TOPICO PRINCIPAL | UN BON AMISTAD CU DIOS TA POSIBEL
Bo Ta Sinti Cu Bo Ta un Amigo di Dios?
“Ora bo tin un bon amistad cu Dios, bo ta haya un sintimento di siguridad, satisfaccion y stabilidad. Bo ta sinti cu Dios ta pendiente di bo y semper kier lo mihor pa bo.”—CHRISTOPHER, UN MUCHA HOMBER DI GHANA.
“Dios ta mira ora bo ta tristo, y e ta duna bo hopi mas amor y atencion cu bo por imagina.”—HANNAH, UN MUCHA MUHER DI 13 AÑA DI ALASKA.
“E echo cu mi sa cu Dios ta considera mi como su amiga, ta algo sumamente valioso pa mi, y esey ta duna mi trankilidad.”—GINA, UN SEÑORA DI MAS O MENOS 45 AÑA DI JAMAICA.
Christopher, Hannah y Gina no ta e uniconan cu ta sinti asina. Hopi hende rond mundo ta convenci cu Dios ta considera nan como amigo. Kico di abo? Bo ta sinti cu bo tin un amistad cu Dios? Lo bo kier tin un mihor relacion cu ne? Kisas bo ta puntra bo mes: Un simpel ser humano manera ami por ta amigo di e Dios Todopoderoso? Con esey ta posibel?
UN BON AMISTAD CU DIOS TA POSIBEL
Segun Bijbel, nos por tin un amistad intimo cu Dios. Por ehempel, Isaias 41:8 ta bisa cu Dios a yama Abraham, e patriarca Hebreo, “mi amigo.” Ademas, nos ta haya e siguiente invitacion caluroso na Santiago 4:8: “Hala cerca Dios, y lo e hala cerca boso.” Pues, ta bisto cu un bon relacion cu Dios ta posibel. Si, nos por ta amigo di Dios. Pero con nos por “hala cerca” dje si e ta invisibel?
Pa contesta e pregunta aki, pensa un rato riba con dos hende ta cera amistad cu otro. Normalmente, ora bo cera conoci cu un otro persona pa prome biaha, bo ta bis’e bo nomber. Despues, segun cu boso ta papia riba loke boso ta sinti y pensa, boso amistad ta crece. Anto ora boso ta haci cos pa otro, boso amistad ta bira mas mihor ainda. Tur esaki ta conta tambe si nos kier tin un bon amistad cu Dios. Ban wak con esey ta posibel.