Tuma e Profetanan Como Ehempel: Jonas
1. Ki bon cualidadnan Jonas tabatin?
1 Ora bo pensa riba profeta Jonas, kico ta e prome cos cu ta bin na bo mente? Kisas algun hende ta haya cu e tabata un cobarde of un persona sin sintimento. Pero, sin duda el a mustra humildad, curashi y un spirito di sacrificio propio. Con nos por imita su bon cualidadnan?—Sant. 5:10.
2. Con nos por imita Jonas su humildad?
2 Humildad: Na momento cu Jonas a haya su asignacion, el a huy bay den e direccion contrario. Esaki no ta un sorpresa pasobra e Asirionan tabata hopi violento, y Ninive tabata conoci como “e stad tur na sanger.” (Nah. 3:1-3) Sinembargo, Jonas a mustra humildad ora Jehova a disciplin’e y a acepta e asignacion ora el a haya un di dos chens. (Prov. 24:32, NW; Jon. 3:1-3) Pues, aunke Jonas na prome instante a bula pipa pa su asignacion, toch despues el a cumpli cu e boluntad di Jehova. (Mat. 21:28-31) Nos tin e mesun determinacion pa predica e bon noticia, hasta ora nos ricibi disciplina of ora e teritorio ta dificil?
3. Pakico nos mester tin curashi y e spirito di sacrificio propio pa predica e bon noticia?
3 Curashi y Sacrificio Propio: Ora Jonas a realisa cu su mal decision a pone bida di e marineronan na peliger, e tabata dispuesto pa sacrifica su bida pa nan. (Jon. 1:3, 4, 12) Mas despues, riba caminda pa su asignacion na Ninive, el a cana bay te den e centro di e stad, probablemente pa busca un bon luga pa proclama e huicio di Jehova. E accionnan aki no ta di un cobarde, sino mas bien di un hende yen di curashi! (Jon. 3:3, 4) Kico di nos awe? Nos tin cu pidi Dios curashi pa por predica ora nos enfrenta oposicion. (Echo. 4:29, 31) Y tambe nos mester tin e spirito di sacrificio propio pa duna di nos tempo y recursonan den sirbishi.—Echo. 20:24.
4. Dicon nos mester tuma tempo pa medita riba e bon ehempelnan cu e profetanan di Jehova a laga pa nos?
4 Cada bes cu bo lesa un relato di un profeta di Dios, purba pone bo mes den su luga. Puntra bo mes: ‘Kico ami lo a haci? Con mi por imita e profeta aki su bon cualidadnan den mi bida?’ (Heb. 6:11, 12) Den futuro Nos Ministerio di Reino lo trata mas di e lesnan valioso cu nos por siña for di otro profetanan fiel di Jehova.