Bo Tin “un Curason pa Conoce” Jehova?

1, 2. Ki ilustracion Jehova a uza, i dicon nos mester ta interesa den dje?

ABO gusta figo? Hopi hende gusta com’e, sea seco of fresco. Pesey, hopi pais ta cultiva e fruta aki. E Hudiunan den tempo biblico tambe tabata gusta come figo. (Nah. 3:12; Luc. 13:6-9) Figo ta contene fibra, antioxidante y mineral. Algun hende hasta sa bisa cu e ta bon pa curason.

² Jehova a yega di uza figo pa ilustra condicion di curason di hende. Pero Jehova no tabata referi na e balor nutritivo di figo. E tabata papia di e curason figurativo. Y tanto nos como nos sernan keri por siña for di loke Jehova a bisa mediante profeta Jeremias. Pesey, laga nos analisa loke el a bisa y wak kico nos por siña for di esaki.

3. Kico e figonan menciona den Jeremias capitulo 24 a representa?

³ Prome, laga nos papia di e vision cu Dios a duna Jeremias. Na aña 617 prome cu nos era, e nacion di Juda tabata haci hopi maldad den bista di Jehova. Den e vision, Dios a uza dos tipo di figo—figo “bon” y figo “malo”—pa ilustra kico lo a pasa cu e nacion di Juda. (Lesa Jeremias 24:1-3.) E figonan malo a representa Rey Sedekias y hende mescos cu ne cu pronto lo a experencia maltrato severo na man di Rey Nabucodonosor y su forsa militar. Pero kico di Ezekiel, Daniel y su tres compañeronan cu tabata na Babilonia y algun di e otro Hudiunan cu pronto lo a ser hiba den exilio na Babilonia? Wel, nan tabata e bon figonan. Cu tempo, algun di e Hudiunan aki lo a regresa Jerusalem pa reconstrui Jerusalem y su tempel.—Jer. 24:8-10; 25:11, 12; 29:10.

4. Ki animacion nos por saca for di loke Dios a bisa tocante e bon figonan?

⁴ Papiando di esnan cu e bon figonan a representa, Jehova a bisa: “Lo mi duna nan un curason pa conoce mi, pasobra ami ta SEÑOR; y nan lo ta mi pueblo.” (Jer. 24:7) Esaki ta palabranan di e texto central di nos articulo y nan siguramente ta un gran animacion pa nos! Si, Dios kier pa nos tin ‘un curason pa conoc’e’, esta, pa nos ta personanan cu kier siña conoc’e y cu kier ta parti di su pueblo. Wel, si bo kier ta un persona asina, ta masha importante pa dal algun paso. Nan ta, entre otro, studia y aplica e Palabra di Dios, arepenti y comberti, dedica bo bida na Dios y batisa den nomber di e Tata, Yiu y spirito santo. (Mat. 28:19, 20; Echo. 3:19) Bo a dal e pasonan ey caba? Of kisas bo ta asistiendo regularmente na e reunionnan di Testigonan di Jehova y ta haci esfuerso pa cumpli cu e rekisitonan ey?

5. Tocante ken Jeremias a skirbi principalmente?

⁵ Hasta si nos a dal algun di e pasonan ey of a dal tur caba, nos mester sigui presta atencion na nos conducta y actitud. Nos ta compronde dicon nos mester haci esey ora nos analisa loke Jeremias a skirbi tocante e curason. Aunke algun capitulo di e buki di Jeremias ta papia tocante e nacionnan rond di Juda, e buki ta enfoca principalmente riba e nacion di Juda y ta abarca reinado di cinco di su reynan. (Jer. 1:15, 16) Si, Jeremias a skirbi principalmente tocante personanan—homber, muher y mucha—cu tabata dedica na Jehova. Nan antepasadonan a acepta boluntariamente pa ta un pueblo dedica na Jehova. (Exo. 19:3-8) Y den tempo di Jeremias, e pueblo a afirma esaki. Nan a bisa: “Nos ta bin cerca bo, pasobra abo ta SEÑOR nos Dios.” (Jer. 3:22) Pero, den ki condicion nan curason tabata?

