Tuma e Profetanan Como Ehempel: Sofonias
1. Den ki ambiente Sofonias a sirbi como profeta, y dicon e ta un bon ehempel pa nos awe?
1 Meymey di siglo 7 prome cu Cristo, e Israelitanan na Juda tabata practica adoracion di Baal abiertamente. Poco tempo despues cu nan a mata e Rey malbado Amon, su yiu Josias a bira Rey. (2 Cro. 33:21–34:1) Rond di e mesun tempo ey, Jehova a scoge Sofonias como profeta pa declara Su mensahe di huicio. Aunke Sofonias kisas tabata miembro di e cas real di Juda, e no a suavisa e mensahe di condenacion cu Jehova tabatin pa e lidernan di Juda. (Sof. 1:1; 3:1-4) Nos, di mes manera, ta haci esfuerso pa tin e mesun curashi di Sofonias y no laga nos famianan interferi den nos adoracion na Jehova. (Mat. 10:34-37) Kico e mensahe di Sofonias a encera, y kico tabata e resultado?
2. Ki pasonan nos tin cu dal pa Jehova proteha nos riba su dia di rabia?
2 Busca Jehova: Ta Jehova so por salba hende riba Su dia di rabia. Pesey, Sofonias a urgi e pueblo di Juda pa busca Jehova, busca husticia y busca humildad mientras cu tabatin tempo ainda. (Sof. 2:2, 3) Esaki ta conta pa nos tempo tambe. Mescos cu Sofonias, nos ta anima otro hende pa busca Jehova. Pero nos mes tambe tin cu haci algo; nos mester ta determina pa nunca ‘stop di sigui Jehova.’ (Sof. 1:6) Nos ta busca Jehova ora nos ta studia su Palabra y ora nos ta pidie guia nos. Nos ta busca husticia ora nos ta hiba un bida moralmente limpi. Y nos ta busca humildad ora nos ta cultiva un actitud sumiso y ta cla pa sigui e guia di Jehova su organisacion.
3. Dicon nos mester mantene un actitud positivo den sirbishi?
3 Bon Resultado: E mensahe di huicio cu Sofonias a declara tabatin bon efecto riba algun hende na Juda; pero esun mas notabel tabata e hoben Josias, kende for di chikito a cuminsa busca Jehova. Despues, Josias a cuminsa un campaña vigoroso contra idolatria den e pais. (2 Cro. 34:2-5) Awe, aunke algun simia ta cay banda di caminda, otro den baranca of meymey di mata di sumpiña, algun ta cay den bon tera tambe y ta duna fruta. (Mat. 13:18-23) Nos ta sigur cu Jehova lo sigui bendiciona nos esfuersonan segun cu nos ta keda ocupa den e trabou di plama simia di Reino.—Sal. 126:6.
4. Dicon nos mester ‘spera riba Jehova’?
4 Algun hende den Juda a pensa cu Jehova lo no haci nada. Sinembargo, Jehova a haci sigur cu tur hende tabata sa cu su gran dia tabata cerca. (Sof. 1:12, 14) E hendenan cu a busca refugio den Jehova so lo a salba. (Sof. 3:12, 17, NW) Mientras cu nos ta ‘spera riba Jehova’, laga nos tin goso sirbiendo unidamente cu otro adoradornan di nos gran Dios.—Sof. 3:8, 9.