Presta Atencion na Nos Rumannan y Anima Nan

1, 2. Kico a yuda 230 Testigo di Jehova sobrevivi e marcha di morto na final di Segundo Guera Mundial?

SEGUNDO Guera Mundial tabata yegando su fin. Ora cu e gobierno Nazi a mira cu nan derota tabata cerca, nan a duna ordo pa caba cu e miles di presonan cu tabatin ainda den e camponan di concentracion. Nan kier a hiba e presonan di e campo di Sachsenhausen na algun haf y pone nan riba barco cu nan lo a laga sink riba lama grandi. Esaki tabata parti di un strategia cu despues a bira conoci como marcha di morto.

² E campo di concentracion di Sachsenhausen tabatin 33.000 preso, y nan a obliga nan pa marcha 250 kilometer bay Lübeck, un haf di Alemania. Entre nan tabatin 230 Testigo di Jehova for di seis pais, y nan a haya ordo pa marcha hunto. E presonan tabata debil pa motibo di hamber y maleza. Pero tur nos rumannan a sobrevivi e marcha. Con nan a logra esey? Un di nan a splica: “Nos tabata anima otro constantemente pa sigui padilanti.” Pues, e amor cu nan a demostra pa otro, hunto cu “e poder cu ta bin di Dios”, ta loke a yuda nan sobrevivi e experencia teribel ey.—2 Cor. 4:7.

3. Dicon nos tin cu anima otro?

³ Awe, nos no ta den un marcha di morto, pero si nos ta confronta hopi problema. Despues cu e Reino di Dios a cuminsa goberna na 1914, Satanas a ser saca for di cielo y benta den bisindario di tera. Pesey e ta “yen di rabia, pasobra e sa cu a ked’e masha poco tempo.” (Rev. 12:7-9, 12) Segun cu Armagedon ta yega mas cerca, Satanas ta uza tur tipo di prueba y presion pa debilita nos amistad cu Jehova. Fuera di esey ta bin acerca e stress di bida di tur dia. (Job 14:1; Ecl. 2:23) Tin biaha, tur e problemanan aki hunto por ta asina pisa cu nos no tin suficiente forsa emocional ni spiritual pa lucha cu nan, y nos ta keda tur desanima. Esey tabata e caso di un ruman homber cu durante varios decada a yuda masha hopi hende keda fiel na Jehova. Den su biehes, e cu su casa a haya nan cu problema di salud, y esey a pon’e bira hopi desanima. Mescos cu e ruman ey, nos tur tin mester di “e poder cu ta surpasa esun di hende, esta, e poder cu ta bin di Dios.” Tambe nos mester di e animacion di nos rumannan.

4. Ki conseho di apostel Pablo nos tin cu tuma na pecho si nos kier anima otro?

⁴ Si nos kier ta un fuente di animacion y estimulo pa otro, nos tin cu tuma na pecho e conseho cu apostel Pablo a duna e cristiannan Hebreo. El a bisa: “Laga nos presta atencion na otro pa nos por stimula otro pa mustra amor y haci bon obra, y no keda sin bay e reunionnan, manera algun a tuma pa custumber, sino mas bien anima otro, y mucho mas ainda cu boso ta mira e dia ta yega cerca.” (Heb. 10:24, 25) Con nos por aplica e conseho importante aki?

“PRESTA ATENCION NA OTRO”

5. Kico “presta atencion na otro” ta encera, y con nos por demostra esey?

⁵ E expresion “presta atencion na otro” ta transmiti e idea di pensa riba otro hende y tene cuenta cu nan necesidadnan. Pero ta dificil pa haci esey si ora nos ta na Salon di Reino, nos ta djis bira cuminda e rumannan lihe lihe of papia cu nan solamente tocante cosnan cu no ta mucho importante. Naturalmente, nos no ta bay cana “mete den asunto di otro hende.” (1 Tes. 4:11; 1 Tim. 5:13) Pero si nos kier fortalece nos rumannan, nos tin cu conoce nan bon: nan situacion den bida, nan cualidadnan, nan amor pa Jehova, nan puntonan fuerte y debil. Nan mester mira nos como nan amigo y sa sigur cu nos ta stima nan. Pesey nos tin cu pasa tempo cu nan, no solamente ora nan tin problema y ta desanima, sino na otro ocasionnan tambe.—Rom. 12:13.

