Prepara un Bon Introduccion

1. Dicon un bon introduccion ta importante?

¹ Mescos cu un bon aperitivo ta habri apetit pa e plato principal, un bon introduccion ta habri caminda pa un combersacion agradabel tocante Bijbel. Un bon introduccion por varia di largura y topico, pero mescos cu un cuminda sabroso, e ta rekeri pa nos pensa y prepara di antemano. (Prov. 15:⁠28) Ki ora nos ta papia di un bon introduccion?

2. Con nos por prepara un introduccion cu ta interesante?

² Scoge Topico Interesante: Si nos introduccion no lanta interes di e doño di cas, e por para e combersacion. Pues, ora nos ta prepara, pensa ki topico lo interesa hende den e teritorio. Nan ta interesa den bon gobernacion, den un bida di famia feliz of den fin di guera? Generalmente hende gusta duna nan opinion; pues prepara un pregunta cu ta pone nan pensa. Nos por uza un di e introduccionnan cu tin den Nos Ministerio di Reino y adapt’e na nos teritorio. Pues, pakico no practica de bes en cuando algun introduccion durante boso Adoracion Como Famia?

3. Con nos por ahusta nos introduccion di acuerdo cu custumber y creencia di e hendenan den nos teritorio?

³ Tene Cuenta cu Custumber y Creencia: Na algun luga, hende kier pa nos bisa mesora e motibo di nos bishita. Otro caminda, un bishitante cu no puntra e doño di cas con ta bay of kisas no bisa ta ken e ta, tin mal manera. Na algun luga, caminda e hendenan ta mas religioso, nos por referi na Bijbel den nos introduccion sin ningun problema. (Echo. 2:​14-⁠17) Pero, caminda hende no ta pertenece na un religion cristian of no ta kere mes den Dios, lo ta mas mihor pa papia di Bijbel ora nos bay bek cerca nan y no na e prome bishita.​—⁠Echo. 17:​22-⁠31.

4. Kico nos tin cu tene cuenta cu ne ora nos ta prepara e prome palabranan di nos introduccion?

⁴ Bo Prome Palabranan: Prepara bo prome palabranan bon. Por lo general, ta mihor uza frasenan cortico y simpel. E manera cu bo ta bisa bo prome palabranan tambe ta importante. Mustra entusiasmo. Pone un smile amigabel riba bo cara cu ta refleha bo interes den e doño di cas. Si nos sigui e sugerencianan aki, nos lo prepara introduccionnan apetitoso cu ta anima hende den nos teritorio pa come na “e mesa di Jehova.”​—⁠1 Cor. 10:⁠21.