NAN MESTER A OPERA NAN CURASON?

6. Dicon nos mester ta interesa den loke Dios a bisa encuanto e curason?

⁶ Awendia, dokternan por uza tecnologia avansa pa samina nos curason pa wak su condicion y si e ta funciona bon. Pero como cu Jehova tin capacidad extraordinario, e por haci mucho mas cu esey. Den tempo di Jeremias, el a bisa: “E curason ta mas engañoso cu tur cos y ta totalmente corupto; ken por comprond’e? ‘Ami, SEÑOR, ta scudriña curason, ... pa duna cada un segun su conducta, segun e fruta di su echonan.’” (Jer. 17:9, 10) E expresion “scudriña curason” no ta referi na un saminacion medico di e curason literal, cu kisas den 70 of 80 aña lo bati un tres mil miyon biaha. Mas bien, Jehova tabata referi na e curason figurativo, esta, e persona cu nos ta di paden: nos caracter, deseonan, pensamentonan, sintimentonan, actitud y metanan. Si, Jehova por samina hasta nos curason figurativo y, te na cierto grado, nos mes tambe por haci esey.

7. Con Jeremias a describi e condicion di curason di mayoria di Hudiu den su tempo?

⁷ Pa prepara nos mes pa un saminacion asina, nos por puntra nos mes: ‘Den ki condicion e curason figurativo di mayoria di Hudiu den tempo di Jeremias tabata?’ Pa haya contesta pa e pregunta ey wak kico Jeremias a bisa: “Henter e cas di Israel ta incircuncida di curason.” Aki, Jeremias no tabata referi na e circuncision cu Ley a decreta pa hombernan Hudiu, pasobra el a bisa: “‘Ata, e dianan ta bin’, SEÑOR ta declara, ‘cu lo mi castiga tur cu ta circuncida y toch incircuncida.’” Pues, hasta Hudiu circuncida tabata “incircuncida di curason.” (Jer. 9:25, 26) Kico esey a nifica?

8, 9. Kico mayoria di Hudiu den tempo di Jeremias mester a haci cu nan curason?

⁸ Nos por haya un idea di kico ta ‘un curason incircuncida’ ora nos analisa e mandato cu Dios a duna e Hudiunan ora el a bisa: “Kita e prepucio di boso curason, hendenan di Juda y habitantenan di Jerusalem, pa mi furia no sali ... pa motibo di e maldad di boso echonan.” Pero kico a pone nan comete tal mal echonan? Nan curason malbado. (Lesa Marco 7:20-23.) Si, pa medio di Jeremias, Dios a mustra bon cla cu ta nan curason obstina y rebelde a hiba nan na maldad. Nan motivacion y pensamentonan tabata malo den bista di Jehova. (Lesa Jeremias 5:23, 24; 7:24-26.) Pesey Dios a bisa nan: “Circuncida boso mes pa SEÑOR y kita e prepucio di boso curason.”—Jer. 4:4; 18:11, 12.

⁹ Pues, e Hudiunan den tempo di Jeremias mester a opera nan curason figurativo; nan mester a ‘circuncida nan curason’, mescos cu e Israelitanan den tempo di Moises mester a haci. (Deu. 10:16; 30:6) Awor, con e Hudiunan por a ‘kita e prepucio di nan curason’? Wel, nan mester a elimina tur loke a haci nan rebela contra Jehova, esta, tur mal pensamento y deseo of motivacion incorecto.—Echo. 7:51.

SAMINA BO CURASON FIGURATIVO

10. Ki ehempel di David nos mester imita?

¹⁰ Nos mester ta masha contento cu Jehova ta yuda nos compronde e curason figurativo. Pero podise algun hende ta puntra nan mes: ‘Dicon Testigonan di Jehova mester ta interesa den nan curason figurativo?’ Acaso nan ta haciendo malo of ta birando ‘mal figo’ den congregacion manera hopi Hudiu di e tempo aya? Al contrario, mayoria di Dios su sirbidornan di awendia ta hende devoto; nan ta un pueblo limpi. No obstante, ta bon pa reflexiona riba loke David a roga Jehova. El a pidi Jehova: “Scudriña mi, o Dios, y conoce mi curason; purba mi y conoce mi pensamentonan, y mira si tin cualkier caminda di maldad den mi.”—Sal. 17:3; 139:23, 24.

