Wak Caminda Bo Ta Cana pa Bo Por Progresa

TEMPO cu e pueblo di Dios a sali for di Babilonia na aña 537 prome cu Cristo, Jehova a fiha atencion na e ruta cu nan mester a sigui pa yega Jerusalem. El a bisa nan: “Prepara e caminda pa e pueblo; drecha, drecha e caminda grandi; kita e piedranan.” (Isa. 62:10) Imagina bo con algun di e Hudiunan lo a haci esey. Kisas nan a forma gruponan cu lo a bay dilanti pa drecha e caminda, talbes yena buraco y kita piedra for di caminda. Di e manera ey nan a haci e biahe mas facil pa nan rumannan cu tabata biniendo nan tras.

Nos por compara e ruta cu e Israelitanan mester a sigui cu un caminda cu ta hiba na metanan spiritual. Jehova kier pa tur su sirbidornan cana riba e caminda ey sin obstaculo innecesario. Su Palabra ta conseha nos: “Wak kaminda bo ta kana, ya bo ta kana sigur.” (Prov. 4:26, BPK) Sea cu nos ta jong of no, nos tur por saca un les for di e conseho sabi ey.

PREPARA E CAMINDA TUMANDO BON DECISION

Probablemente bo a yega di tende hende bisa di un teenager: ‘E tin tur cos na su fabor’, of, ‘Lo e yega leu.’ Por lo general, hobennan tin bon salud, nan ta capta cos lihe y nan tin e deseo pa ta exitoso den bida. Pesey mes Bijbel ta bisa: “Gloria di hende jong ta nan forsa.” (Prov. 20:29) Un hoben cu ta uza su talentonan y energia pa sirbi Jehova por alcansa metanan spiritual y haya berdadero felicidad den bida.

Pero, manera bo sa, mundo tambe ta masha interesa den potencial di nos hobennan. Ora un hoben Testigo ta presta bon na scol, su decano, maestronan of compañeronan di scol por pone presion riba dje pa e sigui un enseñanza superior pa asina e por tin exito den e mundo aki. Of si e ta bon den deporte, scoutnan por purba di convenc’e pa e bira un deportista profesional. Abo a yega di haya bo den un situacion asina, of bo conoce un hende cu ta bou di e presion ey? Kico por yuda un cristian tuma un decision sabi?

E siñansanan di Bijbel por yuda bo scoge e mihor caminda den bida. Eclesiastes 12:1 ta bisa: “Corda tambe riba bo Creador den e dianan di bo hubentud.” Awor, con ta e mihor manera cu abo como hoben por ‘corda riba bo Creador’?

Pensa por ehempel un rato riba kico a pasa cu Eric,a kende ta biba na West Africa. Eric tabata gusta hunga futbol. Tempo cu e tabatin 15 aña, nan a scog’e pa hunga den e seleccion di un team nacional. Esey a nifica cu poco tempo despues lo e por a haya e oportunidad di bay Europa pa ricibi entrenamento profesional y kisas sigui un carera profesional. Pero si Eric a haci esey, con lo e por a sigui e conseho pa ‘corda riba su Creador’? Laga nos wak ki decision Eric a tuma y ki les nos por siña for di esaki.

Tempo cu Eric tabata bay scol, el a cuminsa studia Bijbel cu testigonan di Jehova. El a siña cu su Creador lo caba pa semper cu e problemanan di humanidad. Eric a mira e importancia di uza su tempo y energia pa haci Dios su boluntad. Pesey, en bes di sigui un carera profesional den deporte, el a batisa y a haci esfuerso pa progresa spiritualmente. Cu tempo el a bira un sirbidor ministerial, y mas despues el a haya invitacion pa asisti na e Scol Biblico pa Ruman Homber Soltero.

Si Eric a sigui un carera den deporte, kisas lo el a bira rico y famoso. Pero el a realisa cu loke Bijbel ta bisa ta berdad: “E rikesa di un hende rico ta su stad fortifica, y manera muraya halto den su mes imaginacion.” (Prov. 18:11) Si, e supuesto siguridad cu rikesa ta duna un hende ta djis un ilusion. Ademas, hende cu ta loco pa bira rico hopi biaha ‘ta causa nan mes hopi dolor.’—1 Tim. 6:9, 10.

