Nos Tin e Custumber di Ta Puntual?

1. Ki ehempel Jehova ta pone pa nos encuanto ser puntual?

¹ Jehova semper ta puntual. Por ehempel, e ta yuda su sirbidornan “na e momento apropia.” (Heb. 4:16) Tambe e ta duna nos “cuminda [spiritual] na e debido tempo.” (Mat. 24:45) Pesey nos por ta sigur cu su dia di rabia ‘lo no ta lat.’ (Hab. 2:3, BPK) E echo cu Jehova ta puntual ta beneficia nos hopi. (Sal. 70:5) Sinembargo, debi cu nos ta imperfecto y tin un bida asina ocupa, no ta facil pa tur ora nos ta na tempo. Pero dicon ta bon pa nos tin e custumber di ta puntual?

2. Dicon e echo cu nos ta puntual ta glorifica Jehova?

² Den e ultimo dianan aki, caminda hende ta stimado di nan mes y no tin dominio propio, hende puntual a bira hopi scars. (2 Tim. 3:1-3) Pesey ora nos como cristian ta puntual na nos trabou, afspraak y reunionnan, hende ta ripara, y esaki ta glorifica nos Dios. (1 Ped. 2:12) Pero sa sosode cu nos ta trempan na nos trabou pero hopi biaha laat na actividadnan teocratico? Si nos yega nos reunionnan na tempo, esta, prome cu cantica y oracion inicial, nos ta demostra cu nos kier ta organisa mescos cu nos Tata celestial.—1 Cor. 14:33, 40.

3. Dicon ora nos ta puntual nos ta mustra consideracion na otro hende?

³ Ora nos ta puntual, nos ta mustra tambe consideracion na otro hende. (Flp. 2:3, 4) Ora nos yega nos reunionnan na tempo, incluso esnan pa sirbishi di veld, nos ta evita di distrai nos rumannan. Di otro banda, si nos tin custumber di ta laat, nos ta duna otro hende e impresion cu nos ta pensa cu nos tempo ta mas valioso cu esun di nan. Un persona puntual ta mustra cu e ta responsabel, diligente y confiabel, cualidadnan cu otro hende ta balora hopi.

4. Si tur ora nos ta laat, kico nos por haci pa mehora?

⁴ Si tur ora bo ta laat, ta bon pa bo puntra bo mes ta dicon. Organisa bo schedule na un manera realistico; esey lo yuda bo cumpli cu bo tareanan na tempo. (Ecl. 3:1; Flp. 1:10) Pidi Jehova yuda bo. (1 Juan 5:14) Ora bo ta puntual, bo ta mustra aprecio pa e dos mandamentonan mas importante di e Ley, esta, stima Dios y bo prohimo.—Mat. 22:37-39.