Abo Por Sali den Sirbishi Atardi?
1. Segun un buki, ki ora apostel Pablo tabata predica di cas pa cas?
1 Segun e buki Daily Life in Bible Times, apostel Pablo tabatin custumber di predica di cas pa cas “for di 4 or di atardi te anochi laat.” Nos no sa si esey en berdad tabata e caso, ma loke si nos sa ta cu Pablo tabata dispuesto pa “haci tur cos pa causa di e bon noticia.” (1 Cor. 9:19-23) Lo el a regla su asuntonan di tal forma cu e por a predica ora cu mayoria di hende tabata na cas.
2. Dicon ta bon pa sali den sirbishi atardi?
2 Hopi caminda nos rumannan tin custumber di predica di cas pa cas den siman parti mainta. Pero, esey ta e mihor momento di dia pa haya hende na cas den boso teritorio? Un pionero a bisa: “Apenas bo ta haya hende na cas parti mainta. Mayoria di hende ta na cas mas atardi.” Den oranan di atardi, hende sa ta mas relaha y dispuesto pa combersa. Y nos tin mas chens di haya vooral hende homber pa papia cu ne tocante e bon noticia. Pues, si e ancianonan ta haya cu ta bon, nan mester organisa reunionnan pa sali atardi tambe den sirbishi.
3. Con nos por ta prudente ora nos ta predica atardi laat?
3 Sea Prudente: Ora nos ta sali den sirbishi atardi, ta importante pa nos ta prudente. Por ehempel, si bo yama na un cas na un mal momento, kisas net ora e hendenan ta comiendo, ta mihor bisa nan cu lo bo bolbe aki rato. Si cuminsa bira scur, para caminda e doño di cas por mira bo y bisa mesora ken bo ta y e motibo di bo bishita. Lo ta bon tambe pa traha dos dos of cerca di e grupo y keda den cayanan cu tin bon iluminacion y cu no ta isola. Di otro banda, evita di bay mucho laat na e casnan. (2 Cor. 6:3) Si cierto bario ta bira peligroso ora solo baha, ta mihor pa traha nan prome cu bira scur.—Prov. 22:3.
4. Ki bendicion e sirbishi di atardi ta duna nos?
4 Ki Bendicion Nos Ta Haya? Nos lo disfruta mucho mas di nos sirbishi ora nos haya hende pa papia cu ne. Y mas hende nos haya, mas oportunidad nos tin pa yuda nan ‘haya salbacion y yega na un conocemento exacto di e berdad.’ (1 Tim. 2:3, 4) Abo por ahusta bo programa pa sali den sirbishi atardi?