PREGUNTA CU BIJBEL TA CONTESTA

Dios ta scucha tur oracion?

Dios ta scucha oracion di hende di tur nacion. (Salmo 145:18, 19) Su Palabra, Bijbel, ta anima nos pa papia cu ne tocante cualkier cos cu ta preocupa nos. (Filipensenan 4:6, 7) Pero, tin cierto oracionnan cu Dios no ta gusta. Por ehempel, e no ta gusta pa hende ripiti oracion cu nan a siña for di cabes.—Lesa Mateo 6:7.

Tampoco Jehova ta gusta oracion di hende cu deliberadamente ta desobedec’e su ley. (Proverbionan 28:9) Por ehempel, den tempo biblico, Dios a nenga di scucha oracion di e Israelitanan cu a comete asesinato. Pues, nos mester cumpli cu cierto rekisito si nos kier pa Dios scucha nos oracion.—Lesa Isaias 1:15.

Kico nos tin cu haci pa Dios scucha nos oracion?

Si nos no tin fe, Dios no ta scucha nos oracion. (Santiago 1:5, 6) Nos mester ta convenci cu Dios ta existi y cu e ta interesa den nos. Pa fortalece nos fe, nos tin cu studia Bijbel pasobra berdadero fe ta basa riba prueba convencente cu nos ta haya den su Palabra.—Lesa Hebreonan 11:1, 6.

Ademas, nos tin cu haci oracion cu sinceridad y humildad. Hasta Hesus, e Yiu di Dios, a haci oracion cu humildad. (Lucas 22:41, 42) Pesey, en bes di bisa Dios kico e tin cu haci, nos mester lesa Bijbel pa nos haya sa kico ta su rekisitonan. Di e manera ey, nos por haci oracion na Dios di acuerdo cu su boluntad.—Lesa 1 Juan 5:14.