeremias mes, Dios a sigura Ebed-melek cu lo e no perde su bida ora Babilonia ataca Jerusalem. (Jer. 39:15-18) Pues, Dios ta recompensa hende cu demostra curashi pa haci su boluntad.

13. Con e tres Hebreonan a demostra curashi, y kico nos por siña for di nan experencia?

¹³ Un 600 aña prome cu Cristo, tres sirbidor Hebreo di Jehova a proba claramente cu Dios ta recompensa hende cu demostra fe y curashi. Rey Nabucodonosor a reuni tur e dignatarionan di Babilonia y a exigi pa nan adora un imagen gigante di oro. Ken cu no a haci esey lo a muri den un forno di candela. Cu tur respet e tres Hebreonan a bisa Nabucodonosor: “Nos Dios, kende nos ta sirbi, por libra nos for di e forno di candela cayente cayente, y e lo libra nos for di bo man, o rey. Ma hasta si e no haci esey, sea sigur, o rey, cu nos no ta bay sirbi bo diosnan, ni adora e imagen di oro cu bo a lanta.” (Dan. 3:16-18) Na Daniel 3:19-30, nos por lesa e relato emocionante di e manera cu Jehova a salba e tres Hebreonan. Aunke no ta probabel cu nos lo ser menasa cu morto den un forno di candela, tin biaha nos ta haya nos ta obedece Dios den situacionnan hopi dificil. Pero nos por tin sigur cu Dios lo bendiciona nos si nos demostra fe y curashi.

14. Segun Daniel capitulo 6, con Daniel a actua cu curashi, y kico tabata e resultado?

¹⁴ Daniel tambe a demostra fe y curashi den un situacion dificil. Su enemigonan a convence Rey Dario pa saca e decreto cu “esun cu durante di trinta dia haci un peticion na cualkier dios of hende fuera di bo, o rey, lo wordo tira den cueba di leon.” Asina cu “Daniel a haya sa cu e documento a wordo firma, el a bay den su cas (awor den su camber ariba e tabatin bentananan habri den direccion di Jerusalem); y el a sigui hinca rudia tres biaha pa dia, y a haci oracion y a duna gradicimento dilanti di su Dios, manera e tabata haci anteriormente.” (Dan. 6:6-10) Nan a tira Daniel den un cueba di leon, pero Jehova a libr’e!—Dan. 6:16-23.

15. (a) Con Akila cu Priscila a demostra fe y curashi? (b) Kico e palabranan di Hesus na Juan 13:34 ta nifica, y con hopi cristian a demostra e tipo di amor ey?

¹⁵ Bijbel ta bisa cu Akila y Priscila ‘a risca nan bida pa Pablo’, aunke e no ta menciona bou di ki circunstancia nan a hacie. (Echo. 18:2; Rom. 16:3, 4) Cu curashi nan a actua na harmonia cu e siguiente palabranan di Hesus: “Mi ta duna boso un mandamento nobo: stima otro; mescos cu ami a stima boso, boso tambe stima otro.” (Juan 13:34) E Ley di Moises tabata rekeri pa un persona stima su prohimo mescos cu el a stima su mes. (Lev. 19:18) Pues, dicon Hesus a bisa cu su mandamento tabata “nobo”? Pasobra el a describi un amor cu lo a bay mas aleu: Nos mester ta dispuesto pa muri pa otro hende, mescos cu el a haci. Hopi cristian a demostra amor y curashi ora nan a “risca nan bida” pa evita cu nan rumannan ta ser trata cruelmente of ta muri na man di enemigo.—Lesa 1 Juan 3:16.

16, 17. Con e fe di algun di e prome cristiannan a ser poni na prueba, y con algun cristian den nos tempo a experencia e mesun tipo di prueba?

¹⁶ Cu curashi e prome cristiannan, mescos cu Hesus, a adora Jehova so. (Mat. 4:8-10) Nan a nenga di kima sencia na honor di emperador Romano. (Wak e plachi.) Daniel P. Mannix a skirbi den su buki Those About to Die (Esnan a Punto di Muri): “Masha poco cristian a renuncia nan fe, aunke nan lo por a haci esey facilmente, pasobra normalmente tabatin un altar cu un candela cendi den e arena di e stadion, y e unico cos cu e prizonero mester a haci ta tira un tiki sencia den e candela. Cu esey, nan lo a dun’e un Certificado di Sacrificio y lag’e liber. Tambe nan tabata splic’e bon cla cu esaki no tabata un acto di adoracion na emperador, sino djis un acto pa reconoce e naturaleza divino di emperador como cabes di e estado Romano. Pero casi ningun cristian no a haci uzo di e oportunidad aki pa scapa di morto.”

¹⁷ Cristiannan di nos tempo cu tabata preso den campo di concentracion Nazi tambe tabata haya varios oportunidad pa sali liber y evita castigo di morto. Nan mester a djis firma un declaracion den cua nan ta nenga Jehova. Pero masha poco a firma esey. Durante e genocidio na Ruanda poco tempo pasa, Testigonan di Jehova Tutsi y Hutu a risca nan bida pa proteha otro. E pueblo di Dios tin mester di curashi y fe ora nan ta confronta e tipo di pruebanan ey.

CORDA, JEHOVA TA CU NOS!

18, 19. Menciona algun ehempel biblico di fe y curashi cu por yuda nos cumpli cu nos trabou di predica.

¹⁸ Awe nos tin e privilegio di participa den e trabou di mas grandi cu Dios a yega di confia su sirbidornan riba tera cu ne, esta, predica tocante e Reino y haci discipel. (Mat. 24:14; 28:19, 20) Esta agradecido nos ta pa e ehempel sin igual cu Hesus a laga pa nos! “Hesus a cuminsa biaha di stad pa stad y di pueblito pa pueblito, predicando y anunciando e bon noticia di e Reino di Dios.” (Luc. 8:1) Mescos cu ne, nos tin mester di fe y curashi pa nos por predica e mensahe di Reino. Cu Dios su yudansa, nos por tin e mesun curashi cu Noe. E tabata “un predicador di husticia” den “un mundo di hende malbado” cu tabata a punto di ser destrui den un diluvio mundial.—2 Ped. 2:4, 5.

¹⁹ Oracion ta yuda nos cumpli cu e trabou di predica. Ora algun siguidor di Cristo cu tabata ser persigui a pidi Dios yuda nan pa nan por a ‘declara su palabra cu curashi’, Dios a contesta nan suplica. (Lesa Echonan 4:29-31.) Si bo tin un poco miedo di predica di cas pa cas, pidi Jehova duna bo mas fe y curashi, y lo e yuda bo.—Lesa Salmo 66:19, 20.a

20. Como sirbidornan di Jehova, ki apoyo nos tin?

²⁰ No ta facil pa sigui haci e boluntad di Dios ora nos ta confronta prueba den e mundo malbado y yen di problema aki. Pero nos no ta nos so. Dios ta cu nos. Su Yiu, cu ta Cabes di e congregacion, tambe ta cu nos. Ademas, nos tin mas cu 7.000.000 compañero Testigo di Jehova rond mundo. Laga nos tur hunto sigui demostra fe y declara e bon noticia, teniendo na mente nos texto di aña 2013: ‘Sea fuerte y tene curashi! . . . Jehova bo Dios ta cu bo.’—Jos. 1:9.