Ta bunita pa mira cu hopi hoben a haya goso y berdadero siguridad den e sirbishi di tempo completo. Eric a bisa: “Awor mi ta forma parti di un ‘team’ grandi di sirbidor di Jehova di tempo completo. Esey ta e mihor team cu mi por ta aden, y mi ta gradici Jehova cu el a mustra mi e unico caminda cu ta hiba na berdadero felicidad y exito den bida.”

Kico di abo? En bes di sigui tras di metanan di e mundo aki, pakico bo no ta haci “bo camindanan” firme sirbiendo como un pionero?—Wak e cuadro “Beneficionan Cu Universidad No Por Duna Bo.”

KITA OBSTACULO FOR DI CAMINDA

Un pareha cu a bishita e sucursal na Merca a ripara cu e betelitanan cu ta sirbi eynan ta masha feliz. Mas despues, e ruman muher a skirbi: “Nos bida a bira mucho comodo.” E pareha a dicidi di haci cambio den nan bida pa nan por dedica mas tempo y energia den sirbishi na Jehova.

Nan tabatin cu haci asina tanto cambio cu, na un dado momento, nan no tabata sa unda pa cuminsa. Pero un dia nan tabata medita riba e texto pa e dia ey. Tabata e texto di Juan 8:31, caminda Hesus a bisa: “Si boso keda fiel na mi palabranan, boso realmente ta mi discipelnan.” Cu e texto ey na mente, nan a pensa: “Cualkier sacrificio cu nos tin cu haci pa simplifica nos bida ta bale la pena.” Pues, nan a bende nan cas grandi, libra nan mes di otro carga y muda pa un congregacion cu tabatin mester di yudansa. Awor nan ta pionero regular, pero nan ta yuda tambe den construccion di Salon di Reino y ta sirbi como boluntario na congresonan di districto. Con nan ta sinti nan mes awor? Nan a bisa: “Awor cu nos ta hiba un bida mas simpel, nos mes ta keda asombra di e goso cu nos ta sinti di por haci precies loke Jehova su organisacion ta anima nos pa haci.”

KEDA RIBA E CAMINDA CU TA HIBA NA PROGRESO SPIRITUAL

Salomon a skirbi: “Laga bo wowo wak recht bo dilanti; laga bo klep di wowo keda fiha stret bo dilanti.” (Prov. 4:25) Mescos cu un chauffeur tin cu mantene su bista riba e caminda su dilanti, asina tambe nos tin cu evita cosnan cu por distrai nos y stroba nos di pone metanan spiritual y alcansa nan.

Ki ta algun meta spiritual cu abo por pone? Un bunita meta ta pa drenta sirbishi di tempo completo. Of kisas bo por bay yuda un congregacion den bisindario cu tin mester di publicadornan cu experencia pa cubri nan teritorio grandi. Talbes un congregacion tin hopi publicador, pero tiki anciano y sirbidor ministerial. Abo lo por ofrece bo mes pa yuda? Pakico no papia cu e superintendente di circuito pa wak ki sugerencia e tin pa bo? Si bo ta interesa pa bay yuda na un luga mas leu, bo por skirbi sucursal pa sa cua ta e congregacionnan cu mester di yudansa.b

Laga nos ban bek na e escena describi na Isaias 62:10. Algun di e Hudiunan a traha duro pa drecha e caminda y kita obstaculo for di caminda pa asina e pueblo di Dios por a bolbe nan pais natal. Si bo ta haciendo esfuerso pa logra metanan den bo sirbishi na Dios, no entrega. Cu su yudansa, abo tambe lo por alcansa bo metanan. Sigui pidi Jehova sabiduria segun cu bo ta kita obstaculo for di den bo caminda. Cu tempo lo bo bay mira con e ta yuda bo “wak kaminda bo ta kana.”—Prov. 4:26, BPK.