6. Kico lo yuda un anciano “presta atencion” na e carnenan bou di su cuido?

⁶ Bijbel ta urgi e ancianonan pa ‘pastorea e tou di Dios cu ta bou di nan cuido di buena gana y cu entusiasmo.’ (1 Ped. 5:1-3) Pa nan por haci esey, nan mester conoce e carnenan bon. (Lesa Proverbionan 27:23.) Si e ancianonan ta demostra cu nan ta para cla pa yuda e rumannan y cu nan ta disfruta di e rumannan su compania, e carnenan lo tin mas confianza pa pidi yudansa ora nan mester di esey. Tambe lo ta mas facil pa nan papia cu e ancianonan tocante loke realmente ta preocupa nan y con nan ta sinti. Asina e ancianonan, na nan turno, por “presta atencion” na cada carne y duna nan e yudansa necesario.

7. Kico nos mester corda ora un persona desanima ‘no ta controla’ su palabranan?

⁷ Pablo a bisa e congregacion na Tesalonica: “Apoya e debilnan.” (Lesa 1 Tesalonicensenan 5:14.) “E debilnan” ta inclui rumannan “cu ta deprimi” y esnan cu ta desanima. Proverbionan 24:10 ta bisa: “Si bo desmaya [of, ta desanima] den e dia di angustia, bo forsa ta keda limita.” Ora nos kier “presta atencion” na un ruman cu ta hopi desanima, nos tin cu corda cu tin biaha nan ‘no ta controla’ nan palabranan. (Job 6:2, 3) Kisas nan ta bisa cosnan cu en realidad no ta refleha loke tin den nan curason. Rachelle a experencia esey ora su mama a cay den un depresion pisa. El a conta: “Hopi biaha mi mama tabata papia palabranan skerpi cu ta haci dolor. Mayoria di biaha mi tabata purba di keda corda ki tipo di persona realmente e tabata: amoroso, amabel y generoso. Mi a siña cu hende deprimi sa bisa hopi cos cu en realidad nan no kiermen. E cos di mas malo cu bo por haci ta di rabia y paga malo cu malo.” Proverbionan 19:11 ta bisa: “Prudencia di un hende ta haci cu e no ta rabia lihe, y pa laga un ofensa pasa ta su gloria.”

8. Na ken specialmente nos tin cu “confirma” nos amor, y dicon?

⁸ Con nos por “presta atencion” na un hende cu ta sintie desanima pa motibo di pica cu el a yega di comete? A pesar cu el a dal paso caba pa corigi su fayo, kisas ainda e ta sinti berguensa pa loke el a haci. Wel, Pablo a bisa e rumannan na Corinto lo siguiente tocante un pecador cu a arepenti: “Boso mester pordon’e bondadosamente y consol’e, pa di un manera of otro demasiado tristeza no caba cu ne. Pesey mi ta urgi boso pa confirma boso amor p’e.” (2 Cor. 2:7, 8) E palabra traduci como “confirma” ta transmiti e idea di demostra, ratifica of mustra cu di berdad ta asina. Nos no por djis asumi cu e ruman mester sa cu nos ta stim’e y ta interesa den dje. Nos actitud y nos echonan tin cu demostra esey.

