Tuma e Profetanan Como Ehempel: Oseas
1. Ki pregunta kisas bo a yega di haci bo mes?
1 Ora bo medita riba Jehova su gran misericordia y tur e bon cosnan cu e ta percura na abundancia, kisas bo a yega di puntra bo mes: ‘Ki sacrificio mi ta dispuesto pa haci pa Jehova?’ (Sal. 103:2-4; 116:12) Oseas tabata dispuesto pa haci tur loke Jehova a mand’e haci, aunke esaki a envolve sacrificio personal. Con nos por imita Oseas su ehempel?
2. Con nos por imita Oseas su ehempel di perseverancia?
2 Predica den Tempo Dificil: Oseas su mensahe tabata principalmente pa e reino di dies tribu di Israel; eynan casi ningun hende no tabata sirbi Jehova mas. Rey Jeroboam II mes a haci loke ta malo den bista di Jehova y a sigui cu e adoracion di bishe cu Rey Jeroboam I a practica. (2 Rey. 14:23, 24) Tur otro rey cu a bin despues a contribui na e decadencia spiritual di e reino di dies tribu, cu finalmente a ser destrui na aña 740 prome cu Cristo. Oseas a sirbi Jehova fielmente durante 59 aña meymey di tur e adoracion falso ey. Anos tambe tin e mesun determinacion pa predica aña aden aña afo a pesar di apatia of persecucion?—2 Tim. 4:2.
3. Con Oseas su bida a mustra cu Jehova ta misericordioso?
3 Enfoca Riba Jehova Su Misericordia: Jehova a bisa Oseas: “Tuma pa bo mes un esposa prostituta.” (Ose. 1:2) Gomer, e esposa di Oseas, a haya un yiu cu ne, pero ta parce cu e dos yiunan cu el a haya despues no tabata di Oseas. Oseas tabata dispuesto pa pordona su casa infiel, y su ehempel a demostra e gran misericordia cu Jehova a mustra na e reino arepenti di Israel. (Ose. 3:1; Rom. 9:22-26) Anos ta dispuesto pa haci sacrificio personal pa siña tur sorto di hende cu Jehova ta un Dios misericordioso?—1 Cor. 9:19-23.
4. Kico ta algun sacrificio cu nos por haci pa Jehova?
4 Algun sirbidor di Jehova a sacrifica carera lucrativo pa nan por dedica mas tempo na e trabou di predica. Otronan a opta pa no casa of haya yiu pa asina nan por traha pa e interesnan di Reino. Kisas nos ta pensa cu nos no por imita Oseas su ehempel. Pero, segun cu nos ta haya mas aprecio pa Jehova su bondad inmereci y ta depende riba su spirito santo pa fortaleza, Jehova por uza nos na maneranan cu nunca nos a pensa cu lo ta posibel, manera el a haci cu Oseas.—Mat. 19:26; Flp. 2:13.