Duna Mi Djis Un Aña di Paz y Felicidad

MI PASADO:

Mi famia tabata biba na Tellancourt, un pueblito den noordoost di Francia. Mi tata tabata Frances, y mi mama ta Italiano. Tempo mi tabatin ocho aña, nos a muda bay un bario di hende di poco recurso na Roma, Italia. E situacion na cas no tabata nada facil. Mi mayornan tabata pleita pisa cu otro pasobra nan tabatin problema financiero.

Cu 15 aña di edad mi mama a anima mi pa sali mas y busca amigo. Pues, mi a cuminsa sali mas y cada biaha mi tabata keda mas tanto tempo for di cas. No a dura mucho cu mi a cuminsa haya mi cu mal amigo. Un dia, un homber, cu tabata parce amabel, a acerca mi y a ofrec’e mi droga. Mi a tum’e pasobra mi kier a mustra cu ta masha homber mi tabata. Asina, hopi lihe mes mi a cay den un mundo di droga y inmoralidad. Na diferente ocasion mi a bira victima di abuso sexual. Mi no tabatin cu nes mas cu bida; mi no tabata worry si mi a biba of muri. Mi tabata sinti mi mi so y desespera. Tempo cu mi tabatin 16 aña, mi a bebe henter un boter di whisky y a bula den un lago pa purba di mata mi curpa. Como resultado, mi a bay den coma pa tres dia largo.

Despues di esey, mi a cuminsa duna mas balor na bida, pero mi a bira violento y mi tabata engaña hende. Mi tabata ofrece hende pa haci sex cu nan. Pero ora mi tabata bay nan cas, mi tabata droga nan anto despues mi tabata horta nan cosnan di balor. Ademas, mi tabata trafica droga rond di Italia pa grupo di criminal organisa, y hopi biaha mi a haya mi den problema cu polis. Mi bida tabata bruha y sin sentido. Toch mi tabata convenci cu mester tabatin un motibo pakico mi ta existi. Mi a resa na Dios y pidie p’e duna mi djis un aña di paz y felicidad.

BIJBEL A CAMBIA MI BIDA:

Mi bida tabata na peliger debi cu algun traficante di droga tabata busca mi pa mata. Pesey, tempo mi tabatin 24 aña, mi a dicidi di muda bay Inglatera. Prome cu mi a bay, mi a bishita mi mama, y pa mi sorpresa mi a haya un homber cu yama Annunziato Lugarà ta papia cu ne tocante Bijbel.a Mi tabata sa di su pasado como criminal; pues, mi a haya miedo y a puntr’e kico e tabata haci eynan. El a conta mi tocante e cambionan grandi cu el a haci den su bida pa e por a bira un testigo di Jehova, y el a pone mi primintie cu ora mi yega Inglatera, lo mi tuma contacto cu e Testigonan. Mi a dun’e mi palabra, pero unabes mi a yega, mi a cay den e mesun estilo di bida atrobe.

Un dia, den un caya druk di London, mi a topa un Testigo cu tabata ofrece e revistanan E Toren di Vigilancia y ¡Despertad! Na e momento ey mi a corda loke mi a priminti Annunziato y mi a pidi e Testigo si mi por a haya un curso di Bijbel.

Loke mi a siña for di Bijbel a impresiona mi masha hopi mes. Por ehempel, un texto di Bijbel cu a conmove mi hopi tabata 1 Juan 1:9, cu ta bisa: “Si nos confesa nos picanan, Dios lo pordona nos nos picanan y limpia nos ... pasobra e ta fiel y husto.” E texto ey tabatin un impacto profundo riba mi pasobra mi a sinti mi sushi debi na e bida cu mi tabata hiba. Mesora mi a cuminsa bay e reunionnan na e Salon di Reino di testigonan di Jehova, y nan a duna mi un caluroso bonbini. Ora mi a mira e amistad cera cu nan tabatin cu otro, cu ta algo cu semper mi tabata anhela, mi a dicidi cu mi tambe kier tabata parti di e congregacion ey, cu tabata manera un famia.

A pesar cu no tabata asina dificil pa mi stop di uza droga y cambia mi estilo di bida, tabata hopi mas dificil pa mi mehora mi personalidad. Mi a siña cu mi mester trata hende cu respet y mustra consideracion na nan. De echo, ainda mi ta lucha cu algun mal cualidad, pero cu yudansa di Jehova mi a logra haci progreso. Seis luna despues cu mi a cuminsa mi curso di Bijbel, mi a batisa como un testigo di Jehova. Esey tabata na aña 1997.

E BENEFICIONAN:

Despues cu mi a caba di batisa, mi a casa cu un mucha muher cu yama Barbara, kende tambe a caba di bira un testigo di Jehova. Ora un di mi amigonan di antes a mira cuanto cambio mi a haci den mi bida, e tambe a cuminsa studia Bijbel. Cu tempo, e y su ruman muher a bira Testigo. Anto na edad di mas cu 80 aña, mi tanta grandi a cuminsa studia Bijbel y a batisa prome cu el a fayece.

Awor mi ta sirbi como un anciano den un congregacion local, y ami cu mi casa ta predica 70 ora cada luna y ta yuda hende di habla Italiano cu ta biba na London siña tocante Bijbel. De bes en cuando, mi ta sinti mi deprimi pa motibo di mi estilo di bida di antes, pero Barbara ta un gran apoyo pa mi. Porfin mi a haya loke semper mi a anhela: un bida di famia feliz y un Tata cu ta stima mi. Mi a pidi Dios duna mi djis un aña di paz y felicidad, pero el a duna mi mucho mas cu esey.