Pronto Dios Lo Caba cu Tur Sufrimento

“Te ki tempo, o SEÑOR, lo mi sclama pa yudansa, y abo no ta tende? Mi ta sclama na bo: ‘Violencia!’ Toch bo no ta salba.” (Habacuk 1:2, 3) Esaki ta palabranan di Habacuk. E tabata un bon hende cu tabatin Dios su aprobacion. Pero locual cu el a pidi ta indica cu e no tabata confia den Dios? Claro cu no! En realidad, Dios a sigura Habacuk cu el a pone un dia pa caba cu sufrimento.—Habacuk 2:2, 3.

Ora abo of un hende cu bo ta stima ta sufriendo, ta facil pa conclui cu Dios a tarda y cu e mester a haci algo caba. Sinembargo, Bijbel ta sigura nos: “Jehova no ta tarda pa cumpli cu su promesa, manera algun hende ta kere; mas bien, e tin pasenshi cu boso pasobra e no ta desea pa ningun hende ser destrui, ma e ta desea pa tur haya chens di arepenti.”—2 Pedro 3:9.

NA KI TEMPO DIOS LO ACTUA?

Dios lo actua pronto. Hesus a profetisa cu un generacion specifico lo mira un combinacion di suceso cu ta caracterisa e ultimo dianan di “e era aki.” (Mateo 24:3-42) E profecianan aki ta cumpliendo den nos tempo, locual ta indica cu pronto Dios lo interveni den asuntonan humano.a

Pero Dios por pone fin na tur sufrimento? Ora Hesus tabata riba Tera, el a demostra cu Dios por kita sufrimento di hende. Laga nos wak algun ehempel.

Desaster Natural: Un biaha ora Hesus y su discipelnan tabata nabega den Lama di Galilea, un biento fuerte a lanta y a hera sink nan boto. Pero Hesus a mustra cu e cu su Tata por controla forsa di naturaleza. (Colosensenan 1:15, 16) Hesus a djis bisa: “Silencio! Keda keto! Y biento a baha y a calma completamente.”—Marco 4:35-39.

Maleza: Hopi hende tabata sa cu Hesus por cura hende ciego, lam, esnan cu tin epilepsia, lepra y cualkier otro enfermedad. El “a cura tur cu tabata malo.”—Mateo 4:23, 24; 8:16; 11:2-5.

Hamber: Durante su ministerio, Hesus a uza e poder cu su Tata a dun’e dos biaha pa multiplica un tiki cuminda pa miles di hende por a come.—Mateo 14:14-21; 15:32-38.

Morto: Ora Hesus tabata riba Tera, el a resucita tres hende, un di nan tabatin cuater dia morto. Esey ta duna prueba cu Jehova por resucita hende morto.—Marco 5:35-42; Lucas 7:11-16; Juan 11:3-44.