Cinco Manera pa Haya un Estudio di Bijbel
1. Kico nos mester haci si ta dificil pa haya un estudio di Bijbel den teritorio?
1 Bo ta haya cu ta dificil pa haya hende cu kier un estudio di Bijbel? Si esey ta e caso, no entrega. Jehova ta bendiciona esnan cu no ta stop di haci su boluntad. (Gal. 6:9) Ban wak cinco sugerencia cu por yuda bo.
2. Con nos por uza e metodo directo pa cuminsa un estudio di Bijbel?
2 Uza e Metodo Directo: Hopi hende sa cu nos ta ofrece E Toren di Vigilancia y ¡Despertad!, pero kisas nan no sa cu nos ta ofrece estudio di Bijbel. Pues, dicon bo no ta purba e metodo directo pa ofrece estudio di Bijbel na hende den sirbishi? Bo por puntra bo rebishitanan tambe si nan kier un estudio di Bijbel. Si nan no kier, bo por sigui hiba literatura y cultiva nan interes. Pa hopi aña un ruman homber tabatin un ruta di revista cu un pareha casa. Na un ocasion, despues cu el a duna nan e revistanan mas recien, el a bira pa bay pero a dicidi di puntra nan: “Boso lo a desea un estudio di Bijbel?” Pa su sorpresa nan a contesta cu si. Y awor nan tur dos ta batisa.
3. Pakico nos no mester asumi cu tur hende cu ta bin reunion tin un estudio di Bijbel caba?
3 Ofrece Estudio na Hende Cu Ta Bin Reunion: No asumi cu tur hende cu ta asisti na e reunionnan tin un estudio di Bijbel caba. Un ruman homber a conta: “E manera cu mi a cuminsa cu mas cu mitar di mi estudionan tabata combersando cu personanan cu a bishita e reunionnan.” Un señora timido tabatin 15 aña ta bishita e reunionnan hunto cu su yiu muhernan, kendenan tabata batisa caba. E señora tabata drenta Salon di Reino net ora reunion cuminsa y sali manera e caba. Riba un dia, un ruman a acerca e señora y a ofrec’e un estudio di Bijbel; e señora a acepta y despues a bin den e berdad. E ruman muher a skirbi: “Ta duel mi cu mi a warda 15 aña pa puntr’e si e kier a studia.”
4. Con nos por laga otronan sa cu nos ta disponibel pa dirigi estudio?
4 Laga Hende Sa Cu Bo Ta Disponibel: Un ruman muher tin custumber di compaña otro publicador na nan estudionan di Bijbel. Na final di e estudio, cu permiso di esun cu ta dirigi e estudio, e ta puntra e studiante si e sa di otro hende cu tambe lo ta desea un estudio. Si bo ofrece un rebishita e buki Bijbel Ta Siña, lo bo por puntr’e: “Bo sa di otro hende cu lo tin gana di haya e buki aki?” Tin biaha un publicador of pionero no por studia cu un persona cu el a haya den teritorio. Pues laga e rumannan sa cu bo ta disponibel pa dirigi estudio di Bijbel.
5. Dicon lo ta bon pa puntra casa no creyente di un miembro di congregacion si e kier studia?
5 Puntra Casa Cu No Ta Testigo: Tin publicador den bo congregacion cu nan casa no ta Testigo? Algun casa cu no ta sirbidor di Jehova no kier papia tocante Bijbel cu nan casa Testigo, pero nan lo acepta si un estudio cerca un publicador cu no ta parti di nan famia. Semper ta bon pa papia prome cu e casa Testigo pa asina wak cua ta e mihor manera pa trata cu e situacion.
6. Dicon ta importante pa haci oracion ora nos kier logra haya un estudio?
6 Pidi Jehova den Oracion: No balota e poder di oracion. (Sant. 5:16) Jehova a priminti nos cu e ta scucha nos peticionnan si nan ta di acuerdo cu su boluntad. (1 Juan 5:14) Un ruman homber cu tabatin un bida hopi druk a cuminsa haci oracion pa haya un estudio di Bijbel. Su casa a puntra su mes si su esposo tabatin tempo pa yuda un studiante, specialmente si e studiante tabatin hopi problema. Pues e esposa a papia cu Jehova tocante esaki ora e tabata resa pa su casa haya un estudio. E contesta pa nan oracion a bin mas o menos dos siman despues ora un pionero den nan congregacion a haya un meneer cu kier a studia y a pas’e pa e ruman homber. E esposa a skirbi: “Mi ta recomenda tur publicador cu ta pensa cu nan lo no por dirigi un estudio di Bijbel pa nan no stop di pidi pa un estudio y pa nan ta specifico den nan oracionnan. Nunca nos a pensa cu nos lo a haya asina tanto goso.” Si bo sigui persevera, bo tambe lo por haya un estudio di Bijbel y sinti e goso di yuda hende subi e caminda cu ta “hiba na bida.”—Mat. 7:13, 14.