1 Yudansa pa Evita Problema

BEBE DI MAS

Delphine, cu nos a menciona den e articulo anterior, a sinti cu su preocupacionnan tabata lanta su deseo pa bebe di mas. Bijbel no ta condena uzo modera di alcohol, pero e ta bisa: “No anda cu esnan cu ta gusta dal nan biña.” (Proverbionan 23:20) Bebemento di mas por hiba na problema serio di salud, e por kibra of daña relacion, y tur aña, miyones di hende ta muri sin tin mester. Hende por evita hopi di e problemanan aki si nan sigui e consehonan sabi di Bijbel.

Delphine a haci esey. Awor e ta bisa: “Mi a realisa cu alcohol no tabata yuda mi cu mi ansiedad. Mi a aplica e palabranan sabi di Filipensenan 4:6 y 7 cu ta bisa: ‘No sea ansha tocante nada; mas bien ... laga Dios sa kico ta boso peticionnan.’ Tur anochi ora mi tabata sinti cu ansiedad tabata ataca mi y yen di cos tabata keda pasa den mi mente, mi tabata roga Jehova y cont’e tur mi sintimentonan, incluso mi rabia, dolor y desesperacion. Mi tabata suplic’e p’e yuda mi haya manera pa mi sinti mas positivo. Mainta ora mi lanta, mi tabata haci sigur cu mi a deshaci di e sintimentonan ey di berdad. E custumber di haci oracion a yuda mi concentra riba loke mi tin y no riba loke mi no tin. Mi a scoge pa nunca mas bebe alcohol. E paz cu mi a haya tabata asina precioso cu mi no por a risca perd’e.”

INMORALIDAD

Inmoralidad ta un di e causanan principal di dolor di curason y problema grandi den bida. Pero principionan di Bijbel por yuda nos evita e tipo di problemanan ey. Bijbel ta menciona algun di e cosnan principal cu ta hiba na inmoralidad, por ehempel flirtmento inapropia y pornografia. Un hoben cu yama Samuel ta conta: “Tabata hopi facil pa flirt. Tin bes mi no tabata sinti mi ni atrai na e persona, pero mi tabata sa cu e si gusta mi, y esey tabata lanta mi gana di flirt cu ne.” Hende tabata acusa Samuel di flirt asina tanto bes, hasta ora e no tabatin intencion di flirt, cu el a dicidi di cuminsa flirt djis pa malo. Pero e cos ey a preocup’e. Awor e ta bisa: “E cos ey ta malo pasobra e ta pone bo bira hopi egoista.”

Samuel a lesa un articulo pa hoben riba e website jw.org y a pensa riba loke Proverbionan 20:11 ta bisa: “Te hasta un mucha ta conoci pa su echonan, si su conducta ta puro y recto.” Con e texto ey a yud’e? Samuel a realisa cu su flirtmento no tabata ni puro ni recto. Awor e ta bisa: “Mi a siña cu un hoben cu ta flirt ta desaroyando cualidadnan cu lo hacie un mal casa. Mi a cuminsa pensa con mi futuro esposa lo sintie si e mira mi ta flirt cu un otro hende muher. Esey a laga mi realisa cu e cos ey ta malo. E echo cu flirtmento ta facil no kiermen cu e ta bon.” Samuel a cambia. Ora cu el a stop cu flirtmento, esey a yud’e evita inmoralidad tambe.

Antonio tabata den un peliger hasta mas grandi. E tabata adicto na pornografia. Maske e tabata casa cu un señora cu e ta stima hopi, cada bes e tabata cay bek den pornografia. El a bisa cu el a pensa riba 1 Pedro 5:8 y esey a yud’e di berdad. E ta bisa: “Mantene boso sano huicio y sea alerta. Boso adversario, Diabel, ta cana rond manera un leon cu ta [brul], buscando ken e por habraca.” Antonio ta bisa: “Tin imagen pornografico tur caminda den e mundo aki, y nan por keda graba den nos mente. E texto ey a echt yuda mi pensa riba e fuente di e tentacionnan ey. Mi mester a keda corda mi mes cu imagen pornografico ta bin di un fuente despreciabel, esta Diabel. Awor mi sa cu ta Jehova so por yuda mi ‘mantene mi sano huicio y keda alerta’ di manera cu mi por bringa e cosnan cu ta ataca mi mente, curason y matrimonio.” Antonio a ricibi e yudansa cu e tabatin mester y awor porfin e no ta wak pornografia mas. Esey a yud’e evita otro problema mas grave.

Claramente, Bijbel ta duna conseho practico cu por yuda nos evita problema grave. Pero kico di problema cu a crea raiz caba y cu ta parce cu no tin solucion? Laga nos wak con e Palabra di Dios por yuda nos resolve e tipo di problemanan aki.