11, 12. (a) Dicon cada un di nos mester samina nos curason? (b) Kico Dios no ta haci?

¹¹ Jehova kier pa cada un di nos conoc’e, esta, biba na un manera cu ta agrad’e y keda fiel na dje. Jeremias a bisa cu Jehova ta “samina” e hustonan y ta mira ‘nan nier y curason.’ (Jer. 20:12, NW) Si e Todopoderoso ta hasta samina curason di hende husto, nos tambe no mester samina nos curason? (Lesa Salmo 11:5.a) Segun cu nos ta haci esey, kisas nos lo ripara cu nos tin cierto actitud, meta of sintimento profundo cu mester di atencion. Si, podise nos ta descubri algo cu ta haci nos curason menos obediente, un ‘prepucio cu nos mester kita for di nos curason.’ Na moda di papia, nos mester opera nos curason figurativo. Awor, unabes bo ta di acuerdo cu ta bon pa samina bo curason figurativo, kico bo mester paga tino na dje? Y con bo por haci e cambionan necesario?—Jer. 4:4.

¹² Un cos ta sigur: Jehova no ta obliga nos pa cambia. Jehova a bisa cu e lo duna e ‘bon figonan’ ‘un curason pa conoc’e.’ E no a bisa cu lo e obliga nan pa cambia nan curason. Nan mes mester tabata kier tin un curason pa conoce Dios. Nos tambe no mester desea mescos?

13, 14. Con nos curason por hinca nos den peliger?

¹³ Hesus a bisa: “For di curason ta sali pensamento malicioso, matamento, adulterio, fornicacion, ladronicia, testimonio falso y blasfemia.” (Mat. 15:19) Por ehempel, si un ruman comete fornicacion of adulterio y e no arepenti, e por perde Dios su aprobacion pa semper. Pero di otro banda, hasta si un ruman no a comete un maldad asina, e por ta permitiendo mal deseo desaroya den su curason. (Lesa Mateo 5:27, 28.) Pesey ta importante pa nos samina nos curason. Si nos ta samina nos curason profundamente, nos lo haya sa si nos tin sintimentonan inapropia pa un persona di sexo opuesto—esta, deseonan scondi cu Dios no ta aproba y cu nos mester elimina.

¹⁴ Of kisas un ruman no a ‘mata’, pero e ta permiti rencor desaroya den su curason te cu e ta cuminsa odia su ruman. (Lev. 19:17) E tin cu traha duro pa elimina e mal sintimento ey.—Mat. 5:21, 22.

15, 16. (a) Duna un ehempel cu ta mustra con un cristian su curason por ta “incircuncida.” (b) Dicon bo ta pensa cu un ‘curason incircuncida’ ta desagrada Jehova?

¹⁵ Nos ta contento cu mayoria di cristian no tin e ‘problemanan di curason’ cu e paragrafnan anterior a menciona. Pero corda cu Hesus a papia tambe di “pensamento malicioso.” Esakinan ta cierto punto di bista of actitud cu por tin efecto riba varios aspecto di bida. Por ehempel, un persona por tin un punto di bista troci encuanto lealtad na famia. Claro cu, como cristian, nos ta stima nos famia; nos no ta manera hopi hende den “e ultimo dianan” aki cu no tin “cariño” pa otro. (2 Tim. 3:1, 3) Pero si nos no paga tino, nos por bay den extremo ora di demostra cariño na famia. Hopi hende ta pensa cu lasonan familiar ta mas importante cu tur cos y ta defende of tuma parti pa nan famia cueste loke cueste. Si un hende ofende nan famia, nan ta tuma esaki como algo personal. Bo ta corda kico un actitud asina a pone Dina su ruman hombernan haci? (Gen. 34:13, 25-30) Y kico di Absalon? Ta sintimentonan negativo asina a pon’e mata su mitar ruman Amnon. (2 Sam. 13:1-30) Pues, ‘pensamentonan malicioso’ ta hopi peligroso.

