E Berdad Tocante Dios y Hesucristo

Ken Dios Ta?

Con Dios Su Nomber Ta? Dios mes a bisa: “Ami ta Jehova. Esey ta mi nomber.” (Isaias 42:8, NW) Den Bijbel, Dios su nomber ta ser menciona mas o menos 7.000 biaha. Sinembargo, hopi traduccion di Bijbel a tribi di substitui Dios su nomber cu titulonan manera “Señor.” Dios kier pa nos ta su amigo, pesey e ta anima nos pa “invoca su nomber.”—Salmo 105:1.

Algun Titulo di Jehova. Bijbel ta mustra cu Jehova tin varios titulo, manera “Dios”, “Todopoderoso”, “Creador”, “Tata”, “Señor” y “Soberano.” Den Bijbel, ora Dios su sirbidornan a haci oracion na dje, nan a uza tanto su titulonan como su nomber, Jehova.—Daniel 9:4.

Con Dios Ta. Dios ta un spirito invisibel. (Juan 4:24) Bijbel ta bisa bon cla cu “ningun hende no a mira Dios.” (Juan 1:18) Bijbel ta bisa tambe cu Dios tin sintimento. Hende por caus’e dolor of dun’e “delicia.”—Proverbionan 11:20; Salmo 78:40, 41.

Dios Su Maraviyoso Cualidadnan. Dios ta trata tur hende mescos, sin importa di ki nacionalidad of cultura nan ta. (Echonan 10:34, 35) Y tambe, Dios ta “yen di compasion y gracia, kende no ta rabia lihe y kende ta abunda den misericordia y berdad.” (Exodo 34:6, 7) Pero di tur Dios su maraviyoso cualidadnan, tin cuater cualidad cu ta sobresaliente.

Poder. E ta e “Dios Todopoderoso.” Esey kiermen cu e tin poder sin limite pa cumpli cu tur loke e priminti.—Genesis 17:1.

Sabiduria. Dios su sabiduria ta hopi mas superior cu e sabiduria di cualkier persona. Pesey Bijbel ta bisa cu e ta “e unico cu ta sabi.”—Romanonan 16:27.

Husticia. Dios semper ta haci loke ta husto. Tur loke e ta haci ta “perfecto” y “sin inhusticia.”—Deuteronomio 32:4.

Amor. Bijbel ta bisa cu “Dios ta amor.” (1 Juan 4:8) Dios no solamente ta mustra amor, sino e ta amor. Su amor ta asina grandi cu nos por mir’e den tur loke e ta haci y esey ta beneficia nos den hopi manera.

Dios Su Amistad cu Hende. Dios ta nos amoroso Tata den cielo. (Mateo 6:9) Si nos pone fe den dje, nos por bira su amigo. (Salmo 25:14) De hecho, Dios ta invita nos pa hala cerca dje den oracion y pa “tira tur [nos] inkietud riba dje, pasobra e ta interesa den [nos].”—1 Pedro 5:7; Santiago 4:8.

Kico Ta e Diferencia Entre Dios y Hesucristo?

Hesus No Ta Dios. Hesus ta unico pasobra ta e so Dios a crea directamente. Pesey Bijbel ta yam’e Yiu di Dios. (Juan 1:14) Despues di crea Hesus, Jehova a uza su prome yiu como “un trahador experto” pa crea tur otro cos y tur otro ser viviente.—Proverbionan 8:30, 31; Colosensenan 1:15, 16.

Hesucristo nunca a bisa cu e ta Dios. En bes di esey, el a splica: “Mi ta [Dios] su representante y ta E a manda mi.” (Juan 7:29) Ora cu Hesus tabata papia cu un di su discipelnan, el a yama Jehova “mi Tata, cu ta boso Tata” y “mi Dios, cu ta boso Dios.” (Juan 20:17) Despues cu Hesus a muri, Jehova a resucit’e pa biba den cielo y el a dun’e gran autoridad na Su man drechi.—Mateo 28:18; Echonan 2:32, 33.

Hesucristo Por Yuda Bo Hala Cerca Dios

Hesus a bin na Tera pa siña nos tocante su Tata. Jehova mes a bisa tocante Hesus: “Esaki ta mi Yiu stima; scuch’e.” (Marco 9:7) Hesus conoc’e Dios mas mihor cu cualkier otro hende. Hesus a bisa: “Ningun hende no sa ken e Tata ta, sino e Yiu y esun na ken e Yiu kier revela e Tata.”—Lucas 10:22.

Hesus ta refleha e cualidadnan di Dios perfectamente. Como cu Hesus a imita e cualidadnan di su Tata asina bon, e por a bisa: “Esun cu a mira mi, a mira e Tata tambe.” (Juan 14:9) Hesus a yuda hende hala cerca Dios pa motibo cu el a imita e amor di su Tata tanto den loke el a bisa como den loke el a haci. Hesus a bisa: “Ami ta e caminda, e berdad y e bida. Ningun hende no ta yega cerca e Tata si no ta pa medio di mi.” (Juan 14:6) Tambe el a bisa: “Adoradornan berdadero lo adora e Tata cu spirito y cu berdad, pasobra, en realidad, e Tata ta busca esnan cu kier ador’e asina.” (Juan 4:23) Imagina bo! Jehova ta busca hende manera abo cu kier siña conoce e berdad tocante dje.