Plania for di Awor pa Sali Mas den Sirbishi
1. Ki oportunidad nos tin den e temporada di Memorial, y con nos por mustra esey?
1 Tur aña e temporada di Memorial ta duna nos e oportunidad atrobe pa expresa nos profundo ‘gradicimento na Jehova.’ (Sal. 109:30) Pero con nos por mustra e aprecio aki na Esun cu a percura e rescate? Wel, un manera pa haci esey ta di sali mas den sirbishi durante e luna di maart binidero. Bo por cuminsa plania for di awor pa esaki.—Pro. 21:5.
2. Con abo y otro ruman a sinti aña pasa ora a anuncia cu tin posibilidad pa traha pionero auxiliar den april a base di 30 ora?
2 Traha Pionero Auxiliar: Aña pasa, rumannan rond mundo tabata hopi contento ora nan a tende cu tin e oportunidad pa traha pionero auxiliar den april a base di 30 ora. Un ruman homber a skirbi: “Mi ta bay scol secundario ainda y mi no por a logra traha pionero regular. Ma mi ta bay yena e formulario pa traha 30 ora den april y haci esfuerso pa yega 50.” Un ruman muher cu ta traha henter siman a skirbi: “Trinta ora, esey si mi por yega!” Ora un ruman muher di 80 y pico aña, kende antes tabata pionero, a tende e anuncio aki, el a bisa: “Ta riba esaki mi tabata warda! Jehova sa cu e mihor añanan di mi bida tabata den e trabou di pionero.” Otro rumannan cu no por a traha pionero auxiliar a pone meta pa aumenta nan oranan.
3. Ki motibo nos tin pa traha pionero auxiliar durante maart, april y mei?
3 Maart lo ta un excelente luna pa traha pionero auxiliar, pasobra lo tin oportunidad atrobe pa traha sea 30 of 50 ora. Ademas, riba diasabra 17 di maart nos lo cuminsa cu nos campaña special pa invita hende pa Memorial dia 5 di april. Hopi ruman lo sinti asina un goso di por aumenta nan sirbishi cu nan lo kier traha pionero auxiliar den april y mei tambe, cumpliendo cu e rekisito di 50 ora.
4. Kico nos por haci pa sali mas den sirbishi, y cu ki resultado?
4 Kisas boso por uza e proximo anochi di Adoracion Como Famia pa plania con cada miembro di famia por sali mas den sirbishi durante e temporada di Memorial. (Pro. 15:22) Pidi Jehova den oracion pa bendiciona bo esfuersonan. (1 Juan 3:22) Ora bo sali mas den sirbishi, no solamente bo ta alaba Jehova mas sino tambe bo ta aumenta bo goso.—2 Cor. 9:6.