Ken Lo Por Ta Interesa den e Tema Aki?
1. Kico nos tin cu puntra nos mes ora nos ta lesa E Toren di Vigilancia y ¡Despertad! y dicon?
1 Tanto E Toren di Vigilancia como e ¡Despertad! ta ser prepara cu e campo mundial na mente. Pesey nan ta trata un variedad amplio di topico. Segun cu bo ta lesa cada articulo di bo ehemplar personal, puntra bo mes: ‘Ken lo por ta interesa den e tema aki?’ Anto, pone como bo meta pa ofrece e revista na e hende cu bo a pensa riba dje.
2. Ki topiconan di nos revistanan por ta interesante pa otro hende?
2 E Toren di Vigilancia ta trata un topico biblico cu abo y un colega di trabou a yega di papia tocante dje? Tin un articulo tocante bida di famia cu lo por ta util pa un famia di bo? Bo tin un conoci cu ta planeando pa bishita un pais cu un articulo di ¡Despertad! a papia di dje? Un di e revistanan por ta di interes pa cierto negoshi of instancia di gobierno cu tin den bo teritorio? Por ehempel, un revista cu ta trata dificultadnan cu hende di edad ta enfrenta por ta di interes special pa casnan di cuido. Y lo no ta mal idea pa ofrece un revista cu ta trata e topico di criminalidad na instancianan hudicial.
3. Conta un experencia cu ta mustra e importancia di ofrece cierto ehemplar specifico di nos revistanan na esnan cu nos ta kere cu lo hay’e interesante.
3 Resultado: Despues cu un pareha di Sur Africa a ricibi e ¡Despertad! di october 2011 tocante “Con pa Lanta Yiunan pa Nan Ta Responsabel”, nan a bel 25 scol den e teritorio di nan congregacion. Bintidos di nan a acepta e revistanan aki y a parti nan pa e studiantenan. Un otro pareha di e pais aki tambe a haya e mesun idea, y nan a laga ehemplar di e revista ey na e scolnan den nan teritorio. E maestronan di un di e scolnan a dicidi di uza e revista durante nan lesnan semanal. E pareha a conta e superintendente di circuito nan experencia, y e na su turno a anima e congregacionnan di su circuito pa ofrece e revista aki na e scolnan den nan teritorio. E sucursal a haya asina tanto pedido pa e edicion ey di e revista cu mester a imprimi mas.
4. Dicon nos lo kier ofrece e revistanan na mas tanto hende posibel?
4 Nos revistanan ta splica e berdadero nificacion di e cosnan cu ta pasando rond mundo y ta dirigi hende su atencion na Bijbel y na e Reino di Dios. Ademas, nan ta e unico revistanan na mundo cu ta “anuncia salbacion.” (Isa. 52:7) Pesey nos tin cu ofrece nan na mas tanto hende posibel. Y un bon manera pa logra esaki ta door di puntra bo mes: ‘Ken lo por ta interesa den e tema aki?’