PREGUNTA CU BIJBEL TA CONTESTA

Di berdad Bijbel ta e Palabra di Dios?

Lo bo spera di e Palabra di Dios cu e ta un buki unico, y de echo, Bijbel ta un buki asina. Por ehempel, nan a publica miles di miyones di Bijbel den cientos di idioma. Ademas, e sabiduria cu tin den Bijbel tin poder pa cambia bida di hende.​—Lesa 1 Tesalonicensenan 2:13; 2 Timoteo 3:16.

Nos sa cu Bijbel ta e Palabra di Dios pasobra e ta profetisa futuro cu exactitud. Niun hende no por haci esaki riba su mes. Tuma por ehempel e buki di Isaias. Nan a haya un copia di dje den un cueba banda di Lama Morto cu ta data for di mas cu un siglo prome cu Hesus a nace. E ta trece padilanti cu e stad Babilonia lo a keda desola. E profecia aki a cumpli hopi aña despues cu Hesus a biba riba tera.​—Lesa Isaias 13:19, 20; 2 Pedro 1:20, 21.

Con nan a skirbi Bijbel?

Nan a skirbi Bijbel durante un periodo di 1.600 aña. Tabatin mas o menos 40 homber cu a skirbi Bijbel, y nan tur a skirbi tocante e mesun tema sin contradeci otro. Con esey tabata posibel? Ta bisto cu ta Dios a guia nan.​—Lesa 2 Samuel 23:2.

Algun biaha Dios a papia cu e escritornan di Bijbel pa medio di angel, vision of soño. Por lo general, Dios tabata transmiti su ideanan den mente di e escritor y laga e mes scoge e palabranan pa skirbi Dios su mensahe.​—Lesa Revelacion 1:1; 21:3-5.