“STIMULA OTRO PA MUSTRA AMOR Y HACI BON OBRA”

9. Con nos por stimula nos rumannan “pa mustra amor y haci bon obra”?

⁹ Pablo a bisa pa nos presta atencion na otro pa “stimula otro pa mustra amor y haci bon obra.” Con nos por haci esaki? Nos tin cu yuda nos rumannan mustra amor y haci loke ta bon. Por ehempel, si un candela ta casi paga, nos tin cu waya e candela y bolter e carbonnan pa nan sigui kima. (2 Tim. 1:6, nota) Di igual manera, tin cos cu nos por haci pa stimula nos rumannan cariñosamente pa demostra nan amor pa Jehova y pa nan prohimo. Un di e mihor maneranan pa motiva hende pa haci bon obra ta di duna nan compliment, of elogio sincero.

10, 11. (a) Ken tin mester di palabranan di elogio? (b) Duna un ehempel pa mustra con elogio por yuda ‘un hende cu a dal un paso robes.’

¹⁰ Nos tur tin mester di palabranan di elogio, hasta esnan cu no ta desanima. Un anciano a skirbi: “Nunca mi tata a yega di bisa mi cu mi a haci algo bon. Pues mi a lanta cu masha tiki confianza den mi mes. Aunke mi tin 50 aña aworaki, te ainda mi ta aprecia ora mi amigonan sigura mi cu mi ta haciendo un bon trabou como anciano ... Mi propio experencia a siña mi con importante ta pa anima otro hende, y mi ta haci mi best pa duna esey.” Palabra di elogio ta un estimulo pa tur hende, hasta pa pionero, rumannan di edad y esnan cu por ta desanima.—Rom. 12:10.

¹¹ Si ora e ancianonan ta purba di reahusta ‘un hende cu a dal un paso robes’, nan conseh’e cu amor y elogi’e pa e cosnan bon cu el a haci den pasado, nan por motiv’e pa cambia su manera di pensa y cuminsa haci loke ta corecto atrobe. (Gal. 6:1) Esaki ta loke a yuda un ruman muher cu yama Miriam. El a conta: “Mi tabatin un periodo hopi traumatico den mi bida ora cu algun bon amigo di mi a bay for di e berdad y, den e mesun periodo ey, mi tata a haya un hersenbloeding. Mi tabata hopi deprimi. Den un intento pa supera mi depresion, mi a cuminsa sali cu un mucha homber di mundo.” Esaki a laga Miriam sinti cu e no tabata merece Jehova su amor, y el a cuminsa pensa di bay for di e berdad. Pero un anciano a papia cu ne y a cord’e con fiel e tabata antes y a sigur’e cu Jehova tabata stim’e ainda. E palabranan ey a conmov’e y a rebiba su amor pa Jehova. Cu ki resultado? El a kibra e relacion cu e mucha homber di mundo y a sigui sirbi Jehova.

12. Kico lo por pasa si nos purba di “stimula” un ruman door di compar’e cu otro hende of critic’e of lag’e sinti su mes culpabel?

¹² Nos tin cu tene cuidou cu e manera cu nos ta “stimula” nos rumannan pa sigui sirbi Dios cu entusiasmo. Nos no mester laga nan sinti berguensa door di compara nan cu otro hende, ni critica nan pasobra nan no ta sigui e reglanan cu nos a pone. Tampoco nos no mester laga nan sinti nan culpabel pasobra nan no ta haci mas pa Jehova. E cosnan ey kisas ta motiva nan pa haci nan best pa un tempo, pero e resultado lo ta pasahero. Si nos kier resultado positivo y duradero, ta mihor nos duna un ruman un compliment, of elogio sincero, y lag’e mira cu nos kier p’e haci su best pasobra e ta stima Jehova.—Lesa Filipensenan 2:1-4.

“ANIMA OTRO”

13. Kico anima nos rumannan ta encera? (Wak e prome plachi.)

¹³ Nos tin cu ‘anima otro, y mucho mas ainda cu nos ta mira e dia ta yega cerca.’ Anima nos rumannan ta encera motiva nan pa sigui sirbi Dios. Nos por compara ‘stimula otro pa mustra amor y haci bon obra’ cu ora nos ta waya un candela cu ta casi paga, y ‘anima e rumannan’ ta manera ora nos ta benta mas palo den e candela pa e sigui kima of p’e bira mas cayente. Pa anima rumannan cu ta desanima, nos tin cu consola nan y fortalece nan. Nos mester papia cu nan na un manera cariñoso y suave. (Prov. 12:18) Ademas, nos mester ta “cla pa scucha, slow pa papia.” (Sant. 1:19) Si nos scucha nos rumannan cu atencion y purba di pone nos mes den nan sapato, nos lo por compronde dicon nan ta desanima y lo por bisa nan algo cu ta yuda nan.

