Lo Bo Probecha di Dje?

1. Ki oportunidad unico e Conmemoracion ta duna nos?

¹ E Conmemoracion cu lo tuma luga dia 14 di april ta duna nos un bon oportunidad pa demostra y sigui desaroya nos sintimentonan di gratitud pa Jehova su bondad. E relato di Lucas 17:11-18 ta mustra kico Jehova y Hesus ta pensa di gratitud. Ta tristo pa mira con di e dies leprosonan cu a ser cura ta un so a bin bek pa gradici Hesus. Den futuro, pa medio di e regalo di e rescate, tur enfermedad lo ser cura y bida eterno lo bira un realidad. Na e tempo ey, nos lo gradici Jehova tur dia pa e bendicionnan ey. Pero con nos lo por mustra nos gratitud durante e siguiente simannan?

2. Con nos por desaroya sintimento di gratitud pa e rescate?

² Desaroya Sintimento di Gratitud: Nos por haya mas aprecio pa e rescate ora nos ta tuma tempo pa medita riba dje. Pa yuda nos den esaki, nos por sigui e programa di lesamento di Bijbel pa e Conmemoracion cu nos ta haya riba nos kalender of den e foyeto Analisá e Skritura Tur Dia. Dicon no analisa e informacion aki como famia? Esey sigur lo duna nos hopi mas aprecio pa e rescate. Esaki na su turno lo tin un bon efecto riba nos conducta.—2 Cor. 5:14, 15; 1 Juan 4:11.

3. Den ki maneranan nos por demostra nos gratitud durante e temporada di Conmemoracion?

³ Demostra Gratitud: Gratitud mester ser demostra cu echo. (Col. 3:15) E leproso a haci esfuerso pa busca Hesus y gradicie. Y sin duda cu entusiasmo lo el a conta tur hende con el a ser cura milagrosamente. (Luc. 6:45) Kico di nos? Nos gratitud pa e rescate lo motiva nos pa participa cu celo den e campaña pa invita hende pa e Conmemoracion? Un otro manera pa demostra nos gratitud ta door di traha pionero of traha mas den sirbishi durante e temporada di Conmemoracion. Riba e anochi di e Conmemoracion nos aprecio lo motiva nos pa duna un bonbini na e bishitantenan y tuma tempo pa contesta cualkier pregunta cu nan por tin.

4. Kico nos por haci pa despues di e Conmemoracion aki nos no lamenta?

⁴ Esaki lo ta nos ultimo Conmemoracion? (1 Cor. 11:26) Nos no sa. Pero loke si nos sa ta cu unabes cu e ocasion aki pasa, un bon oportunidad pa demostra nos gratitud tambe a pasa. Lo bo probecha di dje? Laga e palabranan di aprecio di nos boca y e meditacion di nos curason agrada Jehova, Esun cu generosamente a haci e rescate posibel.—Sal. 19:14.