Uza Presentacion Cu Ta Efectivo
1. Kico nos por siña for di e echo cu e prome cristiannan a varia e manera cu nan a presenta e mensahe?
1 E prome cristiannan a predica e bon noticia na hende di diferente cultura y religion. (Col. 1:23) Aunke semper nan a papia di e mesun tema—e Reino di Dios—nan a varia e manera cu nan a present’e y a tene cuenta cu e publico. Por ehempel, ora Pedro a papia cu algun Hudiu cu tabatin respet pa e Scritura, el a cuminsa cita e palabranan di profeta Joel. (Echo. 2:14-17) Di otro banda, wak con Pablo a rasona cu e Griegonan manera Echonan 17:22-31 ta trece padilanti. Awe, den algun teritorio nos ta topa hende cu tin respet pa Bijbel y nos por uz’e libremente den nos trabou di cas pa cas. Sinembargo, kisas nos mester ta mas discreto ora nos ta papia cu hende cu no ta cristian of cu no ta interesa den Bijbel of den religion.
2. Con nos por uza e oferta di literatura pa yuda tanto hende cu tin respet pa Bijbel como esnan cu no tin respet?
2 Haci Bon Uzo di e Oferta di Literatura: E aña di sirbishi aki, e oferta di literatura lo cambia cada dos luna y lo e enfoca mas riba revista, tratado y foyeto. Maske algun hende den e teritorio no kier papia tocante Bijbel, toch nos por bisa algo cu por lanta nan interes. Kisas nos no ta menciona Bijbel ni lesa un texto na e prome bishita, pero si e persona mustra interes, ta bon pa nos bay bek pa yud’e haya fe den e Creador y den su Palabra. Di otro banda, si e persona tin respet pa Bijbel, nos por uza esaki den nos presentacion y ofrece e persona literatura biblico. De echo, semper nos por ofrece e buki Bijbel Ta Siña of e foyetonan Scucha Dios of Scucha Dios y Biba pa Semper, sea loke sea e oferta di luna. E cos importante ta pa uza un presentacion cu ta efectivo.
3. Den ki sentido curason di hende ta manera tereno pa planta?
3 Prepara e Tereno: Por compara curason di hende cu tereno pa planta. (Luc. 8:15) Tin tereno mester di mas preparacion pa e simianan di berdad biblico por saca raiz y crece. E discipelnan di prome siglo a logra planta simia di e berdad den tur tipo di tereno, y esey a duna nan goso y satisfaccion. (Echo. 13:48, 52) Nos tambe por tin e mesun exito ora nos pone atencion na e manera cu nos ta introduci e mensahe y desaroya nos presentacion.