TOPICO PRINCIPAL | KICO E REINO DI DIOS POR HACI PA BO?

Kico e Reino di Dios Lo Haci pa Abo?

Probablemente bo a compronde for di e articulonan anterior cu e Reino di Dios ta sumamente importante pa testigonan di Jehova. Y kisas algun di e bendicionnan cu e Reino aki lo trece cu ne den futuro a lanta bo interes. Na mes momento, bo por puntra bo mes si e promesanan aki ta confiabel.

Ta sabi pa bo ta cauteloso y no kere tur loke hende ta bisa. (Proverbionan 14:15) Esey ta net loke e Bereanonana di antiguedad a haci. Ora cu e Bereanonan a tende di e bon noticia di e Reino pa prome biaha, nan no a acept’e ciegamente. Mas bien, nan a analisa e Scritura cuidadosamente “pa wak si e cosnan cu nan a tende tabata asina.” (Echonan 17:11) Cu otro palabra, e Bereanonan a compara e bon noticia cu nan a tende cu loke Bijbel ta bisa. Cu tempo, nan a keda convenci cu e bon noticia realmente ta basa riba e Palabra di Dios.

Testigonan di Jehova ta invita bo pa haci mescos. Pa medio di un curso di Bijbel gratis, nos ta ofrece bo e oportunidad pa compara loke testigonan di Jehova ta kere tocante e Reino di Dios cu loke Bijbel ta siña.

Ademas di siña tocante e Reino di Dios, un curso asina por yuda bo haya contesta riba e siguiente preguntanan importante di bida:

Di unda nos a bin?
Kico ta e proposito di bida?
Dicon Dios ta permiti sufrimento?
Kico ta pasa cu nos ora nos muri?
Tera lo ser destrui?
Kico ta e clave pa haya un bida di famia feliz?

Mas importante ainda, un curso di Bijbel lo yuda bo “hala cerca Dios.” (Santiago 4:8) Anto mas bo hala cerca Dios, mas lo bo mira con e Reino di Dios por beneficia bo; no djis pa aworaki, sino pa semper. Hesus mes a bisa den oracion na su Tata: “Pa haya bida eterno, nan tin cu siña conoce bo, e unico Dios berdadero, y esun cu bo a manda, Hesucristo.”—Juan 17:3.

Testigonan di Jehova ta uza e buki aki pa studia Bijbel cu bo.

Si bo ta desea un curso di Bijbel gratis, puntra cualkier testigo di Jehova of yena e formulario na www.jw.org/jw-paa. (Wak PIDI UN CURSO DI BIJBEL riba e pagina inicial)

a Berea tabata un stad di Macedonia di antiguedad.

Loke e Reino di Dios Ta Nifica pa Folake

Recientemente, un mucha muher di dies aña cu yama Folake mester a traha un opstel pa scol tocante e tema: “E Cos Cu Mas Mi Ta Gusta Haci.” Folake a scoge pa skirbi tocante pakico e ta gusta papia cu otro hende tocante e Reino di Dios.

Folake a splica: “E Reino di Dios ta un gobierno real. Pero, e ta invisibel; pesey bo no por wak e, ni ora bo tin bril bisti.”

Folake a sigui skirbi tocante e bendicionnan di e Reino cu mas e ta desea di mira. Mencionando algun di e problemanan cu e Reino lo caba cu ne, el a skirbi: “Mi ta bira tristo ora mi mira hende sin cas ta biba riba caya”, tambe “muchanan cu ta muri di hamber debi na falta di cuminda na hopi parti di mundo.” Anto el a agrega: “Pero mi ta bira contento atrobe ora mi lesa Isaias 65:21.” Referiendo na hende cu lo biba bou di e gobernacion di e Reino di Dios, e texto ey ta bisa cu “nan lo traha cas y biba den nan; tambe nan lo planta cunucunan di wendruif y come nan fruta.”

Folake a bisa tambe cu e ta anhela pa e dia yega pa Dios caba cu tur maleza pa medio di su Reino. Den su opstel el a cita Revelacion 21:4, caminda Dios ta bisa cu “lo e seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas.” El a conclui bisando un biaha mas cu loke mas e ta gusta haci ta di papia tocante Jehova y su Reino. Ta claro anto cu e Reino di Dios tin un luga special den e curason di e hobencita aki.