Tur Caminda Cos Malo Ta Pasa

Smita,a un señora di 35 aña na Dhaka, Bangladesh, tabatin e reputacion di ta un persona amoroso y bondadoso. Tur hende tabata conoce como un esposa diligente y alegre cu kier a yuda otronan sa loke el a siña tocante Dios. Ora cu Smita a bira malo diripiente y muri den menos cu un siman, su famia y amigonan a haya e shock di nan bida.

James y su esposa, un pareha jong di 30 y pico aña cu tabata biba na New York, tambe tabatin un reputacion similar. Un biaha, den lente, nan a bay bishita nan amigonan na costa west di Merca, pero nan no a bin cas bek nunca mas. Durante nan biahe, nan a haya nan mes envolvi den un accidente fatal di auto, lagando nan sernan keri y coleganan di trabou cu un bashi inmenso.

Bo no tin mester di bay mucho leu pa bo ripara cu maldad y sufrimento ta reina tur caminda awe. Guera ta mata hopi hende, tanto civil como soldaat. Hende inocente ta bira victima di crimen y violencia. Accidente mortal y enfermedad cronico ta kita bida di hende di tur edad of nivel social. Desasternan natural ta caba cu comunidadnan completo. Prehuicio y inhusticia a bira hopi comun. Kisas abo mes a yega di bira victima den un of otro manera.

Ta na su luga anto pa nos puntra nos mes:

• Dicon cos malo ta pasa cu bon hende?

• Nos por culpa Dios pa e cosnan ey?

• Ta pa casualidad e cosnan ey ta pasa of ta hende ta causa nan?

• Ta ley di karma? Es decir, ta loke un hende a haci den su bida anterior ta pone cu e ta sufri awor?

• Si ta existi un Dios todopoderoso, dicon e no ta proteha bon hende di cosnan malo?

• Maldad y sufrimento lo caba un dia?

Pa haya contesta riba e preguntanan aki, nos tin cu contesta dos pregunta basico: Dicon cos malo ta sosode y kico Dios ta bay haci cu nan?