¹⁶ Ta claro cu mayoria di sirbidor di Jehova di awe no ta mata hende. Pero, kico si un ruman ta tene un otro ruman na curason pasobra e ruman a ofende un famia di dje of pasobra e ta pensa cu ta asina? Kisas e ta nenga di acepta hospitalidad di e ruman of hasta ta keda sin invit’e na su cas. (Heb. 13:1, 2) Pero nos no por hustifica un actitud asina pasobra e actitud ey ta demostra un falta di amor. Y pa Jehova, esun cu ta samina curason, nos lo tin un curason “incircuncida.” (Jer. 9:25, 26) Corda cu Jehova a urgi e Hudiunan pa “kita e prepucio di [nan] curason.”—Jer. 4:4.

CON PA ADKIRI Y KEDA CU “UN CURASON PA CONOCE” DIOS

17. Dicon ta mas facil pa nos obedece Jehova si nos ta tem’e?

¹⁷ Awor, kico si bo a samina bo curason figurativo y a descubri cu den cierto sentido e ta “incircuncida”, esta, cu e no ta cla pa obedece Jehova su instruccionnan manera mester ta? Kisas bo a ripara cu bo tin miedo di hende, cu bo ta desea prominencia of rikesa of cu bo tin e tendencia di ta cabesura of di ta independiente. Wel, bo no ta bo so; tin otronan cu tambe ta lucha cu e mesun sintimentonan ey. (Jer. 7:24; 11:8) Jeremias a skirbi cu e Hudiunan infiel den su tempo tabatin un “curason obstina y rebelde.” Nan no tabata “teme” Jehova aunke e tabata stima nan y duna nan tur loke nan tabatin mester. (Jer. 5:23, 24) Pues, pa nos por kita ‘prepucio di nos curason’, esta elimina tur maldad for di nos curason, nos tin cu teme y respeta Jehova. E ora ey, lo ta mas facil pa nos haci cambio y cumpli cu tur loke Jehova pidi nos.

18. Ki promesa Jehova a haci na esnan den e pacto nobo?

¹⁸ Si nos ta sigui haci esfuerso pa cumpli cu loke Jehova ta pidi nos, lo e duna nos ‘un curason pa conoc’e.’ En realidad, ta esey ta loke el a priminti di haci pa e unginan den e pacto nobo. El a bisa: “Lo mi pone mi ley den nan y lo mi skirbie riba nan curason; y ami lo ta nan Dios y nan lo ta mi pueblo.” Awor, te con leu hende lo conoce Dios? Jehova a añadi: “Ni prohimo ni ruman lo no siña otro mas, bisando: ‘Conoce SEÑOR’, pasobra nan tur lo conoce mi, for di esun di mas menos te na esun di mas grandi ... Pasobra lo mi pordona nan inikidad, y nan pica lo mi no corda mas.”—Jer. 31:31-34.b

19. Ki bendicionnan maraviyoso cristiannan berdadero por tin awor i pa semper?

¹⁹ Si bo ta anhela e dia cu lo bo beneficia pa semper di e pacto nobo ey, sea den cielo of riba tera, for di awor bo mester tin e deseo pa conoce Jehova y forma parti di su pueblo. Y pa bo por ricibi e bendicionnan ey, bo picanan mester ser pordona a base di e sacrificio di rescate di Hesucristo. Anto, e echo cu bo por ser pordona mester motiva bo pa pordona otronan, hasta si esaki no ta facil pa haci. Bo mester traha duro pa kita cualkier rabia of odio for di bo curason. Esey lo demostra cu bo kier sirbi Jehova y conoc’e mihor. E ora ey, lo bo ta manera esnan cu Jehova a bisa mediante Jeremias: “Boso lo busca mi y haya mi, ora boso busca mi cu henter boso curason. Y lo mi laga boso haya mi.”—Jer. 29:13, 14.