TOPICO PRINCIPAL | KICO DIOS A REVELA TOCANTE CIELO?
Pregunta Tocante Cielo
Bo a yega di puntra bo mes: Con cielo ta? Con e criaturanan spiritual cu ta biba eynan ta? Si ta asina, bo no ta bo so. Hende tin miles di aña ta specula tocante esaki. Algun hende ta kere cu ta nos antepasadonan ta biba den cielo y cu nan merece honor. Otronan ta imagina cu cielo ta un luga caminda ta reina paz y felicidad, y caminda angel y bon hende cu a fayece ta biba. Y tin otro hende ta pensa cu tin miles di miyones di dios ta biba den cielo.
Hopi hende ta kere cu nos no por sa nada tocante cielo pasobra no tin un persona cu a yega di bin for di cielo pa conta nos tocante dje. Pero e rasonamento ey no ta corecto. Prome cu Hesucristo a bin na Tera, e tabata existi caba den cielo. Hesus a mustra esey bon cla ora el a bisa e lidernan religioso di e prome siglo: “Mi no a baha for di cielo pa haci mi boluntad, ma pa haci boluntad di esun cu a manda mi.” Pues Hesus a papia di experencia personal ora el a bisa su apostelnan: “Den cas di mi Tata tin masha hopi luga.”—Juan 6:38; 14:2.
Hesus su Tata ta Dios, kende su nomber ta Jehova, y Jehova su “cas” ta den cielo. (Revelacion 4:11) Pues no tin niun persona cu por describi cielo mihor cu Jehova Dios y Hesucristo. Nan a revela hopi informacion tocante cielo mediante visionnan espectacular cu nan a duna sirbidornan fiel.
E siguiente articulo ta analisa porcionnan di Bijbel cu ta describi loke hende a mira den diferente vision. Segun cu bo ta analisa e visionnan aki, tene na mente cu cielo no ta manera e mundo fisico unda nos por mira of mishi cu cosnan. Pesey, Dios no a scoge pa splica asuntonan na un manera cu ta e criaturanan spiritual so por compronde. En bes di esey, el a duna su sirbidornan visionnan cu a inclui conceptonan cu nos por compronde pa asina nos por haya un idea di con cielo ta. E visionnan aki lo yuda bo compronde ken ta biba den cielo.