14. Con un anciano a yuda un ruman homber desanima?

¹⁴ Un anciano bondadoso a logra yuda un ruman homber cu tabatin varios aña sin predica. Con el a yud’e? Segun cu e anciano tabata scuch’e, e anciano a ripara cu e ruman ainda tabata stima Jehova masha hopi. E tabata studia tur e articulonan di E Toren di Vigilancia diligentemente y tabata haci esfuerso pa bin reunion regularmente. Pero e tabata decepciona y un poco rabia pa e mal comportacion di algun ruman den congregacion. E anciano a scuch’e cu atencion y a lag’e expresa su mes sin conden’e. Ademas, e anciano a sigur’e cu e rumannan tabata stim’e. Cu tempo, e ruman homber a bin realisa cu e tabata laga mal experencia di pasado strob’e di sirbi e Dios cu e tabata stima. Anto, e anciano a invit’e pa bay predica hunto cu ne. Cu su yudansa, e ruman homber a bira activo atrobe den sirbishi y, cu tempo, el a bolbe cualifica pa sirbi como anciano.

15. Con nos por imita Jehova den nos manera di trata rumannan deprimi?

¹⁵ Awor, por sosode cu e yudansa cu nos ta duna un persona desanima no ta duna resultado mesora. Kisas nos tin cu sigui apoy’e. Pablo a bisa: “Yuda esnan ku ta débil i tene pasenshi ku tur hende.” (1 Tes. 5:14, BPK) En bes di entrega di biaha, laga nos sigui yuda esnan debil tanten cu nan tin mester di esey. Den pasado, Jehova semper a tene pasenshi cu su sirbidornan ora nan tabata desanima. Por ehempel, el a tene hopi pasenshi cu Elias y a tene cuenta cu su sintimentonan. El a duna e profeta loke e tabatin mester pa sigui cumpli cu su sirbishi. (1 Rey. 19:1-18) Un otro ehempel ta David. Jehova a pordon’e ora el a mira cu di berdad David a arepenti. (Sal. 51:7, 17) Y Dios a yuda e escritor di Salmo 73 ora esaki tabata a punto di stop di sirbie. (Sal. 73:13, 16, 17) Awe, Jehova ta tene pasenshi cu nos y ta trata nos bondadosamente, specialmente ora nos ta desanima. (Exo. 34:6) Bijbel ta bisa cu su misericordia ‘ta nobo tur mainta’ y no ta caba nunca. (Lam. 3:22, 23) Jehova ta spera di nos cu nos ta imita su ehempel y trata rumannan deprimi cu cariño.

ANIMA OTRO PA KEDA RIBA E CAMINDA CU TA HIBA NA BIDA

16, 17. Segun cu fin di e mundo malbado aki ta yega cerca, kico nos mester ta determina pa haci, y dicon?

¹⁶ Di e 33.000 presonan cu a sali for di e campo di concentracion di Sachsenhausen, miles a muri. Pero ni un di e 230 Testigonan di Jehova no a perde nan bida. E animacion y apoyo cu nan a haya di otro tabata un factor clave cu a pone cu e marcha di morto ey a bira un marcha di sobrevivencia pa nan.

¹⁷ Awe, nos ta riba ‘e caminda cu ta hiba na bida.’ (Mat. 7:14) Pronto, tur sirbidor di Jehova lo cana drenta e mundo nobo di husticia hunto. (2 Ped. 3:13) Mientrastanto, laga nos yuda otro keda riba e caminda cu ta hiba na bida eterno.